06:01 - 14/10/2019
قۆناغێکی نوێ لە شەڕی سوریا دەستی پێ کردووە
شەڕی سوریا لە ساڵی ٢٠١٢وە ناوبەناو قۆناغ دەگۆڕێت، هاوپەیمانێتییەکان و هاوکێشەکان بە بەردەوامی دەگۆڕێن، سیاسەتی دەوڵەتەکان گۆڕانی بەسەردا دێت. نەک شرۆڤەکارانی سیاسیی لە شرۆڤەکردنی دۆخی سوریا زۆرجار تووشی هەڵە دەبن، بەڵکو هێزە بڕیاردەرەکانیش زۆرجار هەڵەی گەورە و ستراتیژی دەکەن.
لە دوای هێرشی تورکیا بۆ سەر رۆژئاوای کوردستان و بڕیاری کشانەوەی ئەمریکا و رێککەوتنی سەربازی نێوان هێزەکانی سوریای دیموکرات و حکومەتی سوریا شەڕی سوریا کەوتووەتە قۆناغێکی نوێوە. قۆناغێک کە دەبێت لێرە بە دواوە شیکارییەکان بە ئاراستە و لە چوارچێوەی ئەم قۆناغە نوێیەدابن و شرۆڤەکاران دەبێت ماڵئاوایی لە قۆناغی رابردوو و بەشێکی بەرچاوی فاکتەر و هۆکارەکانی ئەو قۆناغە بکەن کە تا سەرەتای ئەم هەفتەیە بەردەوام بوو.
ئەمریکا کە تا هەفتەیەک بەر لە ئێستا وەک براوەیەکی جەنگی سوریا سەیر دەکرا، لە شەوررۆژێکدا و بە بڕیارێکی تاک لایەنەی دۆناڵد ترەمپ وەک دۆڕاوێکی گەورە لە سوریا کشایەوە
براوە و دۆڕاوەکان تا ئێستا
ئەمریکا
ئەمریکا کە تا هەفتەیەک بەر لە ئێستا وەک براوەیەکی جەنگی سوریا سەیر دەکرا، لە شەوررۆژێکدا و بە بڕیارێکی تاک لایەنەی دۆناڵد ترەمپ وەک دۆڕاوێکی گەورە لە سوریا کشایەوە. بە جۆرێک کە شکۆی ئەمریکا لە ناوچەکەدا بە تەواوی شكا و ئێستا زیاتر لە هەر کاتێکی دیکە بێ متمانەیی بە ئەمریکا بەرزبووەتەوە.
لە دەستپێکی شۆڕشی سوریاوە و تا دوو ساڵیش لە دوای دەستپێکردنی جەنگی ناوخۆی سوریا، ئەمریکای سەردەمی ئۆباما هەماهەنگ بوو لەگەڵ سیاسەتی تورکیا، پێکەوە پشتگیرییان لە سوپای ئازاد دەکرد کە لەناو دڵی ئەو سوپای ئازادەوە چەندین گروپی تیرۆریستی سەریانهەڵدا. لە ساڵی ٢٠١٤ شکستی ئەم سیاسەتەی ئەمریکا لە سوریا بەڕوونی دەرکەوتبوو، باراک ئۆباما لەو کاتەدا نزیک ببووەوە لەو بۆچوونەی ئێستای ترەمپ کە واز لە سوریا بهێنێت. بۆ نمونە لە ساڵی ٢٠١٢دا هەڕەشەی کرد بەکارهێنانی چەکی کیمیایی لەلایەن بەشار ئەسەدەوە هێڵی سوورە، کەچی نزیکەی دوو ساڵ دواتر بەشار ئەسەد هێڵە سوورەکەی بەزاند و ئەمریکا بەهۆی بێهیوایی لە داهاتووی سوریا هیچ هەڵوێستێکی نەنواند.
ئەم دەستکەوتەی ئیدارەی پێشووی ئیدارەی ئەمریکا کە لە راستیدا دەستکەوتی برێت مەکگۆرک بوو بە بڕیارێکی ترەمپ بووە تۆزی بانان
ئەمریکای بێ هیوا لە سوریا دوای شەڕی کۆبانێ و خۆڕاگری چەند مانگەی شەڕڤانان لەژێر فشاری رای گشتیدا بە ناچاری دەستێوەردانی سەربازی کرد و بەهێزی ئاسمانی گەڕایەوە ناو هاوکێشەکانی سوریا. بەڵام ئەم رووداوە دەرگای خێری بەڕووی ئەمریکادا کردەوە، لە ماوەیەکی کورتدا هیوایان بۆ گەڕایەوە و ئەو هاوپەیمانەیان دۆزیەوە کە بتوانن پشتی پێ ببەستن. بەمجۆرە سیاسەتی ئەمریکا تەواو دژی سیاسەتی تورکیا شکایەوە و لە سایەی کوردەوە جێ پێیەکی بەهێزی بۆخۆی لە سوریا دەستبەرکرد، بە جۆرێک هیچ لایەنێک بەبێ ئەمریکا توانای هیچ بڕیارێکی نەبوو لەسەر سوریا. تا بەر لە هەفتەیەک ئەمریکا و کورد خاوەنی یەک لەسەر سێی خاکی سوریا بوون. بەڵام ئەم دەستکەوتەی ئیدارەی پێشووی ئیدارەی ئەمریکا کە لە راستیدا دەستکەوتی برێت مەکگۆرک بوو بە بڕیارێکی ترەمپ بووە تۆزی بانان و ئێستا ئەمریکا هیچ پێگەیەکی نەماوە.
ئەمریکا ئێستا ئەگەر بیەوێت لە داهاتووی سوریادا پێگەیەکی لاوازیشی هەبێت تەنیا دوو رێگەی لەبەردەمدایە، یان ئەوەی وەک قۆناغی سەرەتای شەڕی سوریا خۆی هەماهەنگ بکاتەوە لەگەڵ سیاسەتی تورکیا، کە لەم حاڵەتەدا دەبێت وەک تورکیا لەناوخۆی سوریادا پشت ببەستێت بە گروپە جیهادییەکان و ئەو ئۆپۆزسیۆنەی سوریا کە زۆربەیان بەبیری دژە ئەمریکی پەروەردەکراون. لەم حاڵەتەدا پێگەی تورکیا چەندەبێت پێگەی ئەمریکاش هەر ئەوەندە دەبێت، تەنانەت کەمتریش دەبێت. جگە لەوەش ئەم ئۆپۆزسیۆنە ئیسلامییە توندڕەوە شانسی نزیک بە مەحاڵیان هەیە لە داهاتووی سوریادا هیچ پێگەیەکیان هەبێت، چونکە سێ دوژمنی گەورەیان هەیە کە بریتین لە روسیا و حکومەتی سوریا و کورد و بەپێی رێککەوتنەکەی نێوان کورد و سوریا بڕیاریشە هەر سێ لایەنەکە پێکەوە لە دژیان بجەنگن و لە هەموو سوریادا دەریانپەڕێنن.
ئەمریکا لە حاڵەتێکی دیکەدا ئەگەرێکی لاوازی هەیە پێگەیەکی لاوازی هەبێت لە داهاتووی سوریادا، ئەویش ئەوەیە جارێکی دیکە بگەڕێتەوە بۆ لای کورد. بەهۆی خیانەتی ئەمریکا لە کورد و هەروەها بەهۆی رێککەوتنی نێوان کورد و سوریا بە ناوبژیوانی روسیا، ئەمریکا هیچ شانسێکی نییە لە کورتماوەدا کورد جارێکی دیکە دەرگای خۆی بەڕووی ئەمریکادا بکاتەوە، بەڵام لە درێژماوەدا لەحاڵەتی سەرهەڵدانی ناکۆکی و رێکنەکەوتنی کورد و بەشار ئەسەد لەسەر داهاتووی سوریا، ئەگەر هەیە ئەمریکا لەلایەن کوردەوە دەرگای بەڕوودا بکرێتەوە.
شکستێکی دیکەی ئەمریکا لە سوریا بریتییە لەوەی چیتر بە ئاسانی ناتوانێت بانگەشەی ئەوە بکات بۆ دابینکردنی ئاسایشی ئیسرائیل رێگە بە بەهێزبوونی هەژمونی ئێران نادات و دەستی ئێران لەو وڵاتە کورت دەکاتەوە. چونکە ئەمریکا خۆی نەک دەستی بەڵکو هەر دوو قاچیشی لە سوریا پەڕێندرا. تەنیا رێگەی لاوازکردنی هەژمونی ئێران لە سوریا دەبێت بە رێککەوتن بێت لەگەڵ روسیا، بۆ ئەمەش لەوانەیە لە ناوچەی دیکە ناچار بێت باجی قورس بە روسیا بدات.
هەر لە پەیوەندی لەگەڵ ئەمریکادا لەوانەیە ئەم شکستەی ترەمپ لە سیاسەتی سوریادا لەناوخۆی ئەمریکادا بە شێوەیەکی خراپ بەسەر خۆیدا بشکێتەوە، چونکە شکست بوو بەرامبەر رکابەرە دێرینەکەی ئەمریکا واتە روسیا، پێناچێت ئەمەش بە ئاسانی بەسەر ترەمپدا تێپەڕبێت.
ئەگەر رێککەوتنەکەی کورد و سوریا جێبەجێ بکرێت ئەوا توانای ئەوەیان هەیە پێکەوە بە پشتگیری روسیا لە ئیدلبەوە بگرە تا عەفرین و باب لەهێزە ئۆپۆزسیۆنە جیهادییەکان پاک بکەنەوە
تورکیا
تورکیا دوو جار دەستی ئەمریکای بڕی و خۆشی سەری بێ کڵاو ماوەتەوە
تورکیا لە خەیاڵی زاڵبوونی بەسەر سوریاوە گەیشتووە بەوەی تەنیا رێگری بکات لە بەهێزبوونی کورد. لەسەر ئاستی سوریادا شکستێکی هێناوە، بەڵام لەوەدا سەرکەوتوو بووە کە کێشەی گەورە بۆ کورد دروست بکات. هاوپەیمانی کورد و ئەمریکای تێکدا، لە ساڵەکانی ٢٠١٦ و ٢٠١٨دا عەفرین و جەرابلوس و بابی داگیرکرد و لە ئێستاشدا هەندێک ناوچەی رۆژئاوای کوردستانی داگیرکردووە، بەڵام داهاتووی ئەم شەڕەی دەستی پێ کردووە بەهۆی رێککەوتنی کورد و بەشار ئەسەدەوە ناڕوونە.
ئەگەر رێککەوتنەکەی کورد و سوریا جێبەجێ بکرێت ئەوا توانای ئەوەیان هەیە پێکەوە بە پشتگیری روسیا لە ئیدلبەوە بگرە تا عەفرین و باب لەهێزە ئۆپۆزسیۆنە جیهادییەکان پاک بکەنەوە، تورکیاش ئەستەمە بتوانێت رێگری بکات وەکچۆن لە حەلەب نەیتوانی، چونکە رووبەڕووبوونەوەی راستەوخۆ لەگەڵ کورد و حکومەت ئەوا بە واتای رووبەڕووبوونەوەی روسیاش دێت. ئێستا بەپێی رێککەوتنەکە هێزەکانی سوریای دیموکرات فەیلەقی پێنجی سوپای سوریان. هەربۆیە پێدەچێت لەمەودوا تورکیا زۆر بە ترسەوە هەنگاوبنێت و زیاتر بەو ئاراستەیەدا کاربکات کە داوا لە روسیا بکات لە داهاتووی سوریادا پێگەی کورد بەهێز نەبێت.
ئەگەر تورکیا ئامانجەکەی تەنیا لە دژایەتیکردنی پێگەی کورددا کورت بکاتەوە ئەوا نەک روسیا ناکاتە نەیاری خۆی بەڵکو دەتوانێت پەیوەندییەکانی لەگەڵ بەشار ئەسەدیش ئاسایی بکاتەوە. چونکە ئەسەدیش حەز بە چارەی کورد ناکات. بەڵام بۆ ئەوەی بەم خواستەی بگات دەبێت ئامادەبێت هەموو ئەو ناوچانەی داگیری کردووە رادەستی سوریای بکاتەوە کە لە کورتماوەدا ئەستەمە ئامادەبێت تەنیا لەپێناو لاوازکردنی کورد دەستبەرداریان بێت.
رۆژئاوای کوردستان تا بەر لە هێرشەکەی تورکیا لە براوە گەورەکانی شەڕی سوریا بوو
تورکیا زوو یان درەنگ دەبێت لەو سوریایە بکشێتەوە کە لەژێر هەژمونی روسیادایە، بەڵام لە دوای رێککەوتنی کورد و بەشار ئەسەد شیکاریکردن بۆ دۆخی تورکیا لە کورتماوەدا زۆر کارێکی ئەستەمە و دەبێت چاوەڕوان بین لە رۆژانی داهاتوودا ئاراستەی شەڕەکە چۆن دەبێت، یان ئایا روسیا چەندە جدییە لەوەی ئاسمانی سوریا بەڕووی تورکیادا دابخات؟ ئایا لە ئەگەری بەریەککەوتنی سوپای تورکیا و سوپای سوریا هەڵوێستی روسیا چۆن دەبێت؟ ئایا حکومەتی سوریا و روسیا لە ئێستاوە وەک فەیلەقی پێنجی سوپای سوریا سەیری هێزەکانی سوریای دیموکرات دەکەن؟ وەڵامی هەموو ئەم پرسیارانە کەوتووەتەسەر ئەوەی لە چەند رۆژی داهاتوودا تورکیا چ بڕیارێک دەدات و ئەوەیکە ئایا وەک بەردەوام جەختی لێ دەکاتەوە پێداگری دەکات لەسەر بەردەوامی شەڕ و دروستکردنی ناوچەی ئارام؟
رۆژئاوای کوردستان
رۆژئاوای کوردستان تا بەر لە هێرشەکەی تورکیا لە براوە گەورەکانی شەڕی سوریا بوو، چونکە کیانێکی کورد لە هیچەوە لە دایک ببوو، بەڵام هێرشەکەی تورکیا دۆخەکەی گۆڕی و یارییەکەی لە کورد تێکدا، ئەمریکا بەهۆی تورکیاوە پشتی لە کورد کرد و کوردیش ناچار بوو سازشێکی تاڵ بکات بۆ بەشار ئەسەد. بەمەش پێگەی رۆژئاوا لە داهاتووی سوریا ناڕوونە، بەڵام بەم ڕێککەوتنە بە لایەنی کەمەوە لەوانەیە بتوانێت گەرەنتی بەردەوامبوونی خۆی بکات بۆ ماوەیەکی نادیار.
بەشار ئەسەد لە کاتی بێهێزیشدا ئامادەنەبوو دان بە کیانێکی کوردیدا بنێت، روسیاش پێناچێت ئەوەندە پێگەی کوردی لە داهاتووی سوریادا بۆ گرنگ بێت
ئەگەر رێککەوتنە سەربازییەکە بە پشتگیری روسیا جێبەجێ بکرێت، ئەوا کورد و حکومەتی سوریا لە ئێستا بە دواوە تا پاککردنەوەی هێزە جیهادییەکان و گرتنەوەی عەفرین و ئیدلب و باب و هەموو ناوچەکانی دیکە وەک هاوپەیمان دەردەکەون، لەم حاڵەتەشدا کورد دەتوانێت سەرکەوتووبێت لەوەی خاکەکەی خۆی لە داگیرکاری تورکیا رزگار بکات و پێش بە تەعریب بگرێت و دۆخی عەفرینش تا رادەیەک ئاسایی بکاتەوە. بەڵام کێشەی نێوان ئەم دوو هاوپەیمانە نوێیە دوای پاککردنەوە سوریا لە گروپە جیهادییەکان لە سوریا دەست پێدەکات.
بەشار ئەسەد لە کاتی بێهێزیشدا ئامادەنەبوو دان بە کیانێکی کوردیدا بنێت، روسیاش پێناچێت ئەوەندە پێگەی کوردی لە داهاتووی سوریادا بۆ گرنگ بێت، لەوانەیە لە باشترین حاڵەتدا فشاربخاتە سەر بەشار ئەسەد لە دەستوردا بەشێک لە مافەکانی کورد لەبەرچاو بگیردرێت.
پێگەی کورد لە داهاتووی سوریادا زیاتر کەوتووەتە سەر دوو فاکتەر. یەکەم: پێگەی سەرەکی بەشار ئەسەد ئێستا تەنیا لەناو عەلەوییەکاندایە و زۆرینە عەرەبی سونە هێشتا دژی بەشار ئەسەدن، هەربۆیە ئەگەری ئەوە هەیە بەشار ئەسەد بەرامبەر بە عەرەبی سونە بۆ راگرتنی هاوسەنگی گرنگی بە رێککەوتن لەگەڵ کورد بدات.
فاکتەری دووەمیش ئەوەیە دوای پاککردنەوەی هەموو سوریا لە هێزەکانی دیکەی ئۆپۆزسیۆن، ئەگەری ئەوە هەیە ئەمریکا و وڵاتانی رۆژئاوایی و رکابەری روسیا جارێکی دیکە لە دەرگای کورد بدەنەوە، چونکە ئەو کاتیش جیا لە رۆژئاوای کوردستان هیچ دەرگایەکیان بەرووی سوریادا نابێت، مەگەر ئەوەی دان بە شەرعییەتی حکومەتەکەی بەشار ئەسەد و حیزبی بەعسدا بنێن، لەم حاڵەتەشدا هەموو سیاسەتەکانی رابردووی خۆیان دەخەنە ژێر نیشانەی پرسیارەوە، بە واتایەکی دیکە بە واتای تەسلیمبوونیان دێت بەرامبەر بە بەشار ئەسەد و روسیا.
لە ئەگەری جێبەجێکردنی رێککەوتنەکەی نێوان کورد و بەشار ئەسەد، هیوا هەیە لە داهاتووشدا کورد هەر یاریکەرێکی بەهێز بمێنێەوە لە هاوکێشەی سوریادا
هەربۆیە راستە بەهۆی هێرشی تورکیا پێگەی کورد لاواز بووە، بەڵام لە ئەگەری جێبەجێکردنی رێککەوتنەکەی نێوان کورد و بەشار ئەسەد، ئەوا هێشتا هیوا هەیە بۆ ئەوەی لە داهاتووشدا کورد هەر یاریکەرێکی بەهێز بمێنێەوە لە هاوکێشەی سوریادا، چونکە پەیەدە جگە لەوەی پێگەیەکی جەماوەری بەهێزی هەیە، تایبەتمەندییەکیشی هەیە کە بەردەوام کار بۆ بەهێزبوونی زیاتر دەکات، لە داهاتووشدا بەردەوام دەبێت لەبەهێزکردنی پێگەی خۆی لەناو پێکهاتەکانی دیکەی سوریادا، جگە لەوەش خاوەنی هێزێکی تۆکمەی سەربازییە و حکومەتی سوریا بە ئاسانی ناتوانێت شەڕ لەگەڵ ئەم هێزە دەست پێ بکات، چونکە بەریەککەوتنی سەربازی نێوان کورد و حکومەتی سوریا جارێکی دیکە قۆناغێکی دیکە لە شەڕی سوریا دێنێتە ئاراوە کە کۆتاییەکەی دیار نابێت لە بەرژەوەندی کام لایەندا دەشکێتەوە.
حکومەتەکەی بەشار ئەسەد
هەر لە رۆژانی یەکەمی شۆڕشەوە هەموو خەڵک چاوەڕوان بوون بەشار ئەسەد بڕوخێت، شەڕ گەیشتە گەڕەکەکانی دیمەشق، بەڵام دواجار ئێران و روسیا بە هانایەوە هاتن و لە کەوتنی یەکجاری رزگاریان کرد. ئێستا لە دوای ٢٠١١وە پێگەی بەشار ئەسەد بەهێزتر بووەتەوە لە هەر کاتێکی دیکە و لە هەوڵی گرتنەوەی ئیدلب و لاوازکردنی کورددایە. هەربۆیە لە دەستپێکی ئەم قۆناغەدا بەشار ئەسەد وەک براوەیەکی سەرەکی هاوکێشەکان دەرکەوتووە.
ئێران
لە ساڵەکانی ٢٠١٥ و ٢٠١٦دا ئێران وەک سەرکەوتووی جەنگی سوریا دەردەکەوت و ئێستاش هەر خۆی بە براوە دادەنێت، بەڵام لە ماوەی یەک ساڵی رابردوودا کەمتر رۆڵی ئێران لەو وڵاتەدا هەست پێ دەکرێت، هەرچەندە چەندین گروپی ملیشای لە سوریادا هەیە، بەڵام هەژمونی ئێران بە تەواوی بووە بەژێر هەژمونی روسیاوە. تەنانەت لەناوخۆی دەسەڵاتدارانی ئێرانیشدا جاروبار هاواری ئەوە بەرزدەبێتەوە کە روسیا لە سوریا رێز لە پێگە و هەژمونی ئێران ناگرێت.
ئێستا باسی ئەوە هەیە کە روسیا لەگەڵ ئیسرائیل و ئەمریکا سازاوە بۆ کۆنتڕۆڵکردنی ئێران لە سوریا
ئێران و سوریا پەیوەندییەکی مێژووییان هەیە، روسیا و ئێرانیش لە هاوکێشە نێودەوڵەتییەکاندا وەک هاوپەیمان دەردەکەون، هەربۆیە بە ئاسانی ناتوانین بڵێین رۆڵی ئێران لە سوریا کەم دەبێتەوە، بەڵام راستییەکیش هەیە کە لە هەموو هاوکێشەکاندا روسیا ئێرانی لە بەرژەوەندی خۆی بەکارهێناوە. هەرچەندە ئێران سودێکی زۆری هەبووە بۆ روسیا، بەڵام روسیا سودێکی ئەوتۆی بۆ ئێران نەبووە و لەکاتە هەستیارەکاندا پشتی ئێرانی نەگرتووە. بۆ نمونە نە لە ساڵەکانی ٢٠١٠ بۆ ٢٠١٥ کە ئێران بە بەردەوامی سزای ئابوری قورسی لەسەر بوو، تەنانەت لەم دوایانەش کە ئەمریکا سزاکانی گەڕاندووەتەوە بۆ سەر ئێران، روسیا نەک یارمەتییەکی ئەو وڵاتەی نەدا بۆ لەسەر پێ راوەستان، بەڵکو سزاکانی وەک دەرفەتێک قۆستووەتەوە بۆ فرۆشتنی نەوت و گازەکەی خۆی. ئێستاش باسی ئەوە هەیە کە روسیا لەگەڵ ئیسرائیل و ئەمریکا سازاوە بۆ کۆنتڕۆڵکردنی ئێران لە سوریا و لاوازکردنی هەژمونییەکەی، تەنانەت ئەگەر رێککەوتنیش نەکرابێت ئەوا روسیا نایەوێت ئێران لە سوریا پێگەی بەهێز بێت.
روسیا
پێویست بە باسکردن ناکات روسیا براوەی یەکەمی کێشەی سوریایە، زۆر درەنگ دەستێوەردانی سەربازی کرد، بەڵام خەریکە هەموو یارییەکە لە بەرژەوەندی خۆیدا دەچنێتەوە، هەموو هەوڵی ئەوەیە هەموو هێزە بیانییەکان لە سوریا دەربکات، ئێستا بەشار ئەسەد و حکومەتەکەی بە تەواوی گوێرایەلی روسیان، کوردیش هەر گەڕاوەتەوە بۆ لای روسیا.
لە هەموو ئەمانە گرنگتر روسیا بەهۆی رۆڵێک کە لە قەیرانی سوریادا بینی پێگەکەی لە هەموو ناوچەکەدا بەهێزتر بووە، پێچەوانەی ئەمریکا روسیا ئێستا زیاتر وەک هاوپەیمانێکی جێ متمانە سەیر دەکرێت کە پشتی دۆستەکانی بەرنادات. هەر بەهۆی ئەم رۆڵەوە ئێستا پەیوەندییەکی باشتری هەیە لەگەڵ وڵاتە عەرەبییەکان.
پێچەوانەی ئەمریکا روسیا ئێستا زیاتر وەک هاوپەیمانێکی جێ متمانە سەیر دەکرێت کە پشتی دۆستەکانی بەرنادات
ئێستا جدیترین مەترسی بەردەم روسیا لە قەیرانی سوریادا ئەوەیە کە پێداگری تورکیا لەسەر بەردەوامبوونی هێرشەکانی بۆ سەر رۆژئاوای کوردستان ببێتە هۆی بەریەککەوتنی سەربازی نێوان سوپای سوریا و سوپای تورکیا، لەم حاڵەتەشدا روسیا ناچار بێت کاردانەوەی توندی ببێت بەرامبەر تورکیا، چونکە کاردانەوەی توندی روسیا بەرامبەر تورکیا دەبێتە هۆی ئەوەی جارێکی دیکە تورکیا روو لە ئەمریکا بکاتەوە و لە روسیا دوور بکەوێتەوە.