08:20 - 28/03/2022
هیچ هیوایەک لەسەر هاوپەیمانێتییەکەی پارتی و پەیپەرە هاوبەشەکەی نەوەی نوێ؟
نیاز سه‌عید عه‌لی
لە درێژەی بەڕێوەبردنی ململانێ و کێشمەکێشەکانی ناو پەرلەمانی تازە هەڵبژێردراوی عێراق؛ لە نێوان دوو جەمسەری سەرەکی و ناکۆک؛ سەرەتا بۆ هەڵبژاردنی سەرۆکی پەرلەمان، دواتر بۆ هەڵبژاردنی سەرۆکی کۆمار، پاشان بۆ هەڵبژاردنی سەرۆک وەزیران؛ (پارتی) لە هەنگاوی یەکەمدا تاکڕەوانە سەرکێشی و دەستپێشخەرییەکی کرد و لەگەڵ (ڕەوتی سەدریی)دا، لەسەر ڕێککەوتننامەیەکی (٢٤) خاڵی پێکهاتن و لەگەڵ (هاوپەیمانیی پێشکەوتن)ی عەرەبی سووننە، لە یەکەم دانیشتنی پەرلەماند،ا بۆ هەڵبژاردنی سەرۆکی پەرلەمان؛ هەر سێ فراکسیۆنەکەیان پێکهاتن بۆ پاڵاوتنی (محەمەد حەلبوسی) بە سەرۆکی پەرلەمان، ئەوە بوو لەبەر نەبوونی ڕکابەرێکی بەهێز و خۆ ئامادەنەکردنی جەمسەری بەرامبەر، توانیان لە ناو کەشێکی ئاڵۆز و گرژ و لە تێکپرژانێکی ناو هۆڵی پەرلەماندا، پاڵێوراوەکەیان بەسەر (مەحمود مەشهەدانی)دا دەربچێنن .
ئاڵۆزبوونی پرۆسەی هەڵبژاردنی سەرۆک کۆمار
هەر سێ فراکسیۆن، لەچوارچێوەی خۆ ئامادەکردن بۆ هەڵبژاردنی سەرۆکی کۆمار و سەرۆکی حکومەت؛ لە هەنگاوی دووەمدا هاوپەیمانێتییەکیان ڕاگەیاند بە ناوی (هاوپەیمانیی سێ قۆڵیی)، پاش ئەوەی کە پێکهاتەی عەرەبی سووننە، هاوپەیمانێتییەکی فراوانتریان بە ناوی (هاوپەیمانیی سەروەری) ڕاگەیاندبوو، بەمجۆرە (هاوپەیمانیی سێ قۆڵیی)، لە دەرەنجامی ڕێککەوتنی فراکسیۆنی (ڕەوتی سەدریی) و (پارتی) و (هاوپەیمانیی سەروەری) پێکهات .
بۆ هەڵبژاردنی سەرۆکی کۆمار؛ دوو هەڵوێست و ئاراستەی جیاواز سەریهەڵدا، یەکێکیان بە سەرکردایەتی (هاوپەیمانیی سێ قۆڵیی)، کە کار بۆ ئەوە ئەکات ئامادەبوونی ڕێژەی یاسایی ئەندامانی پەرلەمان، بۆ سازدانی دانیشتنی هەڵبژاردنی سەرۆک کۆمار و سەرخستنی پاڵێوراوەکەیان مسۆگەر بکات؛ کە پاڵێوراوی (پارتی)ە، دووەمیشیان بە سەرکردایەتی (چوارچێوەی هەماهەنگی)ی شیعی، کە (یەکێتیی) هاوکار و پشتیوانیانە و کار بۆ ئەوە ئەکات؛ ڕێگریی بکات لە کۆکردنەوەی ڕێژەی یاسایی ئامادەبوونی ئەندامانی پەرلەمان و پەکخستنی ئەو دانیشتنە، تا لە دەرەنجامدا (هاوپەیمانیی سێ قۆڵیی)، ناچار و ئامادە بێت؛ بۆ سازان و پێکهاتنێکی فراوانتر، لە نێوان پێکهاتە و هێزە سەرەکیەکاندا .
هاوکات لە پێشهاتێکی پێشبینیکراو و چاوەڕوانکراویشدا؛ (فراکسیۆنی نەوەی نوێ)، لەچوارچێوەی (هاوپەیمانیی لە پێناوی خەڵک)دا؛ بڕیاریدا بچێتە پاڵ (هاوپەیمانیی سێ قۆڵیی)، کە هەنگاوێکی گرنگ بوو، بۆ پڕکردنەوەی ڕێژەی یاسایی ئەندامانی پەرلەمان، تاکو دانیشتنی تایبەت بە هەڵبژاردنی سەرۆک کۆمار؛ بە بەرژەوەندیی دەرچوواندنی پاڵێوراوەکەی (پارتی) یەکلاببێتەوە .
جێی ئاماژەیە، داشکانەوە و چوونە پاڵ (هاوپەیمانیی سێ قۆڵیی)، لەلایەن فراکسیۆنی (نەوەی نوێ)ەوە؛ بە دەستکەوتێکی گەورەی بە نرخ و بەها گران، بۆ (هاوپەیمانی سێ قۆڵیی) بەگشتی و (پارتی) بەتایبەتی لەقەڵەمئەدرێت !
بڕیاری ئامادەبوون لە دانیشتنی ڕۆژی (٢٦/٣/٢٠٢٢)ی پەرلەمانی عێراقدا، جیاوازترە لە ئامادەبوون لە دانیشتنە ئاساییەکانی تری پەرلەمان، چونکە لەم دانیشتنەدا؛ ئامادەبوونی پەرلەمانتار، هەر ئامادەبوون نیە بۆ دانیشتنێکی ئاسایی لە هۆڵی پەرلەمان، بەڵکو ئامادەبوونی پەرلەمانتار؛ لە پاشکۆی ئەو ڕێککەوتن و لە ناو پاکێجی ئەو سازان و سەودایانەدایە، کە لەپشتی پەردەوە سازدراوە؛ بۆ یەکلاییکردنەوەی ناکۆکیە سەرەکیەکە؛ ئەویش هەڵبژاردنی سەرۆک کۆمارێکی دڵخواز، کە پاڵێوراوی (هاوپەیمانیی سێ قۆڵیی)ە .
بەگوێرەی ئەم هاوکێشە سیاسیە و لەسەر بنەمای لێکەوتەکانی پەرەسەندنی ناکۆکیە سەرەکیەکە و دەرکەوتەی واقیعی ناو پرۆسەی سیاسی لە عێراق؛ ئەتوانین بڵێین ئاراستەی سێیەم، چ وەکو بێلایەن، یان چ وەکو ئاراستەیەکی تری جیاواز؛ لە ناو فراکسیۆنەکانی پەرلەمانی عێراقدا بوونی نیە، سەرجەم فراکسیۆنەکان و ئەگەر نەڵێم هەموو؛ ئەوا زۆرینەی پاڵێوراوە سەربەخۆکانیش؛ بەسەر دوو ئاراستە سەرەکیەکەدا دابەشبوون، لەم سۆنگەیەوە ئەتوانین بڵێین ئامانج و بەرژەوەندیی سیاسی قەوارە سیاسیەکان و میکانیزمی کاردانەوە و دەستتێوەردانی دەرەکی و لەبەرچاوگرتنی قازانج و دەستکەوت و بەرژەوەندیی مەتریالیی؛ ڕۆڵ و کاریگەریی هەبووە؛ لەسەر دروستبوونی ڕیزبەندیی و چوونە پاڵ دوو ئاراستە سەرەکیەکە .
ڕەهەندەکانی ناکۆکی لە ناو پەرلەمانی عێراق
چەندین ڕەهەندی ناوخۆیی و دەرەکی، لە ناو ململانێکانی پەرلەمانی عێراقدا هەیە، چەندین دەوڵەتی ئقلیمی و ناوەندی دەرەکی؛ ئەیانەوێت دیزاینی سیستەمی فەرمانڕەوایی عێراق؛ لەسەر پلان و نەخشەی ئەوان دابڕێژرێت، ئەم ویستە دەرەکیە، نەخش و کاریگەریی و شوێنەواری لەسەر ئاراستەی ناکۆکی و ململانێکە بەجێهێشتووە .
لەلایەکی تر لە ناو ڕەهەندە ناوخۆییەکاندا؛ ناکۆکی ناو ماڵی شیعی هەیە، ناکۆکی ناو ماڵی کوردی هەیە، ڕەهەندە دەرەکییەکانیش کاریگەریی لەسەر ڕەهەندە ناوخۆییەکان دروستکردوە، فراکسیۆنە کوردیەکان و عەرەبیە شیعیەکان و عەرەبیە سوونیەکان و توورکمانەکان و ئەوانی تریش؛ بەسەر دوو ئاراستە سەرەکیەکەدا دابەشبوون .
ئاراستەی ڕەنگاوڕەنگ !
ئەمە یەکەمین جارە لە مێژووی پەرلەمانی عێراقی دوای (٢٠٠٣)دا؛ ڕیزبەندییەکی تازە و جیاواز، لە ناو فراکسیۆنەکانی پەرلەماندا دروست ببێت؛ دوور لە بنەمای نەتەوەیی و ئایینیی و ئایینزایی، بە چەشنێک لە پێکهاتەی هەر ئاراستەیەک لە ناو دوو ئاراستە سەرەکیەکەدا؛ هێزی ڕەنگاوڕەنگی نەتەوەیی و سیکۆلار و ئایینیی و ئایینزایی جیاواز، بە ناکۆکی قووڵ و ناساڕێژ و جیاوازیی دید و جیهانبینی دژ بەیەک؛ پێکەوە سازاون و چوونەتە پاڵ یەکتری !
ئەم پێکەوە سازانە کراوەتە ئەلتەرناتیڤی پرانسیپی تەوافووقی دیموکراسی، لە نێوان سێ پێکهاتە سەرەکیەکەی عێراق؛ (عەرەبی شیعە، عەرەبی سووننە، کورد) کە لە
دوای ساڵی (٢٠٠٣)ەوە، لە ناو پرۆسەی سیاسی و پرۆسەی فەرمانڕەوایی عێراق و وردتر لە دابەشکردنی پۆستە باڵاکانی دەوڵەتی عێراقدا پەیڕەوکراوە، تاڕادەیەکیش لە داڕشتنی دەستووری نوێی عێراقدا ڕەنگی داوەتەوە .
ئەم وەرچەرخانە زیاتر پەیوەندی بە لێکترازانی ناو ماڵی کوردی و ناو ماڵی شیعیەوە هەیە؛ ئەویش بەهۆی تەشەنەسەندنی ناکۆکیەکانی ناو ئەو دوو ماڵە، بە هیچ شێوەیەک دەرەنجامی گەشەسەندن و کامڵبوونی دیموکراسی و گواستنەوە بۆ قۆناغی دوای چارەسەربوونی کێشە نەتەوەیی و ئایینیی و ئایینزاییەکان نیە، هەروەها بەرهەمی سەقامگیریی ئاشتی کۆمەڵایەتی و گونجان و پێکەوە ژیانی هاوبەشی پێکهاتە جیاوازەکان و چەسپاندنی کەلتووری لێکبووردن و مافەکانی مرۆڤ و دامەزراویی بنەماکانی سیکۆلاریزم و مەدەنیەت و پلورالیزم و ئارامییش نیە !
بە واتایەکی تر ئەم ڕیزبەندییە تازە ڕەنگاوڕەنگە، بەتایبەتی (هاوپەیمانیی سێ قۆڵیی)؛ لە ڕوواڵەتدا وێنەیەک بەرجەستە ئەکات، گوایە عێراق کێشە و ناکۆکی و ململانێی نەتەوەیی و ئایینیی و ئایینزایی تێپەڕاندوە، وەک ئەوەی عێراقی ئێستا وەرچەرخا بێت بۆ قۆناغێک؛ ئیتر هیچ هەڕەشە و مەترسیەک لە ئارادا نەمابێت و عێراق گەیشتبێتە کەناری ئارام و تیایدا متمانە و دڵنیایی لە نێوان پێکهاتەکان گەیشتبێتە ترۆپک، بۆیە ئێستا لە بەیاننامە و پەیام و ئەدەبیاتەکانیاندا ئاماژە بۆ بەرەنگاربوونەوەی دەمارگیریی تەسکی نەتەوەیی و ئایینیی و ئایینزایی و پاراستنی سەروەری و شکۆی دەوڵەتی عێراق و یەکێتیی خاکەکەی و بەهێزکردنی سوپاکەی ئەکەن، بە حەشدی شەعبیشەوە !
ڕۆڵی ڕەهەندی مەرجەعییەت
لە ناو ماڵی شیعیدا؛ ئەم لێکترازانە ڕەگی مێژوویی و فیقهی و سیاسی هەیە و ئەگەڕێتەوە بۆ ناکۆکی و ململانێ، لەسەر هەژموون و پێگەی مەرجەعییەتەکانی شیعە لە ناو کۆمەڵگەی شیعی عێراقدا .
لەم قۆناغەدا ئەتوانین بەشێوەیەکی سەرەکی؛ مەرجەعییەتەکان دابەش بکەین بۆ سێ جۆر مەرجەع، دووانیان سیاسی و فیقهی، یەکێکیان تەنها فیقهی، دوو جۆر مەرجەعییەتە فیقهی و سیاسیەکە بریتیین لە مەرجەعییەتی (ڕەوتی سەدریی)، کە لە ئێستادا (حیجەتولئیسلام سەید موقتەدا سەدر) ڕێبەرایەتی ئەو ڕەوتە ئەکات، دووەمیشیان مەرجەعییەتی ویلایەتی فەقێ؛ کە لە ئێستادا ڕابەری شۆڕشی ئیسلامی ئێران، (ئایەتووڵڵای باڵا سەید عەلی خامەنەئی) ڕێبەرایەتی ئەکات، مەرجەعییەتە فیقهی و نا سیاسیەکەش بریتیە لە مەرجەعییەتی نەجەف؛ کە لە ئێستادا (ئایەتوڵڵای باڵا سەید عەلی سیستانی) و دوو ئایەتووڵڵای تر بە ناوەکانی (شێخ بەشیر نەجەفی و شێخ محەمەد ئیسحاق فەیاز) ڕێبەرایەتی ئەکەن .
شایەنی باسە مەرجەعییەتی نەجەف؛ بە ئاشکرا و ڕاستەوخۆ دەستوەرناداتە ناو کاروباری سیاسی و بەردەوام بێبەریبوونی خۆی؛ لە مەرجەعییەتی هەموو پارت و ڕێکخراوێکی سیاسی ڕاگەیاندووە، لەبەرئەوە هێزی سیاسی و لیستی هەڵبژاردن و پاڵێوراوی تایبەت بە خۆی نیە و بەهۆیەوە ئەم مەرجەعییەتە؛ نەبووەتە ئاراستەیەکی سەرەکی، لە ناو ناکۆکی و ململانێ سیاسیەکانی ناو ماڵی شیعیدا .
لە بەرامبەردا زۆرینەی ڕەهای هێزەکانی ئیسلامی سیاسی ئایینزای شیعە؛ بەشێوەیەکی سەرەکی و بنەڕەتی، بەسەر ئەو دوو مەرجەعییەتەی تردا دابەشبوون، (ڕەوتی سەدریی) بە تەنها لە ئاراستەیەکدا و زۆرینەی ڕەهای هێزەکانی تری ڕەوتی ئیسلامی سیاسی ئایینزای شیعەش؛ لە ئاراستەیەکی تردا کۆبوونەتەوە .
لێکترازاویی ماڵی کوردی !
بەهۆی تەشەنەسەندنی کێشە و قەیران و ناکۆکی و ململانێ سیاسیەکان؛ چ مێژووییەکان، چ هەنووکەییەکان، ماڵی کوردی لێکترازاوە بۆ دوو هێزی سەرەکی و چەندین هێزی تر لە دەرەوەی دوو هێزەکە .
ناکۆکی و ململانێ لەسەر پۆستی سەرۆک کۆمار؛ یەکێکە لە ناکۆکیەکانی نێوان (یەکێتیی) و (پارتی)، ئەگەڕێتەوە بۆ خولی پێشووی پەرلەمانی عێراق لە ساڵی (٢٠١٨)دا، پاش ئەوەی (پارتی) جیاوازتر لە خولەکانی پێشووی پەرلەمان، دوور لە کۆدەنگیی ماڵی کوردی، دەستپێشخەریی کرد و (د.فواد حسێن)ی پاڵاوت بۆ پۆستی سەرۆک کۆمار، بەڵام شکستی هێنا لە بەرامبەر پاڵێوراوی (یەکێتیی) .
لەم خولەدا (پارتی) و (یەکێتیی)؛ هەموو هەوڵ و کۆشش و گووشار و فشار و توانایەکی خۆیان خستۆتەگەڕ، بۆ بەدەستهێنانی پۆستی سەرۆک کۆمار، هەر لایەک بۆ ئامانجی جیاوازی خۆی، (پارتی) لەلایەک بۆ دەستشکاندنەوەی (یەکێتیی) و قەرەبووکردنەوەی شکستی جاری پێشوویان لە (٢٠١٨)دا، لەلایەکی تریش بۆ ئەوەی ترس و نیگەرانی خۆیان؛ لە مەترسی و هەڕەشەکانی ئاراستەی دووەمی ناو ماڵی شیعی بڕەوێننەوە، ئەویش بە مسۆگەرکردنی پێگەیەکی بەهێز لە ناو حکومەتی تازەدا و بەشدارییکردن لە گۆڕینی هاوسەنگیی هێز لە نێوان دوو ئاراستەکەی ماڵی شیعیدا؛ بە بەرژەوەندی ئاراستەی (ڕەوتی سەدریی) .
ئەرکی (پارتی) !
ڕەواندنەوەی ترس و نیگەرانی ئاراستەی (چوارچێوەی هەماهەنگی)ی شیعی، لەسەر خودی (پارتی) و بەرژەوەندییە تایبەتیەکانیان؛ بەتایبەتی کە ئەو ئاراستەیە، خاوەنی زۆرینەی هێزەکانی (حەشدی شەعبی)ن، بووەتە ئامانجی ستراتیژیی لای (پارتی)، لە بەرامبەردا سەرۆکایەتی ئەو پارتە؛ سازانێکی ناهاوسەنگی دوور لە ناوەرۆکێکی نەتەوەیی و دیموکراسی، لەگەڵ ئاراستەی (ڕەوتی سەدریی)دا کردووە؛ وەک ئەوەی بە گووشار و بە زەبر، ڕێککەوتن و هاوپەیمانێتییەکەی بەسەردا سەپێنرابێت، لە دژی ئاراستەکەی تری ناو ماڵی شیعی، کە (پارتی) بە نەیار و دوژمنی خۆی ئەزانێت، بەتایبەتی دوای گەیشتنی پەیامی شاراوەی هەڕەشە ئامێز، لەڕێگەی درۆن و ڕۆکێتە هاوێژراوەکانی سەر هەولێر؛ لە ماوەکانی ڕابردوودا !
(پارتی) لەم قۆناغەدا؛ ململانێ لە پێناوی مانەوە و ڕەواندنەوەی هەڕەشە و مەترسیەکانی سەر خودی خۆی ئەکات؛ چی پێویست بێت بۆ بەرگریکردن لە (پارتی) و بەرژەوەندییەکانیان؛ ڕەوایی پێ ئەدەن، هەر هەنگاوێکیش خزمەتی ئەو سیاسەتەیان بکات، بێ سڵکردنەوە ئەیگرنەبەر و پاساو و تیۆریزەی بۆ ئەکەن، بۆیە (پارتی) لە (ڕەوتی سەدریی)؛ پەرۆشتر و پڕکێشترە بۆ هەوڵدان و کارکردن، لە پێناوی سەرخستنی (ڕەوتی سەدریی)؛ بەسەر (چوارچێوەی هەماهەنگی)دا .
ئەگەر شیکردنەوە و هەڵسەنگاندن، بۆ ناوەرۆکی دەقی ڕیککەوتننامەی نێوان (ڕەوتی سەدریی) و (پارتی) بکەین، هەروەها هەڵسەنگاندن بۆ دید و جیهانبینی و هەڵوێستی ئەو دوو هێزە عەرەبیەی ناو (هاوپەیمانیی سێ قۆڵیی) بکەین؛ ئەگەینە ئەو دەرەنجامەی کە لە ئەدەبیات و پەیام و هەڵوێست و سیاسەتی ئەو دوو هێزە عەرەبیەی هاوپەیمانی (پارتی)دا؛ نەک هیچ ئاماژەیەک بۆ ئامانج و بەرژەوەندییە نەتەوەییە باڵاکانی هەرێمی کوردستان نەکراوە، بەڵکو ئامانج و بەرژەوەندییە نەتەوەییەکان؛ بە ناڕاستەوخۆ و بە شاراوەیی کراونەتە ئامانج بۆ دژایەتییکردن، بە دیوێکی تردا کراونەتە قوربانیی بۆ پاراستنی بەرژەوەندییە سیاسی و ئابووریەکانی (پارتی) .
پەیپەرەکەی (نەوەی نوێ)
سەرۆکایەتی (نەوەی نوێ)، بۆ چوونە پاڵ ئاراستەی (هاوپەیمانی سێ قۆڵیی) و بۆ بەشداریکردن؛ لە پڕکردنەوەی ڕێژەی یاسایی دانیشتنی تایبەت بە هەڵبژاردنی سەرۆکی کۆمار؛ لەچوارجێوەی (هاوپەیمانیی لەپێناوی خەڵک)؛ پەیپەرێکی سەرڕێژی ڕازاوەیان بە داواکاریی قوورس و پڕ ئاستەنگ، بە چەند ئیمزایەکەوە بڵاوکردۆتەوە و کردویانەتە پاساو بۆ چوونە پاڵ ئەو ئاراستەیە .
سەرۆکایەتی (نەوەی نوێ)؛ لەڕێگەی هاوپەیمانێتییەکەیانەوە، بەم پەیپەرە ئەیانەوێت ئەو پەیامە پەخش بکەن؛ کە ئەوان لە پێناوی بەرژەوەندیەکانی خەڵکی کوردستان و عێراقدا؛ (هاوپەیمانی سێ قۆڵیی)یان ناچارکردوە، کە بەڵێن بدات هەموو ئەو داواکارییانە جێبەجێبکات .
سەرۆکایەتی (نەوەی نوێ) بەدیاریکراویی؛ بەم پەیپەرە کە گوایە حکومەتی تازەی عێراق، کار بۆ جێبەجێکردنی ئەکات؛ بە ناڕاستەخۆ (پارتی)ی بێبەریی کردووە لە بەرپرسیارێتی بەشێک لە کێشە و گرفت و قەیرانەکانی هەرێمی کوردستان و عێراق، هەروەها جێبەجێکردنی هیچ داواکارییەکی ئاراستەی (پارتی) و (حکومەتی هەرێم) نەکردوە !
لەبەرئەوەی بەشدارییکردنەکەیان لەو دانیشتنەدا بە پلەی یەکەم بە بەرژەوەندیی (پارتی) ئەگەڕێتەوە، ئەگەر سەرۆکایەتی (نەوەی نوێ)؛ ئەوەندە جدیی و بە خەم و بە پەرۆشە، بۆ چارەسەری کێشەکانی خەڵکی کوردستان؛ ئەبوو سەرەتا ڕێککەوتننامەی دوو قۆڵیی لەگەڵ (پارتی) بکردایە و پابەندی بکردایە؛ بە جێبەجێکردنی چەندین داواکاریی، بۆ چارەسەری کێشەکانی خەڵک لە هەرێمی کوردستاندا .
ئەمە لەلایەک، لەلایەکی تر ئیمزاکانی سەر ئەو پەیپەرە، هیچ خەسڵەت و بەهایەکی یاسایی و پرۆتۆکۆلی و سیاسی و بەڵگەنامەیی نیە، پێویست بوو لەبری پەیپەری تەنها یەک لایەن؛ ڕێککەوتننامەیەکی پرۆتۆکۆلیی هاوبەش دابڕێژرایە و ناوی لایەنە بەشداربووەکان و ناوی بەرپرسی یەکەمی لایەنەکان و ئیمزاکانیانی لەسەر بووایە، هەروەها ماوە دیاریبکرایە بۆ جێبەجێکردنی خاڵەکان و لە خاڵی کۆتاییشدا، بەڵێن و ئاماژە بە پابەندبوون بە جێبەجێکردنی ڕێککەوتننامەکە بکرایە .
سەیر لەوەدایە ئەوەندە بە پەلەپروزێ ئیمزاکان کراوە، لەسەر هەردوو لاپەڕەکە ئیمزایان کردوە، لەکاتێکدا لەڕووی پرۆتۆکۆڵیەوە، ئەبوو تەنها لە کۆتایی پەیپەرەکەدا ئیمزاکان بکرایە، لەوەش سەیرتر یەکێک لە ئیمزاکەران لەپەلەپەلیدا؛ لە لاپەڕەی یەکەم ناوی خۆی بە (علاء كامل جبار) نووسیوە، کەچی لە لاپەڕەی دووەمدا؛ ناوی خۆی بە (علاء كامل الركابي) نووسیوە !
لە کۆتایشدا لە سەرۆکایەتغی (نەوەی نوێ) ئەپرسم؛ بۆچی (ڕەوتی سەدریی)، ئیمزا لەسەر پەیپەرەکەتان بکات و هیچ تێبینییەکی نەبێت لەسەر ئەو هەموو داواکارییە گەورانە؟
ئەی پشکی (ڕەوتی سەدریی) و (هاوپەیمانیی سەروەری)ی عەرەبی سووننە چیە لەو پەیپەرەدا، هیچ خاڵێک هەیە بەدیاریکراویی داواکاریی ئەوان بووبێت ؟
ئەی بۆ ئیمزاکەران ئامادە نەبوون بە یەک دێڕ، بەتایبەتی (حەسەن عەزاری)ی سەرۆکی فراکسیۆنی (ڕەوتی سەدریی)، لە پەراوێزی پەیپەرەکەدا بنووسێت؛ (ئێمە وەکو ڕەوتی سەدریی؛ بەڵێن ئەدەین هەموو داواکارییەکانی ناو ئەم پەیپەرە جێبەجێئەکەین لە حکومەتی تازەدا) ؟
پرسیار و ڕەخنە و تێبینی زۆرە لەسەر ئەو پەیپەرە و ئیمزاکانی سەری، بەڵام یەک پرسیاری تر بە گرنگ ئەزانم؛ ئاراستەی سەرۆکایەتی (نەوەی نوێ)ی بکەم، ئەویش ئەوەیە (ڕەوتی سەدریی) لە ڕێککەوتنی لەگەڵ (پارتی)دا؛ کەمترین دەرفەت و ڕووبەری تەرخانکردووە بۆ داواکاریی (پارتی) و بەرژەوەندیە نەتەوەییە باڵاکانی هەرێمی کوردستان، ئیتر چۆن ئامادە ئەبێت پەیپەرەکەی ئێوە بکاتە سەرمەشقی بەرنامەی کار، بۆ حکومەتی تازەی عێراق؛ ئیتر ئێوە چۆن ئەتوانن ئیمزاکانی سەر ئەو پەیپەرە بکەن بە پاساو و ڕاگوزەر؛ بۆ بەشدارییکردنتان لە پڕکردنەوەی ڕێژەی یاسایی ئەندامانی پەرلەمان؛ بۆ ئامانجی دەرچواندنی پاڵێوراوەکەی (پارتی) !