06:12 - 17/04/2019
پارتی پرۆژەیەك بۆ یەكگرتنەوەی هێزەكانی پێشمەرگە ئامادەكات
فراكسیۆنی پارتی پرۆژەیەك بۆ یەكگرتنەوەی هێزەكانی پێشمەرگە ئامادەكات و هاوپەیمانانیش پێداگری لەسەر هەڵوەشاندنەوەی هێزەكانی 70 و 80 دەكەن.
بەپێی ئەو زانیاریانەی پەیسەرپرێس لەسەرچاوەیەكی ئاگادارەوە دەستی كەوتووە، هاوپەیمانی نێودەوڵەتی شەری دژی داعش لەئێستا هەوڵەكانی چركردۆتەوە بۆ هەڵوەشاندنەوەی هێزەكانی 70 و 80 و دروستكردنی یەك هێزی نیشتمانی.
سەرچاوەكەی پەیسەرپرێس دەڵێت، لەدوای روداوەكانی 16ی ئۆكتۆبەرەوە پارتی بەهەموو شێوەیەك یەكگرتنەوەی هێزەكانی پێشمەرگە یەكێتی و پارتی رەتدەكردەوە، بەڵام لەژێر فشاری هاوپەیمانی نێودەوڵەتی لەئێستادا فراكسیۆنەكەی راسپاردووە پرۆژەیاسایەك بۆ یەكگرتنەوەی هێزەكانی 70 و 80 ئامادە بكات.
سەرچاوەكەی پەیسەرپرێس دەڵێت، هاوپەیمانی نێودەوڵەتی سێ رێگان خستۆتە بەردەم یەكێتی و پارتی بۆ هەڵوەشاندنەوەی هێزەكانی 70 و 80 و ئەوان ئازادن لەو سێ رێگایە كامیان هەڵدەبژێرن، لەكاتی پابەند نەبوونی یەكێتی و پارتی بەهەڵوەشاندنەوەی هێزەكانی 70 و 80 ئه‌وا ئەمریكا هەموو هاوكاریە سەربازی و دارایی و لۆجستیەكانی دەوەستێنێت و راهێنەرە بیانیەكانیش دەرۆنەوە.
بەپێی زانیاریەكانی سەرچاوەكە، بەشێك لەو سەركردانەی یەكێتی كە خاوەنی هێزی تایبەتی خۆیانن نیگەرانن لەو هەنگاوە و پێیان وایە بۆ كەمكردنەوەی دەسەڵاتی ئەوانە.