10:39 - 13/12/2020
دواین زانیارى له‌باره‌ى خۆپیشاندانه‌كانى ئەم دواییانەی هەرێمی كوردستان
لە خۆپێشاندانەکانی سنووری
پارێزگای سلێمانی و هەڵەبجە تائێستا 10 کەس گیانیان لەدەستداوە و زیاتر لە 70 کەسیش
برینداربوون، ده‌یان كه‌س ده‌ستگیركراون و تائێستا ئازادنه‌كراون، له سنورى هه‌ردوپارێزگاكه
زیاتر له 150 باڵه‌خانه‌ى حكومى و حیزبى سوتێنران، ژمارەیەک لە رێکخەران و خۆپێشاندەرانی
خۆپێشاندانەکان دەستگیرکراون، رۆژانە گرتن و ڕاوەدوونان بەردەوامە.
له درێژه‌ى ناڕه‌زایه‌تیه‌كان
دژى دواكه‌وتنى مووچه و نه‌بونى خزمه‌تگوزاریه‌سه‌ره‌تاییه‌كان به‌تایبه‌ت كاره‌با
و نه‌وت، له هه‌رێمى كوردستان، چین و توێژه جیاوازه‌كانى سنورى هه‌ردووپارێزگاى
سلێمانى و هه‌ڵه‌بجه ڕژانه‌سه‌ر شه‌قامه‌كان و خۆپیشاندانیان ئه‌نجامدا، به‌ڵام
له‌لایه‌ن هێزه ئه‌منیه‌كانه‌وه به‌توندى وه‌ڵامدرانه‌وه و خۆپیشاندانه‌كان
گرژى تێكه‌وت.
سه‌ره‌تاى خۆپیشاندانه‌كانى
ئه‌م دواییه، له قه‌زای سه‌یدسادقه‌وه ده‌ستیان پێكرد، خۆپیشاندەران ڕژانه‌سه‌رشه‌قامه‌كان
و ڕێگاى سه‌ره‌كى قه‌زاكه‌یان داخست، سەرەتا خۆپیشانده‌ران، دواتریش سه‌رجه‌م باره‌گا
حكومى و حیزبیه‌كانى ناوقه‌زاكه‌یان سوتاند، به‌هۆى دروستبونى گرژى له نێوان خۆپیشانده‌ران
و هێزه‌ئه‌منیه‌كان ده‌یان كه‌س برینداربون و ڕه‌وانه‌ى نه‌خۆشخانه‌كران، وەك
قایمقامی قەزاكە ڕایگەیاند بەشێك لە بریندارەكان پۆلیسی چالاكە مەدەنیەكان و هێزە
ئەمنیەكان بوون، هاوكات چالاكوان و ڕێكخه‌رانى خۆپیشانده‌ره‌كان له سنوره‌كه ده‌ستگیركران
و تا ئێستاش هەندێكیان ئازاد نەكراون.
هاوكات، چین و توێژه‌جیاوازه‌كانى ناحیه‌ى ته‌قته‌قى سه‌ربه‌قه‌زایى كۆیه، ڕژانه‌سه‌رشه‌قامه‌كان
و خۆپیشاندانیان ئه‌نجامدا، خۆپیشانده‌ران داواى موچه و خزمه‌تگوزاریه‌سه‌ره‌تایه‌كان
كرد، به‌پێویستیشیان زانى چاكسازى ڕیشه‌ى له هه‌رێم ئه‌نجامبدرێت و كۆتاى به زوڵم
و سته‌م و گه‌نده‌ڵكارى بهێندرێت.
دواتریش بۆ ڕۆژى دواى خۆپیشاندان
له ده‌ربه‌ندیخان و پێنجوێن و ڕانیه و قه‌ڵادزێ و چه‌مچه‌ماڵ و کەلار و گەرمیان
و شاره‌زوور به‌ڕێوه‌چوو، خۆپیشانده‌ران باره‌گا حكومى و حیزبیه‌كانیان سوتاند..
له شارى سلێمانیش سه‌ره‌ڕایى
بڵاوه‌پێكردنى هێزێكى ئه‌منى زۆر خۆپیشاندان له‌به‌رده‌م بیناى پارێزگاىى سلێمانى
به‌ڕێوه‌چوو، خۆپیشانده‌ران ڕێگاى سه‌ره‌كى سلێمانى تاسڵوجه‌ییان داخست، دواتر خۆپیشاندانه‌كان
گرژى تێكه‌وت و به‌زه‌برى هێز كۆتاى پێهێنرا، ژماره‌یه‌ك ڕۆژنامه‌نوس و چالاكوان و
ڕێكخه‌رانى خۆپیشاندانه‌كان ده‌ستگیركران.
به‌پێى دوایین زانیارى كه
ده‌ست په‌یسه‌ر كه‌وتووه، زیاتر له 150 بینا و باره‌گاى حیزبى له هه‌ردوو سنورى
پارێزگاى سلێمانى و هه‌ڵه‌بجه سوتاون، به‌پێى وته‌ى شاخەوان رەئووف، سەرۆکی لیژنەی
ناوخۆ و ئاسایش و ئەنجوومەنە خۆجێییەکان لە پەرلەمانی کوردستان، لە خۆپێشاندانەکانی
سنووری پارێزگای سلێمانی و هەڵەبجە تائێستا 10 کەس گیانیان لەدەستداوە و زیاتر لە
70 کەسیش برینداربوون.
ئه‌وه له كاتێكدایه،
ژمارەیەک لە رێکخەران و خۆپێشاندەرانی خۆپێشاندانەکان دەستگیرکراون، رۆژانە گرتن هەیە
و بەردەوامە، کە بۆ ماوەی رۆژێک یان چەند رۆژێک دەستبەسەر دەکرێن و پاشان ئازاد دەکرێن.
له‌گه‌ڵ ده‌ستپێكردنى خۆپیشاندانه‌كانى
ڕۆژى هه‌ینى شارى سلێمانیش، به‌شێك لە رێکخەرانی خۆپێشاندانەکە دەستگیرکران، كه لەنێویاندا
عەبدوڵڵا مەلا نووری، شێرکۆ حەمە ئەمین و پەیمان عیزەدین پەرلەمانتارانی پێشووی گۆڕان
و چەند چالاكوانێك هه‌یه و دوێنێ بەشێکیان ئازادکران.