08:48 - 12/06/2022
ده‌ستله‌كاركێشانه‌وه‌ی په‌رله‌مانتارانی سه‌در په‌سه‌ند كرا
موقتەدا سەدر، رێبەری رەوتی سەدر، داوای لە پەرلەمانتارانی ڕه‌وته‌كه‌ی
كرد دەستلەکارکێشانەوەی پێشکەشی سەرۆکی ئەنجومەنی نوێنەران بکەن و ده‌ستله‌كاركێشانه‌وه‌كه‌شیان
په‌سه‌ند كرا.
موقتەدا سەدر، ئه‌مڕۆ له‌نامه‌یه‌كدا
رایگه‌یاند: پێویستە سەرۆکی فراکسیۆنی سەدر لە ئەنجومەنی نوێنەرانی عێراق، حەسەن
عەزاری، دەستلەکارکێشانەوەکانی خۆی، ھەروەھا خوشک و برایان لە فراکسیۆنی سەدر،
پێشکەش بە سەرۆکی ئەنجومەنی نوێنەران بکات.
راشیگەیاندووە "لەبەرامبەر
ئەو ماوە کەمەی کە پێشکەشیان کردووە، سوپاسی پەرلەمانتارانی فراکسیۆنی رەوتی سەدر
دەکەم و خوای گەورە پاداشتی چاکەیان بداتەوە، ھەروەھا سوپاسی لایەنە
ھاوپەیمانییەکانمان لە ھاوپەیمانی رزگارکردنی نیشتمان دەکەم لە بەرامبەر ئەو
ھەڵوێستە نیشتمانییەی کە نیشانیانداوە".
ھەروەھا سه‌در، نوسیویه‌تی "سوپاسی جەعفەر سەدری ئامۆزامان دەکەم و بەردەوامبێت لە
سەرکەوتن کە پێشتر بەربژێری سەربەخۆمان بوو بۆ پۆستی سەرۆکوەزیران".
موقتەدا سەدر، ده‌ڵێت"ئەم ھەنگاوە، قوربانیدانی خۆمە، لە پێناو ئەوەی
نیشتمان و گەل لە چارەنووسێکی نادیار رزگار بکرێن، ھەروەک چۆن پێشتر لە پێناو
رزگارکردنی عێراق، سەروەریی، ئاسایش، یەکپارچەیی خاک و سەقامگیرییەکەی قوربانیمان
داوە".