04:12 - 10/04/2019
هۆكاره‌كانی واژۆ نه‌كردنی رێككەوتنی یەكێتی و پارتی
ئەگەرچی میدیاكانی یەكێتی و پارتی بڵاویانكردەوە كە ئەمرۆ یەكێتی و پارتی رێككەوتنەكەیان واژۆ دەكەن، بەڵام بەهۆی ئەوەی بزوتنەوەی گۆران نیگەرانە لەپێدانی یاریدەدەری سەرۆكی هەرێم بۆ كاروباری سەربازی رێككەوتنەكە دواخرا.
دوای له‌یه‌ك نزیكبوونه‌وه‌ی پارتی و یه‌كێتی و گه‌یشتن به رێككه‌وتن، بڕیاربوو دووشه‌ممه‌ی رابردوو پارتی و یه‌كێتی كۆببنه‌وه و رێككه‌وتنه‌كه‌یان واژوو بكه‌ن، به‌ڵام به فه‌رمانی مه‌سعود بارزانی سه‌رۆكی پارتی دیموكراتی كوردستان رێككه‌وتنه‌كه دواخرا.
پارتی به‌نیازی ئه‌وه‌یه سیغه‌یه‌كی نوێ بۆ رێككه‌وتنه‌كان بدۆزێته‌وه و بۆ ئه‌و مه‌به‌سته‌ش پێشتر داوای له گۆڕان كردبوو رازی بێت به دانانی یاریده‌ده‌ری سه‌رۆكی هه‌رێم و پێدانی ئه‌و پۆسته به یه‌كێتی به‌ڵام بزوتنه‌وه‌ی گۆڕان ئه‌و داوایه‌ی ره‌تكرده‌وه، به‌و هۆیه‌شه‌وه پارتی ئه‌مڕۆش ئیمزاكردنی رێككه‌وتنه‌كه‌ی دواخست.
به‌پێی زانیارییه‌كان په‌یسه‌ر جگه له نیگه‌رانییه‌كانی گۆڕان له رێككه‌وتنی یه‌كێتی و پارتی، بەشێك لەسەركردەكانی یەكێتیش به شێوازی رێككه‌وتنه‌كه نارازین و نیگه‌رانن و هەندێك لەسەركردەكانی پارتیش تێبینیان لەسەری هەیە و پێیان وایە پۆستی زیاتر لەحەجمی راستەقینە دراوە بەیەكێتی.
لای خۆشییه‌وه به‌شێك له سه‌ركرده باڵاكانی یه‌كێتی ئه‌وه‌یان راگه‌یاندووه و پێیان باش بووه جارێك رێككه‌وتنه‌كه‌ی نێوان یه‌كێتی و پارتی واژوو نه‌كرێت تا له‌گه‌ڵ بزوتنه‌وه‌ی گۆڕان ده‌گه‌نه رێككه‌وتنی كۆتایی.