05:01 - 02/07/2019
کۆسرەت رسوڵ له‌دۆخى نێوخۆی حزبه‌كه‌ى نیگه‌رانه
کۆسرەت رسوڵ جێگرى یەکەمی سكرتێرى گشتى یه‌كێتى، له بارودۆخى حزبه‌كه‌ى نیگه‌رانه‌و له‌كاردانه‌وه‌ى ئه‌وه‌ش به‌شدارى رێككه‌وتن ناكات له‌گه‌ڵ پارتى له‌سه‌ر پارێزگارى كه‌ركوك.
به‌پێى ئه‌و زانیارییانه‌ى په‌یسه‌رپرێس، له‌سه‌رچاوه‌ى ئاگاداره‌وه ده‌ستیكه‌وتوون، كۆسره‌ت ره‌سوڵ له دۆخى حزبه‌كه‌ى نیگه‌رانه‌و رێككه‌وتنى له‌سه‌ر دۆسیه‌ى كه‌ركوك له‌گه‌ڵ پارتى بۆ ماڵى تاڵه‌بانى جێهێشتووه.
كۆسره‌ت ره‌سوڵ پێی وایە، ماڵى تاڵه‌بانى بەمەبەست واژۆكانى ئه‌ویان پشتگوێخستووه، كاتێك دووجار له‌گه‌ڵ پارتى رێككه‌وتنى واژۆ كردووه. هه‌ر بۆیه له‌م قۆناغه‌دا ئاماده‌نییه به‌شداربێت له‌رێككه‌وتن له‌سه‌ر كه‌ركوك و ئه‌و پرسه‌ى جێهێشتووه بۆ ماڵى تاڵه‌بانى.
په‌یسه‌ر رۆژى ٣٠ مانگى رابردوو زانیارى ئه‌وه‌ى بڵاوكرده‌وه كه دوای ئه‌وه‌ی له ١٠ی حوزه‌یران به‌رهه‌م ساڵح، له‌شاری هه‌ولێر به‌شداری مه‌راسیمی سوێندخواردنی نێچیرڤان بارزانی سه‌رۆكی هه‌رێمی كوردستانى كرد، پارتی و به‌دیاریكراویش نێچیرڤان بارزانی، هه‌وڵیداوە یه‌كێتی و پارتی له‌رێگه‌ی به‌رهه‌م ساڵح-ەوە لێک نزیك بكاته‌وه، له‌و كاته به‌دواوه پارتی به‌هۆى نیگه‌رانییه‌كانیه‌وه، كۆسره‌ت ره‌سوڵ عه‌لی جێگری یه‌كه‌می سكرتێری گشتی یه‌كێتی پشتگوێخستووه.
سه‌باره‌ت به‌و هه‌نگاوه‌ی پارتی، سه‌رچاوه‌یه‌كى ئاگادار بۆ په‌یسه‌ر گوتى"پارتی دوو رێككه‌وتنی له‌گه‌ڵ كۆسره‌ت ره‌سوڵ هه‌بوو، به‌ڵام به‌هۆی ئه‌وه‌ی كۆسره‌ت ره‌سوڵ نه‌یتوانی پارێزگاری له‌رێككه‌وتنه‌كان بكات، بۆیه پارتی نایه‌وێت هیچ رێككه‌وتنێكی نوێ له‌گه‌ڵ جێگری یه‌كه‌می سكرتێری گشتی یه‌كێتی بكات".
گوتیشی"رێككه‌وتنی به‌رهه‌م ساڵح و نێچیرڤان بارزانی، بووه هۆی ئه‌وه‌ی كه كاندیدی وه‌زیری دادی حكومه‌تی فیدراڵی یه‌كلایی بكرێته‌وه، بۆیه پارتی هیوای ئه‌وه‌ی هه‌یه به‌رێككه‌وتن له‌گه‌ڵ به‌رهه‌م ساڵح، پرسی به‌شداری یه‌كێتی له‌كابینه‌ی حكومه‌ت و پارێزگاری كه‌ركوك-یش یه‌كلایی بكاته‌وه".
به‌گوته‌ى سه‌رچاوه‌كه، ماڵی تاڵه‌بانیش پشتیوانی ئه‌وه‌ده‌كه‌ن، به‌رهه‌م ساڵح له‌م قۆناغه‌دا بێته پێشه‌وه‌و رۆڵى هه‌بێت له دانوستانه‌كان، له به‌رامبه‌ردا كۆسره‌ت ره‌سوڵ په‌راوێز بخرێت، چونكه ئه‌وه ئه‌و به‌رنامه‌یه‌یه كه بۆ كۆنگره‌ی داهاتووی یه‌كێتی دایانناوه.