02:57 - 17/09/2020

چیرۆكی خەمناكی میكۆنۆس و تیرۆری سادقی شەرەفكەندیی‌

پەیسەر

28 ساڵ تێدەپەڕێت بەسەر تیرۆركردنی سادقی شەرفكەندی سكرتێری پێشووتری حزبی دیموكراتی كوردستانی ئێران، تۆمەتباری سەرەكی ڕووداوەكەش كۆماری ئیسلامی ئێرانە و دادگای ئەڵمانیش چاوپۆشی لە ڕووداوەكە كرد.

تیرۆری سادقی شەرەفكەندی و هاورێكانی
رۆژی 17ی ئەیلولی ساڵی 1992 سادق شەرەفكەندی و دوو لە هاورێكانی لەشاری بەرلینی پایتەختی ئەڵمانیا لەلایەن چەند چەكدارێكەوە تیرۆر كران، شەرەفكەندی 14 ی ئەیلول چووە ئەڵمانیا بەمەبەستی بەشداریكردن لە كۆنگرەی جیهانی حزبە سۆسیالیستەكان و سۆسیال دیموكراتەكان رۆژی 17ی مانگ كۆنگرەكە كۆتایی دەهات، بەڵام شەوی 16/17 لە ریستۆرانتی ( میكونووس) سادقی شەرەفكەندی سكرتێری حزبی دیموكرات و فەتاحی عەبدولی نوێنەری ئەو حزبە لە ئەوروپا و هیومایۆنی ئەردەڵان نوێنەری حزبی دیموكرات لە ئەڵمانیا تیرۆر كران.

شەرەفكەندی بۆچی چووە ئەو ریستۆرانتە؟
شەرەفكەندی بەمەبەستی ئامادەسازی بۆ كۆبونەوە لەگەڵ دەستیەك لە نەیارانی كۆماری ئیسلامی ئێرانی چووە چێشتخانەی میكۆنووس،  شوێن و كاتی كۆبونەوەكەش  بەهەموو ئەو كەسانە درا كە بانگهێشتكرابوون، بڕیار بوو لەو كۆبونەوەیەدا دۆخی ئێران و كوردستان و رەوشی ئۆپۆزسیۆنی كۆماری ئیسلامی تاوتوێ بكەن.

روداوەكە لەزاری یەكێك لە رزگاربووەكانەوە
پەروێزی دەسماڵچی- چالاكوان و یەكێك لە رزگاربووەكانی روداوەكە بەم شێوەیە تیرۆری شەرەفكەندی دەگێرێتەوە" نزیكەی سەعات دە و نیو نانی ئێوارە ئامادەكرا، سەعات نزیكەی 10 دەقیقەی دەویست بۆ یازدەی شەو، ئێمە سەرقاڵی نانخواردن و باسوخواسی ئێران و كوردستان بووین، من بەرانبەر بە دكتۆر شەرەفكەندی و ئەوانەی لای چەپم قسەم دەكرد، مەسعوودی میر ڕاشد لای ڕاستمەوە دەستیكرد بە ئاخاوتن و گفتوگۆكەی من و دوكتۆر شەرەفكەندی بچڕاند، من ئاوڕمدایەوە بۆ مەسعوود تا بزانم چی دەڵێت. لەمكاتەدا لە دەرگای نێوان دوو داڵانەكەوە كەسێك هاتە ژوورەوە، هاتە پشتی مەسعوودەوە و لە نێوانی من و ئەودا ڕاوەستا، من چونكە دانیشتبووم و چاوم لەسەر مەسعوود بوو، سەرەتا تەنیا پێیەكانیم بینی و وامزانی ئەویش لە بانگهێشتكراوەكانە، ئینجا سەرم بەرزكردەوە بۆ سەرەوە، تەماشای باڵای ئەوم كرد تا بزانم كێیە، ئەوەی كە ئێستا دەینووسم تەنیا یەك ساتە، ڕووداوێكی چەند چركەییە كە دەبوو ئێستا كەسێكی دی باسی منی كردبا. وەختێك چاوی من پەڕییە سەر ڕووخساری ئەو، ئەویش سەیری منی دەكرد، كە ڕەنگە یەك چاو تروكاندن بێت، ڕەشاشێكی دەرهێنا و دەستی بە گولـلەبارانكردنمان كرد، سەرەتا سێ قەباغی فیشەكم بینی كە وامهاتە پێشچاو كە دەستەسڕێكی لە ڕەشاشەكەیەوە پێچاوبوو، بەڵام دوایی دەركەوت فیشەكەكانی لە جانتایەكی وەرزشییدا قایم كردبوو، هەمان كات و سات چاوم چووە سەر ڕەشاش بەدەستەكە، خوار چاوەكانی داپۆشی بوو، لەوكاتەدا وام بە خەیاڵدا هات كە چاوەكانی بە دەستەسڕ پێچاون، كەچی دوایی بۆمان دەركەوت لە یەخەیەوە تا چاوی داپۆشرابوو، ئەوكاتە بەبێ ئەوەی دەرفەتی بیركردنەوەم هەبێت، لە خۆوە خۆم هاویشتە ژێر مێزەكەوە و بەسەر ڕوودا خۆم دا بە زەوییدا، هەر پاش چەند چركەیەك فەتاحی عەبدوولی، كە لە دەستەچەپمەوەبوو كەوتە ژێر هەمان مێزی كە منی تێكەوتبووم، ئەو كە بە چەند چركەیەك درەنگتر لە من خۆی هاویشتە ژێر مێزەكەوە، لەو كاتەدا فیشەك بەر دڵی كەوت و دەمی پڕ بوو لە خوێن و ئیتر هەناسەی نەكێشا، منیش بەرانبەر بەو لەسەر سك كەوتبووم و جووڵەم لەخۆم بڕیبوو.

دوو دەستڕێژ فیشەكی ڕەشاش تەقی و ئیتر بێدەنگ بوو، ئیتر بەبێ ئەوەی جووڵە بكەم تەنیا ویستم بزانم چی بكەم، ئایا هەستمەوە یان نا؟ لەو ژێر مێزەوە چاوم بڕییە شوێنی ڕەشاش بەدەستەكە تا بزانم لەوێ ماوە یاخود ڕۆشتووە؟ لەوكاتەدا دەستە ڕەشپۆشەكەیم بینی كە بە دەمانچەوە چووبووە سەر شەرەفكەندی و دوا فیشەكی پێوەدەنا تا تەواو بیكوژێت.

لەو ڕەنگە ڕەشەی دەمانچەكەوە تێگەیشتم ئەوە كەسی دووەمە، چونكە كەسی یەكەم كە ڕەشاش بەدەستەكەبوو، بەرگی ڕەشی نەپۆشیبوو. لەو كاتەشدا هومایۆنی ئەردەڵان، كە بە دوو فیشەك بریندار كرابوو، بێهۆش بووبوو، هۆشی هاتەوەو بێ ئەوەی ئاگای لەخۆی بێت سەری بەرزكردەوە، فیشەك تەقێنەری كۆتایی ڕووەو ئەو ڕۆشت و گولـلەیەكی نا بە سەرییەوەو كوشتی، هات بە خەیاڵمدا كە ئەو دانەدانە بە فیشەك هەموومان بەتەواوی دەكوژێت، هاتە سەر فەتاحی عەبدوولی كە لە تەنیشتمەوە كەوتبوو و بە فیشەكەكەی كە بەر دڵی كەوتبوو مردبوو، یەك فیشەكی دیكەی پێوە نا و ئینجا ڕووی چەكەكەی كردە ناوچاوانی من و هیچی لێ دەرنەچوو.
ئیتر پیاوكوژە لێزانەكان جێگەی تیرۆركردنەكەیان بەجێهیشت و هەڵاتن.

دوای چەند ساتێك گوێم لە دەنگی ئیبراهیمزادە بوو كە ناوی هەندێكمانی دەهێنا و بە دەنگی بەرز بانگی دەكردین، منی بانگ كرد، هەستام و ڕۆشتم بۆلای تەلەفۆنەكە تا پۆلیس ئاگادار بكەمەوە، تاكە مشتەری هەمیشەیی ئەڵمانیی ڕێستۆرانتەكە(پیپ) وتی: ئاگادار كراون. گەڕامەوە بۆ دواوە، دوكتۆر سادقی شەرەفكەندی و فەتاحی عەبدوولی و هومایۆنی ئەردەڵان هەرسێكیان كوژرابوون، نووری دێهكوردی كەكەسایەتیەكی چەپی سەربەخۆی ئێرانی بوو كەوتبوو بەسەر مێزەكەدا و سەری بەسەر پەرداخە شەرابەكەدا شۆڕش بووبووەوەو پەرداخە شەرابەكە پڕبوو بوو لە خوێن، هێشتا هەناسەی دەدا و لرخەلرخی هەناسەدانی بوو، بەتەواوی بەرۆكی لە خوێن هەڵكێشرابوو، ڕووە و ئەو ڕۆشتم تا هاوكاری بكەم، دەستم برد تا بیسڕووێنم، كەچی خێرا دەستم كیِشایەوەو خۆشم نەمزانی بۆچی؟ خاوەنی ڕێستۆرانتەكە، عەزیزی غەفاری دوو فیشەكی بەركەوتبوو، دانەیەك بەر قاچی و ئەوی دییش بەر سكی كەوتبوو. پاش چەند خولەكێك پۆلیس و پیاوانی یارمەتییە سەرەتاییەكان هاتنە شوێنی تیرۆرەكە، دەستبەجێ نووری و عەزیزیان بۆ نەخۆشخانە گواستەوە.

گواستنەوەی تەرمەكان و لێكۆڵینەوە دەستی پێكرد، پاش سەعاتێك تا دوو سەعات پرسیار و وەلڵامدانەوە، منیان بۆ بنكەی پۆلیسی بەرلین گواستەوە، نزیكەی دوو سەعاتێك پرسیاركردن لە من دەستی پێكردبوو، كە لێكۆڵەرەكە بۆ پشوویەك ڕۆشتە دەرەوەو پاش چەند خولەكێك هاتەوەو وتی نووری دێهكوردییش گیانی سپارد"
سادقی شەرەفكەندی كێیە؟

دكتۆر شەرەفكەندی، ناوی تەواوی ساد‌ق شەرەفكەندییە و نازناوی دوكتۆر سەعید شەرەفكەندی بوو، ساڵی ‌1938 ‌لە گوندی‌ تەرەغەی‌ بۆكان لە دایك بووە، برابچووكی شاعیر و وەرگێڕی بەناوبانگی كورد مامۆستا هەژاری موكریانییە، ساڵی 1959 لە تاران بەكالۆریۆسی لە كیمیادا وەرگرتووە، ساڵی 1964 لە شارەكانی ورمێ و مەهاباد بووە بە مامۆستا.ساڵی 1989 پاش تیرۆركردنی دوكتۆر قاسملوو بووەتە سكرتێری گشتی حزبی دیموكراتی كوردستان، و رۆژی 17ی ئەیلولی ساڵی 1992 لەشاری بەرلینی پایتەختی ئەڵمانیا تیرۆركرا.

كورتەیەكی مێژووی حزبی دیموكرات
رۆژی 16ی ئابی ساڵی 1945 لەشاری مەهاباد بەرابەرایەتی  قازی محەمەد راگەیەندرا و دواتریش قازی محەمەد بەهۆی راگەیاندنی كۆماری كوردستان لە مەهاباد لەلایەن دەسەڵاتدارانی رژێمی شای ئێرانەوە لە 31/ ئازاری ساڵی 1947 لەتەمەنی 53 ساڵیدا لەسێدارەدرا.

لەدوای دروستكردنەوەی تەشكیلاتی حزب عەبدوڵا ئیسحاق كە بە ( ئەحمەد تۆفیق ) ناسرابوو بووە سكرتێری و ئەویش لەلایەن رژێمی بەعسەوە لەساڵی 1973 بێسەرشوێنكرا و تائێستاش گۆڕەكەی نادیارە، لەگەڵ ئەوەی گومان لەسەر چۆنیەتی كوشتنەكەی و تێوەگلانی چەندلایەنێك لەو تیرۆرە هەیە.

لەدوای ئەوە عەبدولرەحمان قاسملو وەك سێیەم سكرتێری حزبی دیموكرات دیاریكرا و ئەویش لە 13ی تەموزی ساڵی 1989 لە شاری ڤیەننای پایتەختی نەمسا تیرۆركرا.
لەدوای ئەویش دكتۆر سادقی شەرەفكەندی بووە سكرتێری و ئەویش لە 17/9/1992 لەشاری بەرلینی پایتەختی كۆماری ئیسلامی تیرۆركرا.

لەم چەند ساڵەی رابردوودا حزبی دیموكرات ڕووبەڕووی دابەش بوون بۆوە و لەئێستادا بەسەر دوو حزبدا دابەش بووە، ئەوانیش حزبی دیموكراتی كوردسان وحزبی دیموكراتی كوردستانی ئێران، و چەندین هەوڵیش هەیە بۆ یەكگرتنەوەیان بەڵام تائێستا بە ئەنجام نەگەیشتووە.