12:40 - 29/12/2020

یەكێتی و پارتی؛ شەراكەتی حكومەت و دوژمنایەتی میدیا‌

پەیسەر

لە خۆپیشاندانەكانی ئەم دواییانەی كوردستاندا سەرۆكایەتی پارتی و سەرۆكایەتی هەرێم بەجیاواز پێشوازییان لە كادرێكی پارتی كرد كە لەلایەن خۆپیشاندەرانەوە لێی درا، پێشوازییان لە خانەوادەی ئەو پێشمەرگەیەش كرد كە نێو بارەگای پارتی كوژرا، بەڵام لەبارەی گیان لەدەستدانی 8 هاوڵاتییەوە هیچیان نەگوت و نەكرد، دوای ئەوەش لاهووری شێخ جەنگییان بە تەقەكردن لە خۆپیشاندەران تاوانباركرد، میدیاكانی یەكێتیش دەستیان بۆ تەوەرێك دەبرد كە دەماری پارتی دەگرت ، ئەوانیش شكستی كابینەی نۆیەم و دەست بەسەردا گرتنی سەروەت و سامانی كوردستانە لە لایەن پارتییەوە. گەرچی بەفەرمی شەڕی نێوان ئەو دوو حیزبە ڕاگیراوە بەڵام لە میدیا سێبەر و ناڕاستەوخۆكانەوە بەردەوامی هەیە، ئەوەی نەشێت و نەكرێت بەیەكی دەكەن و بەردەوام فوو لە گەشكردنەوەی ئاگری ئەو شەڕە دەكەن كە تەنها دوژمنان قازانجی لێدەكەن و خەڵكی كوردستانیش زیان...

شەڕ چییە؟
شەڕ چییە جگە لە ڕەوایەتی تەواو بەخۆدان و بەرامبەر بە ناڕەوا وێناكردن؟ لە پاشخانی هیچ شەڕێكی واقیعی و فیزیكیشدا جەنگ پێشینەیەكی هەبووە و بە سرتەو ورتە دەستیپێكردووە، هەركات گەشتبێتە جنێوو سوكایەتی و ناووناتۆرە ئیتر كارلە كار ترازاوە و هەر ئەوەی ویستووە لە شوێنێكەوە گڕ لە پووشەكە بەرببێت.

هۆكارەكانی جەنگ:
ئەوەی كە لە نێو مێژووی شەڕەكاندا ڕوویانداوە هەمان شتە، یەكێك لە هۆكارەكانی جەنگی نێوان فەرەنسا و جەزائیر ڕووداوی باوەشێنەكەی(دای حسین)ە كە كێشاویەتی بە بیار دۆفالی كۆنوسوڵی فەرەنسا لە رۆژی جەژنی ڕەمەزانی ساڵی 1827 و بووە هۆی ئەوەی كە جەزائیر بۆ ماوەی 132 ساڵ لەو وڵاتەدا بمێنێتەوە، بەڵام ڕووە ڕاستەقینەكەی دواخستنی دانەوەی قەرزەكانی فەرەنسا بووە لە لایەن جەزائیرییەكانەوە، لە ساڵی 1887 یش دا لە جەزیرەی ماڵتادا دەنگەدەنگێك لە نێوان كارمەندانی بەریتانی و میسردیا ڕوویدا و بووە هۆی ئەوەی شەڕێكی قورس لە نێوان هەردوو وڵاتدا بەرپا ببێت. لەساڵی 1838 یش دا لەسەر دووكانێكی شیرینی لە نێوان فەرەنساو مەكسیك دا ڕوویدا.

بەشێك لە گەڕەكانی شەڕی ناوخۆی ئەفغانستانیش لە كۆتایی هەشتاكان و نەوەدەكانی سەدەی ڕابوردوودا لەسەر داواكردنی كچێك بووە بۆ هاوسەرگیریی كەچی باوكی كچەكە گوتوویەتی دەبێت بزانم ئێوە چۆن دەزانن من كچم هەیەو و وەختی شوویەتی؟ یان لەسەر شتی وا ڕوویداوە كە ڕووی ئەوەی نییە ئێوەی بەڕێز بیخوێننەوە.

لەسەر قازێك:
لەباشووری كودستانیش شەڕەكان ئەوەند زۆرن و هۆكارەكان ئەوەندە سادەن كە مرۆڤ لە ئاستیاندا واقی وڕدەمێنێت، پێتان سەیر نەبێت كە لەسەر خاوەندارێتی چەند دووكانێكی تەجاوز گەڕێكی شەڕی ناوخۆ هەڵگیرسابێت و تەنانەت وەك دەگوترێت دەستپێكی یەكێك لە شەڕەكانی ناوەڕاستی نەوەدەكان لەسە ر(قاز)ێك بووبێت.

تەقینی دومەڵ:
هەموو ئەوانە ئەو ڕاستییە نیشان نادەن كە خەڵك دەیزانێت، بەڵكو ئەوانە وەك نووكی ئەو نەشتەرە وایە كە بەر دوومەڵێكی پڕ لە كیم و جەراعەت و پیسی دەكەوێت و دواتر بەو هۆیەوە دەتەقێت.

ئەوەی كە ئامانجی ئەم ڕاپۆرتەیە خستنە ڕووی دیاردەیەكی مەترسیداری نێوان هەردوو هێزی دەسەڵاتداری هەرێمی كوردستانە، دوو هێزی خاوەن مێژووی شەڕو شۆڕی خوێناویی، خاوەن ژمارەیەكی زۆر چەكدار، خاوەنی كۆمەڵە كەسانێك كە ناچاویان هەیە ببینێت و نە گوێیان هەیە ببیستێت و نە خاوەنی ژیرییەكن هەڵسەنگاندنی بێلایەنانەی بۆ بكەن، بەڵكو ئەوەی كە هەیەنا پابەندی تەواو و گوێڕایەڵی كوێرانەو پشتیوانی بێ چەند و چوونی حیزبەكانیانە.

ئایا شەڕ كۆتایی هاتووە؟
گەرچی لەنێوان پارتی دیموكراتی كوردستان و یەكێتی نیشتیمانی كوردستان دا (ڕیككەوتننامەی ستراتیژیی)ی هەیە، بەڵام جگە لە قسەو هەندێك لە بڕگەو بابەتەكانی ئەو ڕێككەوتنە لەناو میدیادا سەرلەبەری ڕێككەوتنەكەی نادیارو شاراوەیەو لەوانەیە تەنها ژمارەیەكی كەم بزانن بڕگەو بابەتەكانی ئەو ڕێككەوتنە چییە.

هەرچۆنێك بێت دوای تێكەڵكردنەوەی دوو ئیدارەیی كە لە ئەنجامی شەڕی ناوخۆوە دروست بوو، بەڵام لە 2003 بەدواوە دۆخەكە بەرەو ئارامتر رۆشت، بەڵام هەتا ئێستاش دوو ئیدارەیی بەردەوامە، لە بێریی سەربازەكانی 70 و 80 ەوە بیگرە تا دەگاتە دوو ئاسایش و دوو پۆلیس و دووئاژانسی هەواڵگریی و هەموو دووەكانی دیكە، تەنانەت بە دانانی پیت و نهێنی سەر نوسراوی دۆسیەی پێشمەرگە شەهیدەكانیش جیاكراونەتەوە كامەیان یەكێتییەوە كامەی تریان پارتییە و ئەوانی تریشیان سەر بە كام حیزبە كوردستانییە.

لێگەڕێین..
یەكێتی و پارتی بە هەر هۆكارێك بێت پێكهێنەری  سەرەكی حكومەتن لە 1992 ەوە تا ئێستا، هەردووكیان كوردستانیان وەك كێك دابەشكردووە ئەوەی شەڕی لەسەردەكرێت كامیان بەشە زۆرترەكەی بەردەكەوێت، وردە حیزبەكانیش بەر كام پشكەیان دەكەوێت، یان چۆن دەتوانن بیانخەن بەلایەكدا، هەرچۆنێك بێت ئەوان شەریكە حكومەتن، بەڵام وەك خۆیان دەڵێن هیچیان توانای ئاڵوگۆڕی فەرمانبەرێكیان نییە لە ژێر دەسەڵاتی ئەوی تردا، یان بە تەعبیرەكەی خۆیان (توانای دامەزراندنی فەڕاشێكیان نییە). ئەو هەموو ساڵەی كە یەكێتی جێگرایەتی سەرۆكی هەرێم و سەرۆكی حكومەتی هەبوو، یەك واژۆیان نەچووە سەر بڕیارێكی چارەنووس ساز..

كاری حیزبی:
كەواتە ئەوەی كە هەیە ڕووكەشی دۆخەكەیە، ئەوان بە ڕوواڵەت شەریكی حكومەت و پەرلەمانن، بەڵام لە پەیوەندییە حیزبییەكان و میدیا و سۆشیاڵ میدیادا پێچەوانەكەیەتی و ڕووە ڕاستەقینەكەی نێوان ئەو دوو حیزبەیە، تەنانەت تا ئێستاش سەركردایەتی پارتی ئامادەنەبووە بچێتە كۆبوونەوەیەكەوە كە لاهووری شێخ جەنگی هاوسەرۆكی یەكێتی تێدابێت و نەك هەر ئەوە پیرۆزبایی بەستن و كۆتایی كۆنگرەكەشی لێنەكردوون.

دوو ڕوو..:
 ئەوان لەكۆبوونەوەكاندا بەڕووی كامێراكاندا پێدەكەنن، كەچی لە پشتەوە لەشكرێك جنێوفرۆش و بوختانچی و هەواڵدزو ڕاپۆرتنوسیان بەرداوەتە گیانی یەكتریی، لەداوی فراوانبوونی سۆشیاڵ میدیا ئەو دۆخە زیاتر تەشەنەی كردووە. تەنانەت میدیا زەبەلاحەكانیشیان خستووەتە خزمەتی ئەو پرۆسەیەوە هەربۆ نموونە: جوان پیشاندانی ناوچەیەك و ناشیرین پیشاندانی ناوچەیەكی دیكە، وەك ئەوەی -ڕووداو- لە ڕووماڵی كۆرۆنادا دەیگوت: 16 كەس لە سلێمانی بە كۆرۆنا مردن و 42 كەسیش لە هەولێر چاكبوونەوە!

31 ئاب و 16 ئۆكتۆبەر:
سەرەداوێك بۆمیدیا سێبەرەكانی هەردوولا بەسە بۆ ئەوەی ئەوەی بشێت و نشێت بە یەكی بڵێن، ئەوەی كە هەیە تا ئێستاش میدیا سێبەرەكانی یەكێتی هەر باسی 31 ئابی 1996 دەكەن و میدیا سێبەرەكانی پارتیش تایتڵ و مانشێتی رۆژانەیان (تاقمە خۆفرۆشەكەی 16 ئۆكتبەرە).

مامەڵەكردن بە دوو ڕبەی جیاواز:
دوای ئەوەی خۆپیشاندانەكانی سەرەتای ئەم مانگە لە بەشێك لە قەزاو ناحیەكانی ژێر دەسەڵاتی یەكێتی دروست بوو، چەند دیمەنێكی سەیر لەو دۆخەدا هاتنە پێشەوە، كادرێكی پارتی دیموكراتی كوردستان لەناوچەی سەیدسادق  تاتوانی بەرەو ڕووی خۆپیشاندەران وەستایەوە، بەڵام كەوتە بەر هێرشی خۆپیشاندەران، چەند كەسێك لەبەردەم ئەو بارەگایەدا بریندار بوو، بەڵام سەرۆكی پارتی و سەرۆكایەتی هەرێم تەنها پێشوازییان لەو كادرە كردو كوژراو بریندارەكان فەرامۆش كران، پێشوازی لە خانەوادەی پێشمەرگەی كوژراوەكەی پێنجوێن كرا، بەڵام كوژراو بریندارەكان فەرامۆش كران.

سەردانەكانی لاهور شێخ جەنگی:
لەبەرامبەر ئەوەدا میدیا سێبەرەكانی پارتی كەوتنە هێرشی بەرفراوان و هێنانی قسەی بەرپرسانی جۆراوجۆری حیزبی و تەنانەت حكومی و پەرلەمانیش كە دەڵێن تەقەكردن لە خۆپیشاندەران بە فەرمانی هاوسەرۆكی یەكێتی لاهووری شێخ جەنگی بووەو لەو میانەیەشدا چییان پێكرابێت درێغییان نەكردووە، ئەوەش لە كاتێكدا سەری هەڵدا كە لە رۆژانی ڕابوردوودا لاهوری شێخ جەنگی سەردانی كوژراو و بریندارەكانی خۆپیشاندانەكانی كردو لە نزیكەوە بەشداریی پرسەكانی كردن.

چی دەگوزەرێت؟
بۆ ئەوەی لای خوێنەر وێنەكە بەڕوونی ببینێت هەندێك لەو قسانە دەگوازیینەوە:

حیكمەت محەمەد، ئەندامی فراكسیۆنی پارتی لە پەرلەمانی كوردستان و ئەندامی لیژنەی لێكۆڵینەوە لە ڕووداوەكانی سلێمانی بە میدیاکانی پارتی راگەیاندووە، "بەپێی بەدواداچوونی لیژنەکەمان لەبارەی خۆپیشاندانەكانی سلێمانی و دەورووبەری، دەركەوت گرووپێكی چه‌كداری سه‌ر به‌ لاهوور جه‌نگی تەقەیان لە خۆپیشاندەران كردووە و خەڵكیان شەهید كردووە."

ئاماژەی بەوەش کردووە، "خەڵكی لەم بارەیەوە بەڵگەیان لەبەر دەستە كە چۆن بە شەو خەڵك كوژراون و بە ڕۆژیش بۆیان گریاون."

دەستنوێژ شكان:
بۆ وەڵامدانەوەی ئەو قسانەی پەرلەمانتارەكەی پارتی حاجی مەسیفی ، ئەندامی سەركردایەتیی یەكێتیی نیشتمانیی كوردستان، ده‌ڵێت:" حیكمەت محەمەد پێدەچێت جەنابت یان زۆر كۆڵەوار بیت لە مێژوو یان حەزت لە چەواشەكارییە و یان ڕایان سپاردووی كە بەو شێوە ناشیرین ونائەدەبیە بدوێیت كورد دەڵێت (ڕووبار بەدەمی سەگ پیس نابێت ) منیش با پێت بڵێم كاكە شێخ لاهور بەتۆ و ئاغاو ئەزبەنیەكانت بچووك نابێتەوە كاكە شێخ لاهور هەڵقولاوی ناو جەماوەرەو جەماوەر پشتیوانی دەكات كاكە شێخ بەرگری لەمافی خەڵك دەكات خەڵك ناكوژێت".

وتیشى:"حیكمەتی بێ حیكمەت پیاو كوژ ئەوانە بوون كە ماڵ و مناڵی خاڵەكانی خۆیان زیندە بەچاڵ كرد ، پیاو كوژ ئەوانەن كە لە مەسیف لەناو ماڵی خۆیان پێشمەرگەكانی كۆمێتەی مەسیفیان لە دار بەستەوە و گولـلە بارانیان كرد".
له‌ كۆتایى ڕوونكردنه‌وه‌كه‌یدا ده‌ڵێت" دیسان پێت دەڵێم كە خۆت ناوت حیكمەتە ئەوجارە كە قسەت كرد بە حەكیمانە قسە بكەو دەست نوێژ هەڵگرتنەكەشت لەبیر نەچێت".

لەگەڵ شوان گۆشت خواردن و لەگەڵ مەڕ شین كردن:
لە ڕووە حیزبیەكەشە وە بڵند اسماعیل، ئه‌ندامى سه‌ركردایه‌تیی پارتى به‌ (باسنیوز)ى ڕاگه‌یاندووە: ”خه‌ڵكى كوردستان چاك ده‌زانن له‌و شوێنانەی خۆپیشاندان و توندوتیژی ڕووی دا، پارتى ده‌سه‌ڵاتدار نییه‌،  بۆ هه‌مووان ڕوونه‌ لاهوور و  تاقمه‌كه‌ى بۆ بەلاڕێداربردنى خۆپیشانده‌ران و دروستكردنى ئاژاوه‌، خه‌ڵكى ئاژه‌وه‌چى و چه‌كداریان ناردۆتە نێو خۆپیشاندەران و تەقە لە خەڵكی كراوە، ئەگینا داوای ڕەوای خەڵكی چ پەیوەندی بە بارەگا سوتاندنەوە هەیە؟“.

ڕوونیشی كردەوە: ”هەموو ئەوانەی لە سنوورەكە كوژران، ئۆباڵی كوژرانیان لە ئەستۆی هێزی باڵادەستی سنوورەكەیە كە دیارە لاهوور جەنگی و هاوشێوەكانی هێزی باڵادەستن و تەحەكوم بە پۆلیس و ئاسایش و تەنانەت دادگاكانیش دەكەن، بۆیە خوێنی هەموان لە ئەستۆی لاهوورە“.
ئەندامەكەی سەركردایەتیی پارتی دەڵێت”كەسوكاری قوربانییەكانیش دەزانن ئەوەی لاهوور دەیكات، ئەوەیە لەگەڵ گورگ گۆشت دەخوات و لەگەڵ شوانیش شین دەگێڕێت“.

بڵند ئیسماعیل پێیوایە ”باشتره‌ لاهوور و تاقمه‌كه‌ى په‌نجه‌ى تۆمه‌ت له‌ هیچ كارێكى ناڕه‌واى سنوورەكەیان و مەرزەكان و نەوتی سنوورەكەشیان و تەنانەت سەرانەوەرگرتن و دەستدرێژیكردنە سەر خەڵك، نەخەنە ئەستۆی حكوومەتی هەرێمی كوردستان، چونكه‌ حكوومەتی هەرێمی كوردستان بە تەواوی ستافەكەیەوە ته‌نها له‌ خه‌مى چاره‌سه‌ركردنی كێشه‌ى خه‌ڵك و پاراستنى ئاسایش و سه‌ر و ماڵى خه‌ڵكى كوردستانن، جەماوەریش چاك ده‌زانن لاهوور و تاقمه‌كه‌ى هه‌میشه‌ خه‌ریكى دژایه‌تیی قه‌واره‌ى هه‌رێمی كوردستان و تێكدانى ئارامیى كۆمه‌ڵایه‌تیى كوردستانن“.

شێخ لاهوور ئاگای لە تاڵانی نەوت نییە:
لەبەرامبەردا سەركۆ ئازاد گەڵاڵی، ئەندامی پەرلەمانی كوردستان ده‌ڵێت: "هیچ كاتێك یەكێتی و لاهور شێخ جەنگی، هاوسەرۆكی یەكێتی ئاگاداری بەتاڵانكردنی نەوت نەبوون، بەڵام بۆیە چاوەكان لەسەر لاهور شێخ جەنگین چونكە داوا دەكات حكومەتی هەرێم بەجدی بێتە سەر خەت بۆ ڕادەست كردنی نەوت بە عێراق، لە پێناو باشتركردنی گوزەرانی ژیانی خەڵك و بەدیهێنانی داوا ڕەواكانیان".

وتیشی:"داواكارییەكانی هاوسەرۆكی یەكێتی بۆ راچەڵەكاندنی حكومەتە تا ناڕەزایەتییەكانی خەڵك بەهەند وەربگیرێت، ئەوەش بۆتە هۆی ئەوەی لەلایەن ئەندامانی پارتیەوە هه‌ڵمه‌تی راگەیاندن دژی هاوسەرۆكی یەكێتی بەڕێوە بچێت، پێیان قبوڵنەكرێت چونكە دەزانن لاهور شێخ جەنگی لەبەرەی خەڵكەو تاوانیشی ئەوەیە كە لەخەمی خەڵكدایە".
هێمایى بۆ ئه‌وه‌شكرد كه‌" خاڵە سنورییەكان و مەلەفی نەوت بەدەست ئەنجومەنی وەزیران و وەزارەتی داراییه‌وەن و هەموو خەڵكیش دەزانێت مەلەفی نەوت لای حكومەتە، سەرۆكی حكومەتیش مەسرور بارزانی یە، ئەوەش روونە هەر ئەوان دزی و قاچاخچێتی و تاڵانی پێوە دەكەن نەك لاهور شێخ جەنگی".

شێخی خاكفرۆش:
ئەندامێكی فراكسیۆنی پارتی دیموكراتی كوردستان لە پەرلەمانی كوردستان وەڵامی پەرلەمانتارێكی سەر بە تاقمی خۆفرۆشی ١٦ی ئۆكتۆبەر دەداتەوە و وەبیری دێنێتەوە كە لە ئەنجامی ”خۆفرۆشیی شێخەكەیان“ قەوارەی هەرێمی كوردستان لە مەترسی دایە.

شیرین یونس، پەرلەمانتاری سەر بە تاقمی خۆفرۆشی ١٦ی ئۆكتۆبەر، لە چوارچێوەی ئەو هەوڵانەی تاقمە خۆفرۆشەكە بۆ پاككردنەوەی پەرێزی لاهوور جەنگی لە كوشتنی خۆپیشاندەرانی سلێمانی دەیدەن، پەلاماری پارتی و پەرلەمانتارێكی فراكسیۆنی پارتی داوە.

لە بەرامبەردا  سه‌عید هه‌ركى، ئه‌ندامى فراكسیۆنی پارتی لە په‌رله‌مانى كوردستان به‌ (باسنیوز)ى ڕاگه‌یاند: ”ئه‌وه‌ی شیرین یونس دەیڵێت، قسه‌ی بازاڕی و مەجلیسی خۆفرۆشەكان خۆیانە، پارتی زۆر له‌وه‌ گه‌وره‌تره‌ بە وڕێنەی خۆفرۆشان زیانی پێبگات“.

ڕوونیشی كردەوە كە ئەوە قوباد تاڵەبانیی خۆیانە دەڵێت قەوارەی هەرێمی كوردستان لە مەترسی دایە، ”ئەوەش لە ئەنجامی خۆفرۆشی و خاكفرۆشیی شێخەكەی شیرین یونسە“. 

گوتیشی: ”نازانم شیرین باسی كامه‌ سه‌ردانی لاهوور جەنگی ده‌كات، ئه‌و سه‌ردانانه‌ی بۆ وێنه‌گرتنی (فەیسبووك) كردی؟ یان ئه‌و سه‌ردانانه‌ی كه‌ به‌ ته‌مابوو سلێمانی به ‌ده‌ردی كه‌ركووك ببات لە بەغدا و كەس حیسابی بۆ نەكرد؟“.

پەرلەمانتارەكەی پارتی دووپاتی كردەوە: ”دیموكراتیه‌ت لای شێخی خۆفرۆشان ئه‌وه‌یه‌ هانی منداڵی خه‌ڵك بدات و خه‌ڵك به‌ كوشت بدات و دام ده‌زگای حكوومه‌ت و بارەگای لایەنەكان بسوتێنن و تاڵانی بكەن، بۆ مه‌رامی خۆیان گه‌نده‌ڵی و قاچاخچێتیی ده‌روازه‌كانی باشماخ و په‌روێزخان بكەن و ئاسایشی خۆراك و تەندروستیی خەڵك بخەنە مەترسییەوە، دواتریش كە دەزانن خۆپیشاندان لە دژی خۆیان دەكرێت، دەكەونە وێزەی خەڵك و دەیانكوژن“.

جەختیشی كردەوە، با پەرلەمانتارانی سەر بەو تاقمە خۆفرۆشە ئاستەنگ دروست نەكەن تاوەكوو لێژنەی لێكۆڵینەوە لە ڕووداوەكانی سلێمانی بە بێلایەنی راپۆرتی خۆیان رابگەیەنن، ئەوكاتە دەردەكەوێت چەكدارەكانی شێخی خۆفرۆشان چۆن تەقەیان لە خەڵكی كردووە و ”دواتریش بۆ موزایەدە و پەرێز پاككردنەوە چوونەتە ماڵیان“.

فۆبیای لاهوور:
فه‌همى بورهان ئه‌ندامى سه‌ركردایه‌تى یه‌كێتى، له‌ وتارێكدا كه‌ باس لە پەروێزی هێرشی میدیایی پارتی بۆ سەر هەڤاڵ شێخ لاهور ده‌كات، ده‌ڵێت:" ئەوەى ئێستا لەكوردستاندا ئەگوزەرێ و بەدیاریكراوى دواى تەواوبوونى ئەركەکانى دوا كۆنگرەى یەکێتى، ململانێكان بۆ جۆرێكى نوێى جیاواز گۆڕاوە و چڕبۆتەوە لە قسەكردن لەسەر هەڤاڵ شێخ لاهور ، پارتى و میدیاى پارتى ، ئەقڵى نوێى هەڤاڵ لاهوریان پێ قوت نادرێ و دواى ساڵێك لەبەستنى کۆنگرە تا هەنوكەش لە فۆبیاى لاهوردا ئەژین، كەبێگومان ئەكرێت ئەم قۆناغە بە سەردەمێکی نوێی ململانێکان وێنا بكرێت ، بەم سیاسەت و دیدە نامۆیەى پارتى ، سەنگەرەكانى پشتیوانى لەشێخ لاهور وەك پرۆژەیەكى نوێى ژیانكردن فراوان بووەو لەئاست و پێگەى جیاوازى ئایدۆلۆژى و تەنانەت لەسەر ئاستى شەقامیش هاوڵاتیان لەم ململانێیەدا بێ لایەن نەبن و بەرەى لاهورى فراوان بكەن.

وتیشى:"بڕوام وایە یەکێتێکانی دوای کۆنگرە بە هەناسەیەکی هاوبەشەوە بێ بوونی جیاوازی پشتیوانی کردن لە هاوسەرۆکەکانیان وەک تەواو کردنی ئەرکە نوێی یەکانی دوای کۆنگرە ئەبینن، ئەمڕۆ هەڤاڵ لاهور بەیانی هەڤاڵ بافڵ لەستراتیژی نەیاردا ئەکرێن بەئامانج".

كێ كاری قاچاخچێتی دەكات؟
فەرحان جەوهەر، ئەندامی پێشووی فراكسیۆنی پارتی لە پەرلەمانی كوردستان بە (باسنیوز)ی راگەیاند: "دەبوایە ئەو كاتەی لاهوور جەنگی ئەم قسانەی كردووە، لێیان بپرسیبایە ئه‌گه‌ر داهاتی په‌روێز خان و باشماخ بگه‌ڕابایەوە بۆ حکوومەت، ئاخۆ دۆخی مووچه‌خۆران چەندە باشتر دەبوو؟ ئه‌وان بەشێکی زۆر کەم لە داهاتی ئەو مەرزانە دەنێرن بۆ حکومەت کە پێنج ملیۆن دۆلارە، بەڵام دە هێندەی ئەو بڕە زیاتریان دەست دەکەوێت".

جەختیشی كردەوە، ”ئێستا ئەگەر ئەوان بۆ موزایەدە دەچن و سەردانی ماڵی قوربانییەکانی خۆپێشاندان دەکەن، لە جێگەی ئەم قسە گەورانە، بۆچی دەست بە کەمکردنەوە و بنەبڕکردنی دزی له‌ ده‌روازه‌كان ناكەن تاوەكوو کێشەی مووچەی فەرمانبەران چارەسەر ببێت".

ئەوەشی دووپات كردەوە، "خەڵک هۆشیارە و تێدەگات لەو گەمە قێزەونەی کە لاهوور جەنگی دەیکات، خەڵک لەو فیکەیە تێدەگەن کە ئەوان دەیکەن".
پێشتر چەندانجار جەخت كراوەتەوە كە ئەو قاچاخچیتییەی لە مەرزەكانی سنووری سلێمانیدا دەكرێت، بەشی هەرەزۆری لە لایەن لاهوور جەنگی و پیاوەكانیەوە دەكرێن و لەم ڕێگەیەشەوە مانگانە سەدان ملیۆن دۆلار زیان بەر داهاتی گشتیی حكوومەتی هەرێمی كوردستان دەكەوێت.

شكستی دانوستانی نێوان یەكێتی و پارتی:
لەتیف نێروەیی، ئەندامی سەرکردایەتیی یەکێتی لە لێدوانێکی ڕۆژنامەوانیدا ڕایگەیاند: پەلاماردانی هاوسەرۆکانی یەکێتی لە لایەن هەندێک بەرپرس و کادری دیار و نزیک لە بڕیاربەدەستەکانی پارتی، بەڵگەی ئەو ڕاستییەن کە دەیانەوێت شكست بە دانوستانی نێوان یەکێتی و پارتی بێنن و نایانەوێ کێشەکان لە ڕێی دانوستانەوە چارەسەر بکرێن.

نێروەیی وتیشی: "ڕەنگە ئەو بەرپرسانە بە هەڵە لە نەرمینواندن و پشوودرێژیی یەکێتی گەیشتبن و بە خاڵی لاوازی یەکێتیی تێبگەن."

ڕاستە یان نە؟

ئەوەی خوێندتانەوە بەشێكە لەو شەڕە گەرمەی كە لە سۆشیاڵ میدیادا لەنێوان یەكێتی و پارتیدا بوونی هەیە، رۆژێك تێناپەڕێت كە هەردوولایان چیلكە نەخنە برینەكانی یەكتری و لێناگەڕێن قەتماغە ببەستێت، هیچ یەكێك لەوان نایانەوێت شكست قبوڵبكەن و هەریەكەیان لە ئەستۆی ئەوی تردا وێنای دەكات، بەڵام قسەی كۆتایی ئەوەیە: ئەگەر ئەمانە ڕاست بكەن و دۆخەكە بەو شێوەیەبێت ئەوا دەبێت باشووری كوردستان هەڵوێستێكی تری هەبێت و لە ڕێگەی خەباتی مەدەنییەوە ڕێگەیەكی دیكە بۆخۆی دیاری بكات، خۆ ئەگەر ڕاستیش نەبێت ئەركی ئەو دوو پارتەیە كە ئەندامەكانیان بێدەنگ بكەن و هێندەی تر دۆخەكە نەشێوێنن، خۆ ئەگەر هەر هیچیان پێناكرێت شكستی خۆیان ڕابگەیەنن چوون دەمێكە گوتراوە : مردنی خێرا زۆرباشتر و لەبارترە بۆ مرۆڤ تا مرداربوونەوەو مردنی بەهێواشی ناو جێگە.