05:25 - 04/07/2020

درەنگ یان زوو ... داواكاری لامەركەزی هەرێمی كوردستان‌

پەیسەر

دكتۆر سەردار عەزیز
دكتۆر سەردار عەزیز لەگەورە راوێژكارەكانی پەرلەمانی كوردستان و لێكۆڵەر و نوسەر و  لەبوارەكانی پەیوەندی مەدەنی - سەربازی و سیاسەتی هەرێمی لە رۆژهەڵاتی ناوەراست و سیستمی حوكم ، هەڵگری بروانامەی دكتۆرایە لە كاروباری حكومەت لەكۆلێژی زانكۆی كورك. بابەتێكی گرنگی لەبارەی لامەركەزیەتەوە بە زمانی ئینگلیزیی نوسیوە و دواتر پەیمانگای واشنتۆن كردوویانە بە عەرەبی، لەبەر گرنگی بابەتەكە پەیسەر بە گرنگی زانی لە  عەرەبیەوە بیكاتەوە بە كوردی.

لەكاتێكدا كوردستانی عێراق ڕووبەڕووی چەند كێشەیەك دەبێتەوە لەهەمان كاتدا داواكاریەكی خەڵك هەیە بۆ باشكردنی نمونەی حوكمرانی كە ئێستا پەیرەو دەكرێت ئەویش كردنیەتی بەسیستمی لامەركەزی، پێشبینی ئەوەش هەیە كە ئەو سیستمە حوكمرانیە بێت كە لەداهاتوودا حكومەتی هەرێم پەیرەوی لێدەكات، بەوپێیەی سیستمی ئێستای حوكمرانی كاریگەر نیە بۆ مامەڵەكردن لەگەڵ ئاڵنگاریە گەورەكان ئەوەش پێویست بوونی زیاتری لامەركەزیەت دەردەخات.

داواكاریی لامەركەزیەت باشترین بەڵگەیە لەسەر دەركەوتنی ئاراستەیەكی پێچەوانە لەناوچەكەدا، لەساڵی 1991 وە هەرێمی كوردستانی عێراق لەژێر دەسەڵاتی دوو حزبی سیاسی سەرەكیدا بوو، ئەوانیش پارتی دیموكراتی كوردستان و یەكێتی نیشتمانی كوردستان، ئەو دوو حزبە بەسیستمی مەركەزی  دوو ئیدارەی حوكمی هەرێمیان كردووە، لەگەڵ تێپەڕبوونی كات ئەوە دەركەوت كە ئەم نمونەیە زۆر لایەنی نەرێنی هەیە و بەهۆیەوە دۆخی حكومەتی هەرێمی كوردستان خراپتر كردووە.

دامەزراوەی رۆژهەڵاتی ناوەراست بۆ لێكۆڵینەوە (میری) كە ناوەندێكی لێكۆڵینەوەیە لەهەولێر، پێكهاتەی كارگێری ئێستای حكومەتی هەرێمی كوردستان وەها پێناس دەكات كە وەها گەشەی كردووە بۆتە " بیرۆكراتیەتی ناوەندگەرای هەڵئاوساو كە بەشێوەیەكی گەورە كاریگەریی نیە" دامەزراوەكە رەخنە لەو نموونەی دەسەڵاتی ناوەندگەرایە دەگرێت كە حكومەت پەیرەوی لێدەكات، لەبەرامبەردا بەرپرسانی حكومەت بیانوی ئەوە دەهێننەوە كە هەوڵێكە بۆ دروستكردنی تایبەتمەندی و رەگەزەكانی دەسەڵات و كۆنترۆڵكردنی، ئەوەش كاریگەری نەرێنی لەسەر دۆخی سیستمی بەرێوەبردن و چۆنیەتی كارەكانی دروستكردووە، لەگەڵ ئەوەی ئەو رێكارانە چەندین ساڵە پەیرەو دەكرێن، بەڵام ئەو فشارانەی كە بەهۆی پاشەكشەی وەبەرهێنان دروست دەبن لەچەند مانگی داهاتوودا دەبنە فشاری زیاتر لەسەر شێوازی حوكمی داهاتوو.

كەرتی گشتی گەورە و كەرتی تایبەتی لاواز و نەبوونی ئابورییەكی فرە سەرچاوە وایكرد دەوڵەتێكی تاك سەرچاوەی داهاتی ناوەندگەرایی بووەهۆی دروستبوونی زۆر كێشە بۆ خەڵكانی ئاسایی، رێكارە كۆنەكان كە حكومەتی داهاتووش پشتی پێ دەبەستێت پێویستیان بە نوێكردنەوە هەیە بەنمونە پێویستە وەزارەتەكان بەئەلیكترۆنی كردنی نوسراوەكان قبوڵ بكەن و رێگەنەدەن بەدەست ببرێتە نوسینگەكانیان لەهەولێری پایتەختی هەرێمی كوردستانی عێراق، ئەم رێكارە كۆنەی خزمەتگوزاریی هێواشی رۆژانە، كێشەیەكە دەكرێت تەنها لەرێگەی رێگەدان بە بەكارهێنانی وێنەی ئەلیكترۆنی نوسراوەكان چارەسەر بكرێت، ئەوە تایبەتمەندیەكی دیار و گرنگی بیرۆكراتیەتی پەیرەوكراوە لەهەرێم، تەنها یەك نمونەیە لەسەر خراپی رێكخستن، كە وایكردووە خەڵك گومانی لەو دەسەڵاتە خۆجێیە هەبێت كە هەڵی دەبژێرێت.

لامەركەزی بەرامبەر پاشخانێكی سیاسی ناڕوون
لەم چوارچێوەیەدا لامەركەزیەت بۆتە وشەیەك كە دەنگدانەوەی زۆری بۆ حزبە سیاسیەكانی هەرێمی كوردستان هەبووە، رێگایەكە بۆ چاكسازیی ئەو هەڵئاوسانەی دروست بووە، لەگەڵ ئەوەی هەر حزبێكی هۆكاری تایبەتی خۆی هەیە بۆ پشتیوانیكردنی ئەو چەمكە، لەم دوایانەدا پارتی دیموكراتی كوردستان و یەكێتی نیشتمانی كوردستان بەجیا پرۆسەی گواستنەوەیان لەسەر ئاستی سەركردایەتی بەخۆوە بینی، هەردوو سەركردە نوێكە سورن لەسەر دەرخستنی زیاتری حزبەكەیان لەهەرێم و دەرخستنی هێز و كەسایەتی خۆیان بۆ دەنگدەران، دووسەركردە گەنجەكە سەرنج راكێشن لە بنەماڵەی بارزانی ( پارتی دیموكراتی كوردستان )  و تاڵەبانی ( یەكێتی نیشتمانی كوردستان)  هەوڵ دەدەن سود لەو میراتە وەربگرن كە بۆیان جێماوە، لەناویشاندا جەمسەربەندی لەچوارچێوەی كۆمەڵگەی كوردی، ئەم جەمسەربەندیە بەرەوپێش چوونی بەخۆیەوە بینیوە تا ئەوەی بۆتە جەنگێكی ناوخۆی نەرم، بەتایبەتیش لەرێگەی تۆڕەكۆمەڵایەتیەكانەوە دەركەوتووە، لەو چوارچێوەیەدا لامەركەزی  بە واتای بەشداری دەسەڵات و سەرچاوەكان دێت لەنێوان هەردوو جەمسەرەكەدا.

لەماوەی چەندین ساڵی رابردوودا كاری ئەو جەمسەرە پەكخرا، لەرابردوودا پێكهاتەی سیاسی لەهەرێمی كوردستان بەجۆرێك لە جۆرەكان لە سیستمی تەرازووی هێز پێكهاتبوو، بەڵام سەركردایەتی ئێستا لەبواری پشتیوانی سیاسی و هەماهەنگی لاوازە، بەوپێیەی كورسیەكانی پەرلەمان و قەبارەی رێكخستنی حزبەكان لەهەڵبژاردندا و كۆنترۆڵكردنی دەزگا حكومیەكان هەموویان بەشێوەی نایەكسانن، ئەوەش وایكردووە تەرازوی هێز ناجێگیربێت، ئەوەش لەزۆرینەی سیستمە سیاسیە مەركەزیەكاندا دەردەكەوێت.

لەچەند ساڵی كەمی رابردوودا پارتی دیموكراتی كوردستان وەك حزبێكی باڵا دەست دەركەوت، وە گواستنەوەیەك ڕوویدا لەحزبێكی باڵادەستەوە بۆ حزبێك كە بەكردەوە هەموو كاروبارەكانی بەشێوەی قۆناغ بەندی گرتە دەست، دوای ئەوەی یەكێتی نیشتمانی كوردستان نەیتوانی چارەسەری كێشە ناوخۆیەكانی خۆی بكات و كێشە لەسەر دەسەڵات لەو ناوچەیە دروست بوو كە پێشتر یەكێتی نیشتمانی كوردستان كۆنترۆڵی كردبوو، داواكاری زیادیكرد بۆ چاكسازی و گۆڕانكاری و وادیارە ئامانجی یەكێتی نشتمانی كوردستان لەئێستادا بۆ پشتیوانی كردنی لامەركەزیەت بۆ ئەوەیە پێگەی خۆی بەدەست بهێنێتەوە، ئەوەش تەنها بۆ پارتی دیموكراتی كوردستان نا بەڵكو بۆ حزبە سیاسیەكانی تر و گەلیش ڕوونە.

كاتێك حزبێكی سیاسی هێزی خۆی زیاد دەكات و بەزۆری هەوڵ دەدات ئامادەكاری بكات بۆ ئەوەی دووبارە هەژمونی خۆی بەدەست بهێنێتەوە بەزۆری لەرێگەی دروستكردنی هاوپەیمانیەتێكی بەرگریكارانەوە هەوڵ دەدات قورسایی تەرازوەكە لەبەرامبەر حزبە گەورەكە زیاد بكات كە كۆنترۆڵی كردووە، لەكاتێكدا یەكێتی نیشتمانی كوردستان هەوڵ دەدات سود لەو گۆڕانكاریە نوێیە لەسیاسەتی كوردی وەربگرێت و بگەڕێتەوە دۆخی پێشووی ڕووبەڕووی ئاستەنگی زیاتر دەبێتەوە لەچوارچێوەی دۆخی سیاسی ناڕوون و جیاواز، لەئەنجامی ئەوەدا كورد دەكەونە بەردەم چەند بژاردەیەكی دیاری كراو و بژاردەی سیاسی و پێویستە لەنێوان " پارتی دیموكراتی كوردستان ی بەهێز " و حزبە سیاسیە لاوازترەكان و دابەش بووە ناوخۆیەكان " یەكێكیان هەڵبژێرن.

لەپێگە بەهێزەكەیەوە پارتی دیموكراتی كوردستان راستەوخۆ دژایەتی لامەركەزیەت ناكات، بەڵكو لەبری ئەوە لێكدانەوەی تایبەتی خۆی هەیە بۆ چەمكەكە كە مەرج نیە لەگەڵ تێگەیشتنی یەكێتی نیشتمانی كوردستان وەك یەك بێت، پارتی دیموكراتی كوردستان پێی وایە لامەركەزیەت لە پێگەی یەكەمدا هەنگاوێكی كارگێریە و كاریگەری لەسەر هەموو پارێزگاكان و هەرێمی كوردستان دەبێت، لەلایەكی ترەوە پارتی دیموكراتی كوردستان پێداگریی لەسەر دەسەِڵاتی حكومەت دەكات، ئەمەش نامەیەكی نیمچە دژایەتیە بۆ ئەوەی كە پارتی دیموكراتی كوردستان رێگە بە لامەركەزی كارگێریی سنوردار دەدات، بەجۆرێك هیچ گۆڕانكارییەك لە دەسەڵاتی حكومەتی ناوەندی لەهەولێر دروست نەكات، لەبەرامبەردا یەكێتی نیشتمانی كوردستان وەها لێكدانەوە بۆ لامەركەزی دەكات كە سنورداركردنی دەسەڵاتی ناوەندگەراییە لەهەرێم.

لەگەڵ ئەو دوو لێكدانەوە سیاسیەی سەرەوە بۆ لامەركەزی، پێویستە باسی ئەوە بكرێت كە لامەركەزی داواكاریەكی جەماوەرییە و حزبە ئۆپۆزسیۆنەكانی هەرێمی كوردستانی عێراق دەریان بڕیوە، لەگەڵ ئەوەشدا ململانێ لەسەر دەسەڵات لەنێوان حزبە سیاسیە جیاجیاكان یەكێكە لەنمونەكانی ئەو هاوكێشە ئاڵۆزەی هەیە لەكاتی وتاری ئێستای لامەركەزیدا، بەوەش پێویستە لێكدانەوەی گفتوگۆی ئێستای لامەركەزی لەچوارچێوەی كێبركێی نێوان حزبە سیاسیەكاندا بێت.
جێگەی تێبینیە كە حزبە سیاسیەكانی تر- هاوشێوەی بزوتنەوەی گۆران و حزبە ئیسلامیەكانی هەرێمی كوردستانی عێراق- هەڵوێستی جیاوازیان دەربارەی ئەو پرسە هەیە، ئەو حزبانەی هێزی چەكداریان نیە پێیان وایە لامەركەزیەت هۆكارێكە بۆ بەهێزكردنی حكومەتی خۆجێی و دابەشكردنی دەسەڵات فەرمانرەوایی، هەندێك پێیان وایە لامەركەزیەت هۆكارێكە بۆ نوێكردنەوەی دابەش بوونە كۆنەكان، كە تائێستاش هەیە لە شەڕی ناوخۆی نەوەدەكانی سەدەی رابردووەوە، لەبەرامبەردا حزبەكانی تر پشتیوانی لامەركەزی دەكەن وەك هۆكارێك بۆ دووبارە دابەشكردنەوەی داهاتەكان كە بەشێوەی نایەكسان دابەش كراون، هەندێك لەحزبەكان لە شوێنەوارەكانی لامەركەزیی دەترسن و پێیانوایە هەنگاوی هاوشێوە دەبێتە هۆی لەناوبردنی ئەو هاوسەنگیە فشەڵەی لەبنەرەتدا لە حكومەتی هەرێمدا هەیە.

هەنگاو بۆ بەدیهێنانی لامەركەزی كاریگەر
بەسەیركردنی پێكهاتەی كلاسیكی كۆمەڵگەی كوردی ئەو گفتوگۆیەی دەربارەی لامەركەزیەت هەیە لەڕووی چەمكەوە كاری ئەو پەڕی لەپێشینەیە، بەوەش پێویستە حزبە سیاسیەكان و دەستەبژێری كۆمەڵگە بەڕوونی چەمكی لامەركەزی شی بكەنەوە، پێش ڕوودانی هەر گۆڕانكاریەكی راستەقینە، بۆ بەبیرهێنانەوە كێشەی چەمك تەنها لەسەر دەستەواژەكانی پەیوەندیدار بە دەسەڵاتداریەتی یان لامەركەزی جێبەجێ نابن، لەم چوارچێوەیەدا مێژوونوسی ئەڵمانی راینهارت كوزیلیك پێداگریی لەسەر ئەوە دەكات كە چەمكەكانی دەسەڵات بەبێ جیاوازی كاریگەریی و ئاماژەی جوڵەی مێژووین  و پێی وایە پەیوەندی هۆكاری لەنێوان روداوە مێژوویەكان هەیە، كە سیستمی كۆمەڵایەتی هاوبەشیان لە سیستمی نوێی سەرەتای و گۆڕانكاریەكانی زمانی سیاسەت - كۆمەڵایەتی گواستۆتەوە، چەمكەكانی مەركەزی تەنها رەنگدانەوەی چاكسازیە كۆمەڵایەتیەكان نیە بەڵكو رۆڵێكی كاریگەری لەو پرۆسەیەدا هەبووە.

لەدۆخی كوردا گرفتی دەوری چەمكی لامەركەزی لە گفتوگۆكان و ئاڵوگۆڕەكان لەنێوان حزبەكان و ئەندامەكانیان نیمچە موستەحیلە، بۆیە پێویستە هەنگاوی یەكەم كە حكومەتی هەرێم دەیگرێتە بەر پشت بەتایبەتمەندیەكانی لامەركەزیەت و شەفافیەتی كردەیی ببەستێت، دەكرێت ئەوە لەدەركردنی پاڵپشتی حكومی دەربارەی ئەو پرسە دەست پێ بكات بۆ ئەوەی لەبەردەم هەموواندا هەبێت.

هەنگاوی دووەم لەسەر دیاریكردنی چوارچێوەیەكی كاتی ڕوون و واقعی بۆ پرۆسەكە، لە چاكسازیكردنی حكومەتی ناوەندی، و پێكهێنانی دەسەڵاتێكی مەركەزی كاریگەر كە توانای گەورەی هەبێت كە حكومەتی هەرێمی كوردستان بتوانێت لامەركەزی دارایی و كارگێری بەئامانج بگرێت.

هەنگاوی سێیەم گۆڕانكاری بێت لە سیستمی هەڵبژاردنی هەرێم بۆ ئەوەی ببێتە سیستمێكی سیاسی تێكەڵ هاوشێوەی( سیستمی زۆرینەی ئەندامیەتی تێكەڵاو MMM)   ئەوەش رێگا بە چەندین هەڵبژاردن دەدات، لەكاتێكدا خەڵك پێویستی بەوە هەیە نوێنەرەكانی خۆی بناسێت، هەروەها هەرێم پێویستی بە نوێنەرایەتی كەسانێك هەیە كە زانیاری و شارەزاییان لەبواری دەسەڵاتداریەتی هەبێت بەنمونە لە ئامادەكردنی بودجە و پلاندارشتن و ژینگە ئەوان نمونەی باشتر دەبن لەسیستمی هەڵبژاردنی تێكەڵ.

پاڵنەرەكانی كێبركێ
لەگەڵ ئەوەی ئەو چاكسازیانە پێویستیان بەكات هەیە و پێویستبوونی ئەم رێكار و گۆڕانكاریانە لەزیادبووندایە و حكومەتی هەرێم ڕووبەڕووی قۆناغێكی نوێی دەسەڵاتی مەركەزی دەبێتەوە " لەدوای نەوت " لەئەنجامی داتەپینی بازاری نەوت بەهۆی ڤایرۆسی كۆڤید 19، ئەوەش وادەكات لامەركەزی پێداگری زیاتری لەسەر بكرێت، پێش دەستوەردانی نێودەوڵەتی بۆ شەڕی دژی داعش، حكومەتی هەرێم قۆناغێكی بەرێوەبردنی ئاسانی هەبوو، بەجۆرێك نرخی نەوت بەرزبوو و كۆمپانیاكان گەشەیان كردبوو، لەم قۆناغی گەشەیەدا، حكومەتی هەرێم توانای فراوانكردنی كەرتی گشتی  و رازیكردنی ئەندامانی حزبەكانی هەڵبژاردنی تارادەیەك هەبوو.

بەڵام لەگەڵ ئەوەی جیهان چووە ناو قۆناغی ئەو هەڵگەرانەوە بەرزانە بەهۆی پەتایەكی جیهانی و بێ ئومێدبوونی گەل لە سیاسەت، پێویستە هەرێم ئامادەبێت بۆ رزگاربوون لە فەرمانرەوایی ئاسان، لەناویشاندا لامەركەزی كە خەرجی رێكخستننە پێویستیەكان كەمدەكاتەوە و دابەشكردنی دەسەڵاتەكان بەدی دەهێنێت و ئابوری و بازاری هەرێم لەبەردەم كەرتی گشتی و تایبەتی دەكرێتەوە، ئەمەش بەهیوای بەهێزكردنی هەلی كار كە زۆر پێویستی پێی هەیە.

یەكێك لەهۆكارەكانی تر كە پێویستە پاڵ بەهەرێمەوە بنێت بە ئاراستەی لامەركەزی گەورەتر، پەیوەندیە ئاڵۆزیەكانیەتی لەگەڵ بەغدا، لەكاتێكدا دەستوری عێراقی دانی بەحكومەتی هەرێمی كوردستاندا ناوە، پەیوەندیەكانی هەولێر و بەغداد لەسەربنەمای هێز دەمێنێتەوە لەبری یاسا، لەئێستادا پێویستە لەسەر حكومەتی هەرێم بەشێوەی بەردەوام گفتوگۆ لەگەڵ حكومەتی ناوەندی بكات لە بەغداد، لەپێناوی دارشتنی بودجە و بەشداریكردن لە حكومەت و چەند شتێكی تر لەلایەنەكانی دەسەڵاتداریەتی.

ئەمەش وادەكات حكومەتی هەرێم دەسەڵاتێكی باشتری هەبێت و لەپێگەیەكی باشتردا بێت ئەوەش وایلێدەكات ئەدائێكی باشتری هەبێت لەسەر مێزی دانوستان لەگەڵ حكومەتی ناوەندی و پێچەوانەكەشی راستە، لەگەڵ ئەوەی سروشتی وڵاتەكە بەپێی دەستور فیدراڵیە، و بەڵام تا رادەیەكی زۆرلەژێر دەسەڵاتێكی ناوەندگەرادایە ، ئەوەی ڕوونە ئەوەیە كە حكومەتی ناوەندی عێراق و حكومەتی هەرێمی كوردستان پێویستیان بە لامەركەزی هەیە لەسەر ئاستی سیستمی سیاسی و ئابوری و كارگێری.

لەگەڵ ئەوەشدا و سەرباری داوای چەندبارە بۆ جێبەجێكردنی لامەركەزی لە كوردستانی عێراق، بەڵام هەرێم بە ئاراستەی پێچەوانەكەی رۆیشتووە، ناوەندێك بۆ دەسەڵات بەرەبەرە زیاتر لەدەستی حزبە بچوكەكاندا بووە و لەسەر ئاستی كارەكان.

 پێش ماوەیەك كە زۆر دوورنیە، هەرێمی كوردستان ئۆپۆزسیۆنێكی زیندوو و راگەیاندنی ئازاد و چالاكوانی كۆمەڵگەی مەدەنی كارای هەبوو، هەموو ئەو هۆكارانە كاریگەریان لەسەر بڕیارەكانی هەرێم هەبوو، بۆ بەدبەختی كوردستانی عێراق لەم پێگەیە نەمایەوە، تەنانەت لەناو حزبە سیاسیەكاندا مەكتەبی سیاسی - هێمای پێشووی هەژمونی دەسەڵات لەهەرێم- دەسەڵاتەكانی نەما و پشتگوێ خرا بەهۆی دەركەوتنی هەژمونی خێزانی لەناو حزبە سەرەكیەكاندا، ئەم چوارچێوەیە هەرێمی كوردستان دەگۆڕێت بۆ سیستمی حوكمرانی كەمینە هاوشێوەی چەند بەشێكی رۆژهەڵاتی ناوەراست.

بە پشت بەستن بەم پاشخانە ئاڵۆزە ئەوە ڕوون دەبێتەوە كە هەرێمی كوردستان هاوشێوەی ناوچەكانی تری عێراق پێویستی بە لامەركەزی هەیە، تەنانەت ئەگەر حزبە سیاسیە جیاوازەكانیش لەسەر شێوازەكەی كۆك نەبن، لەگەڵ ئەوەدا دەبێت  بگەنە رێككەوتن لەقۆناغی پێش دەست پێكردنی هەنگاوەكان، چاكسازیەكان بەتایبەتی سەبارەت بەجێبەجێكردنی لامەركەزی قورس دەبن، چونكە وەها مامەڵە لەگەڵ مەركەزیەت دەكرێت كە تایبەتمەندیەكی دەسەڵاتە لە هەموو بوارەكانی كۆمەڵگە، تەنانەت لەڕووی پێكهاتەی خێزان و رۆشنبیری خەڵك و ئاینیشەوە، بۆیە گواستنەوە بەئاراستەی لامەركەزی پێویستی بە نزیك بوونەوەی دووروودرێژ و فرە ڕوو هەیە.

بەڵام سەبارەت بە كۆمەڵگەی نێودەوڵەتی و لەناویاندا ویلایەتەیەكگرتووەكانی ئەمریكا و هێزەكانی تری كۆمەڵگەی نێودەوڵەتی كە هەوڵیانداوە یارمەتی دەزگا ئەمنیەكانی هەرێمی كوردستان بدەن، بواری تێدا نیە كە بەئاراستەی لامەركەزیەتن بە رێگەیەك كە ببێتە هۆی یەكگرتنی هەرێم و دامەزراندنی سیستمێكی سیاسی یەكگرتوو تر،  لەپێناوی تێپەراندنی دابەشبوونەكان لەكوردستانی عێراق، و كوردستانی عێراق دەكات بە هاوبەشێكی هەرێمی باوەرپێكراو بەشێوەیەكی گەورەتر.

بەڵام لەپێناوی بەدیهێنانی لامەركەزیەت پێویستە چەند هەنگاوێك بگیردرێتە بەر لەچوارچێوەی كاتێكی دیاریكراوی واقعی، دەربارەی دابەشكردنی دەسەڵات و بەرپرسیاریەتی لەنێوان لایەنە كاریگەرەكان لە پارێزگاكانی هەرێم كە سەقامگیری لەكوردستانی عێراق دەچەسپێنێت، دۆخێك دروست دەكات كە لەبەژەوەندی هەموو لایەنەكاندا بێت.