11:15 - 14/02/2020
هه‌وڵێك بۆ پێكهێنانه‌وه‌ی هاوپه‌یمانی كوردستانی له ئارادایه
پەیسەرپرێس زانیاری
دەربارەی پێكهێنانه‌وه‌ی هاوپەیمانی كوردستانی بڵاودەكاتەوە.
جەمال كۆچەر سەرۆكی
فراكسیۆنی یەكگرتوو لە ئەنجومەنی نوێنەرانی عێراق كە بەشداری كۆبوونەوەی رۆژی 11/2/2020ی سەرۆكایەتی هەرێم و فراكسیۆنە كوردستانیەكانی
كردووە بە پەیسەرپرێسی راگەیاند، لە كۆبوونەوەكەدا سەرۆكایەتی هەرێم رەشنوسێكی 8
خاڵیان بۆ دروستكردنەوەی هاوپەیمانی كوردستانی لە ئەنجومەنی نوێنەران ئامادەكردووە
و لەو كۆبوونەوەیەدا دایانە دەست فراكسیۆنە كوردستانیەكان، تێیدا پێناسەی هاوپەیمانیەتیەكەیە
و ئامانجەكانی دروستكردنی و ئەركەكانی و هەڵوێستەكانی، دیاریكراون.
جەمال كۆچەر دەڵێت
نێچیرڤان بارزانی لەكۆبوونەوەكەدا پێی گوتین بچن رەشنوسەكە بخوێننەوە هەر تێبینیەكتان
هەبوو لەسەری دەستكاری بكەن و زیاد و كەمی بكەن پاشان ئەگەر بڕیارتاندا واژۆی لەسەر
بكەن.
سەرۆكی فراكسیۆنی
یەكگرتوو دەشڵێت، نێچیرڤان بارزانی پێی گوتین، حەزدەكەین هاوپەیمانیەتیەكی گەورە و
بەهێز و راستەقینە لەنێوان فراكسیۆنە كوردیەكان دروست بكرێت، ئەگەر هاوپەیمانیەتیەكی
لاوازی بێ متمانەبێت ئەوە با هەر دروست نەكرێت.
جەمال كۆچەر دەڵێت،
ئەو هاوپەیمانیەتیە ئازادانەیە و لایەنەكان دەتوانن واژۆی بكەن و پابەندبن پێوەی یان
نەچنە ناوی، دەشڵێت هیچ وادەیەك بۆ بریاردان لەسەر ئەو هاوپەیمانێتیە دیاری نەكراوە،
بەڵام هەر فراكسیۆنێك ئەو پرۆژەیە تاوتوێ دەكات و دواتر فراكسیۆنەكان كۆدەبنەوە و
تێبینیەكانیان باس دەكەن، ئەگەر رێككەوتن كرا واژۆی لەسەر دەكەن ئەگەریش فراكسیۆنەكان
رەتیانكردەوە یان هەر فراكسیۆنێك بەدڵی نەبێت دەتوانێت واژۆی نەكات.
رۆژی 11ی شوبات
سەرۆكایەتی هەرێمی كوردستان لەگەڵ فراكسیۆنەكانی پارتی و یەكێتی و گۆڕان و یەكگرتوو
و كۆمەڵی ئیسلامی كۆبۆوە و پرۆژەكەی سەرۆكایەتی هەرێمی بۆ دروستكردنەوەی هاوپەیمانی
كوردستانی خستە بەردەمیان.