12:15 - 29/09/2022
ئایا سیناریۆكه‌ی موجاهیدينی خه‌لق دووباره ده‌بێته‌وه؟
هێرش و په‌لاماره‌كانی كۆماری ئیسلامی ئێران، به‌رامبه‌ر
هه‌رێمی كوردستان و لایه‌نه كوردییه‌كانی رۆژهه‌ڵاتی كوردستان چه‌ند مه‌رام و
ئامانجێكیان له پشته‌وه‌یه، كه ده‌كرێت سێ خاڵ وه‌ك ئامانجی دیار و سه‌ره‌كی دیاریبكرێن.
یه‌كه‌م: كۆماری ئیسلامی ئێران ده‌یه‌وێت خۆپیشاندان
گرفته ناوخۆییه‌كانی وڵاته‌كه‌ی هه‌نارده‌ی ده‌ره‌وه بكات و وا وێنای بكات كه
ئه‌وه‌ی له‌ناوخۆدا ڕووده‌دات ده‌ستی ده‌ره‌كی له پشته‌وه‌یه و خۆڕسك نیه.
دووه‌م: كۆماری ئیسلامی ئێران ده‌یه‌وێت به هێرشكردنه
سه‌ر هه‌رێمی كوردستان و هێزه كوردییه‌كانی رۆژهه‌ڵات، دیمه‌نه‌كه بشێوێنێت و له
پرسی ئازادییه‌وه بیگۆڕێت بۆ ململانێی نه‌ته‌وه‌یی و وانیشانی بدات، شه‌ڕه‌كه‌ی
ئه‌و له‌گه‌ڵ نه‌ته‌وه‌یه‌كی دیاریكراودایه، ئه‌مه‌ش به ئامانجی ئه‌وه‌ی لێكترازان
و پێكدادان له نێوان گه‌لانی ئێران بێته كایه‌وه، له كاتێكدایه زیاتر له 10
رۆژه سه‌رجه‌م گه‌لانی ئێران پێكه‌وه له‌سه‌ر شه‌قامن و ده‌نگی ناڕه‌زاییان به‌رزكردوه‌ته‌وه.
سێیه‌م: ئامانجی دوورمه‌ودای ئێران دووباره‌كردنه‌وه‌ی
سیناریۆی موجاهیدنی خه‌لقه به‌سه‌ر ئه‌و هێزه كوردییانه‌ی كه له هه‌رێمی
كوردستان بنكه‌وباره‌گایان هه‌یه، ئێران ده‌یه‌وێت له به‌غدا حكومه‌تێكی لاواز و نزیك له خۆی پێكبهێنرێت و
نه‌توانێت له ژێر فشاره‌كانی ده‌ربچێت و بڕیاری ده‌ركردنی هێزه كوردییه‌كانی به
زۆر پێده‌ربكات.
موجاهیدینی خه‌لقی ئێران، ڕێکخراوێکی سیاسی ئیسلامی
و چەپڕۆیە و خاوەنی پێکهاتەیەکی نیمچە سەربازییە، لە ٦ی ئەیلوولی ١٩٦٥ دامه‌زراوه
و دژبه‌ری كۆماری ئیسلامی ئێران بوون، لە ئەیلوولی ١٩٨٠ ڕوویان لە عێراق کرد و بە
هاوکاری لەگەڵ سوپای بەعسی عێراق دەستیان کرد بە شەڕ لە دژی ئێران و له‌سەربازگەی
ئەشرەف له نزیك دیاله نیشته‌جێبوون، ساڵانی دوای 2003 به فشاری ئێران له عێراق
ده‌ركران.