11:40 - 15/11/2020

سیغەی ئاخوندەكان لەنێوان پاداشتی قیامەت و خیانەتی هاوسەرگیریدا‌

پەیسەر

هاوسەرگیریی كاتی یان –سیغە- لە ئاینزای شیعەدا نەك هەر ڕێگەپێدراو و حەڵاڵە بەڵكو لە هەندێك حاڵەتدا خێری هەیەو مرۆڤ لە بەرامبەر ئەنجامدانیدا پاداشت وەردەگرێت، وەك شارەزایان پێیان وایە لەوانەیە هۆكارەكەی ئەوە بێت كە ئاخوندەكانیان لەناو كۆمەڵگەدا پێگەیەكی تایبەتیان هەیەو و ڕێزێكی كۆمەڵایەتییان هەیە، بەشێك لە ژنانیش بۆیە سیغەیان لەگەڵ دەكەن بۆ ئەوەی لەو خێرەیان بەربكەوێت.

 
سیغە –موتعە و – لە فیقهی ئیسلامیدا هاوسەرگیریی كاتیشی پێدەگوترێت- بەشێك لە فەقیهەكانی ئاینزای شیعە بۆیە دایانهێناوەو ڕێگەیان پێداوە تا ئەوانەی هاوسەریان نیە یان گەنجن و بۆیان ناكرێت هاوسەرگیریی ئەنجام بدەن تا نەكەونە هەڵەوەو تووشی زینا نەبن.

لە هاوسەرگیریی كاتیدا ماوەی هاوسەرگیرییەكە لەسەرەتاوە دیاری دەكرێت، بۆ ئەوەی كارەكەش ئاسانتر بكرێت ئافرەتان پێویستیان –كچ و ژن- بە ڕەزامەندی یان ئاگاداریی باوك و برایان نییە.

هەرچەندە جاروبار ئەو بابەتە لەنێو دەسەڵاتدارانی ئێرانیدا دەبێتە كێشەو قسەی زۆری لەبارەوە دەكرێت و ژمارەیەكیان پێیان وایە هەرچەندە ئەو بابەتە حەڵاڵ و ڕێگەپێدراویش بێت،. بەڵام دەبێت ئەو بابەتە بە نهێنی و بە شەرمەوە بەڕێوە ببرێت لەبەر ئەوەی ناوبانگی ئاینزاو وڵاتەكەشیانی خراپكردووە، لەبەر ئەوەی زۆرجار سیاسەت و ئیدارەی وڵات خوازیاری پەرەپێدان و بەردەوامی هەیە.

لایەنگران و نەیارانی سیغە لە ئێران و لە نێو ئاینزای شیعەدا بەردەوام ناكۆكییان هەبووە، بیست ساڵ بەر لە ئێستا لەسەردەمی دەسەڵاتی هاشمی رەفسنجانیدا ئەو بابەتە زۆرتر پەرەی سەندو بووە بابەتی ڕۆژەڤ و دواتر سەرۆك كۆمار بەناچاریی بێدەنگی هەلبژارد، لەگەڵ ئەوەشدا بەشێوە ئاشكراكەی لەنێو كۆمەڵگەدا و ڕووە كۆمەڵایەتیەكەیدا بە كارێكی ناشیرن و نەگونجاو دێتە ئەژمار.
بەڵام رۆلی ئاخوند و فەقێ و قوتابی حەوزە عیلیمیەكانی ئێرانیەكان لە كوێی هاوكێشەكەدان؟ ئایا بۆچی شارە مەزهەبیەكان زۆرترین سیغەیان تێدا دەكرێت و بەناوبانگن بۆ ئەنجامدانی هاوسەرگیریی كاتی. بە پێی وتەی میدیاكان و توێژینەوەی دادگاو توێژەرانی كۆمەلایەتی پەیوەندی بەو بۆچوونەوە هەیە كە هاوسەرگیریی كاتی لەگەڵ ئاخوندەكان ئەجرو پاداشتی هەیە.

توێژینەوەكان باس لەوە دەكەن زۆرینەی ئاخوندو قوتابیانی حەوزە عیلمیەكان لە سونەتی كۆمەڵایەتیدا لە تەمەنی منداڵی و میرمنداڵییەوە هاوسەرگیریی دەكەن بۆ ئەوەی تووشی تاوان نەبن، بەڵام وەك توێژینەوەكان دەریانخستووە بەشێكی زۆریان بە پێچەوانەی ئەو بۆچوونەوە لەدەرەوەی خێزان پەیوەندی سێكسیان هەیەو بەشێكیان لە ڕێگەی ئەنجامدانی هاوسەرگیریی كاتیەوەیەو بەشێكیشیان بەدەر لەوەش هێشتا پەیوەندییان هەیە.

وەك شارەزایان ئاماژەی پێدەدەن لە كۆمەڵگەی ئێرانیدا هیچ ئامارێكی فەرمی لەبارەی ئەنجامدانی سێكس لە ئارادا نیە، بۆیە ئاماری ئەنجامدانی سیغەش بەشێكە لەو پرۆسەیە و هیچ ئامارێك لە بەردەستدا نییەو ڕیگەش نەدراوە لە نێو زانكۆكانیشدا هیچ توێژینەوەیەكلەو بارەیەوە ئەنجام بدرێت، ئەوەی كە هەیە تەنها دەرئەنجامی ئەزموونی كەسەكان و شایەتی و شارەزایی ئەوانەیەو هیچی تر.

حكومەتی ئێران لەبەرامبەر ئەو كێشەو دیاردە كۆمەڵایەتیەدا هەستیارییەكی زۆری هەیە و بەهیچ شێوەیەك لە دادگاكاندا مامەڵەی فەرمی لەگەڵ ناكەن و زۆر بەتوندی لە دژی سیغەكردنی رۆحانیەكان دەوەستنەوە،وەك شارەزایانیش باسی دەكەن مەبەستەكە ئەوەیە كە بڵین ئاخوندەكان كاری لەو جۆرە ئەنجام نادەن.

لە ساڵانی ڕابوردوودا كەسێك  بەناوی شێخ حوسەین وافی خاوەنی چەند ماڵێكی پاكداوێنی –خانە عفاف- لە شاری قوم بەڕێوە بردووەو كاری بۆئاخوندەكان كردووە، بەپێی زانیاریەكان لەو خانەیەدا ژنانێك هەبوون كە وەك ئاخوندەكان –عدم دخول-بوون، بەومانایەی پاكیزەییانپارێزراو بووەو (كچ بوون)، هەروەها باس لەوەش كراوە هەیان بووە لەیەك رۆژدا لەگەڵ چەند پیاوێك پەیوەندیی هەبووە.

بەڵام ئەو ماڵە بە پێی فەرمانی دادگا پێچرایەوەو داخراو شێخ حوسەین وافیش بۆماوەی چەندساڵێك زیندانی كرا، رۆحانییەك بە دۆچە ویلەی گوتووە: لە كاتێكدا كۆمەڵگە توانای قبوڵكردنی ئەو كارەی نییەو لە ڕووی كۆمەڵایەتیشەوە پەسەند نییە، دادگای تایبەتی رۆحانیەكانیش لەو ڕێگەیەوە كارەكانی دەكات، بۆیە رۆحانیەكان و قوتابیانی حەزە عیلمیەكان ئەو بابەتە دەشارنەوەو نایانەوێت بەهیچ شێوەیەك باس بكرێت. ئەو رۆحانیە كە ناوی خۆی ئاشكرا نەكردووە گوتوشیەتی ماوەی 14 ساڵە لەگەڵ ئاخوندەكاندا تێكەڵاوی هەیەو ماوەیەكە ئەو بابەتە كاڵ بووەتەوە.

شارە مەزهەبیەكان:
رۆحانیەكی تر كە لە شیراز دەرسی خوێندووەو لەوێش مۆڵەتی رۆحانیەتی وەرگرتووە دەڵێت: حەوزەی عیلمیەی شیراز بەیەكێك لە كۆنترین حەوزەكانی جیهان دێتە ئەژمارلە جیهانی ئیسلامیدا كە ناوی حەزەی عیلمیەی خانە، لەو حەزەیەدا سیغە زۆر باوی هەبووەو بەجۆرێك بووە كە شاردراوە نەبووەو تەلەبەكانی ئەو حەوزەیە بەردەوام كردوویانەو لەو بارەیەوە بەناوبانگ بوون.

ئەو رۆحانیە گەنجە بە دۆچەویلەی گوتووە: سیغەكردن لە شارەكانی قوم و مەشهەد زۆر باوە،تەنانەت نوسینگەی فەرمییان بۆ داناوە، ئاخوندو تەلەبەكان زۆر حەزیان لێیەتی، ئەو دەشڵیت: كاتێك لەسەرەتاوە كەسێك بە دۆخەكە نیگەران دەبێت و دەیەوێت گفتوگۆی جدی لەبارەوە بكات پێی دەڵێن: دەتەوێت حەڵاڵی خودا حەرام بكەیت؟ بە پێی وتەی ئەو ئاخوندە ئەوانەی كە پەرە بەو دۆخە دەدەن بیانووەكەیان ئەوەیە كەسەكان زینا ئەنجام نەدەن.بەڵامئەو پێی وایە ئیدارەی حەوزەكانی قوم و مەشهەد هەڵەدەكەن، ئەو جەخت لەسەر ئەوەش دەكاتەوە ئەو تەلەبانەی دەچنە ئەو حەوزانە بۆ دەرس خوێندن و فێربوونی زانستی شەرعی ناچن، بەڵكو بۆ ئەوە دەچن كە كاری سێكسی ئەنجام بدەن.

 پەیداكردنی ژنی سیغەیی:
ئەو ژنانەی كە كاری سیغە بووەتە پیشەیان لە ئێراندا پێیان دەگوترێت –ژنانی سیغەیی- بە پێی ڕاپۆرتەكەی دۆچەویلە لە شاری قومو لە لای گۆڕستانی شێخان و گەڕەكەكانی چواردەوریی ئەو ژنانە زۆرن، لای دیوای مزگەوتی ئیمام حەسەنی عەسگەری ، لای مەزارو حەرەمی مەعصومە، شەقامی ئیرەم ، گەڕەك و كۆلانی خان، دەوروبەری قوتابخانەی گوڵپایەگانی، ئەو شوێنانەن كە لەقوم ئەو جۆرە ژنانەی تێدا پەیدا دەكرێن، ئەو ژنانە زۆرینەیان خۆیان سەرقاڵكردووە بە كاری دەستفرۆشی، بنێشت فرۆشی، و هەندێكجاریش وەك هەژار –گەدا- خۆیان دەخەنەڕوو. بەشێكی دیكەشیان لە ڕێگەی ئاشنایەتی و ناسراویی و ژمارەی تەلەفۆنەوە ڕێكدەخرێنبەتایبەتی بۆئەوانەی كە لە یەكتری دڵنیان، دەستەواژەی –كاری خێر- و پرۆژەی دووركەوتنەوە لە زینا لە نێو تەلەبەكانی حەوزەی عیلمیەكاندا زۆر باوەو بەردەوام گوێبیستی دەبیت، كە مەبەستیان سیغەو هاوسەرگیریی كاتییە.

پاداشتەكەی:
لە نێو ئاینزای شیعەدا ڕیوایەت و فەرموودەی تایبەتی زۆر هەیە كە باس لە پاداشتی رۆژی دوایی ئەنجامدانی سیغە دەكات، بەڵام بەشێكی زۆری ئەو قسانە لایی بەشێك لە شیعەكانیش حسابیان بۆناكرێت و بەناڕاست لە قەڵەم دەدرێن، لەگەڵ ئەوەشدا ئەوانەی كە ئەنجامدانی سیغە بە چەندین فەرموودەو وتەی ئیمامە شیعیەكان پاساو دەدەن و باسی ئەو پاداشتە قیامەتیانە دەكەن كە لە ئەنجامی دوور كەوتنەوە لە زینا دەستیان دەكەوێت، ئەمە نەك هەر بۆ نیرینەكان خێر بێت ، بەڵكو هەمان پاداشت بۆ ژنەكانیش هەیە.

هاوسەری سیغەچییەكان:
بەڵام ئەوەی جیگەی تێڕامانە هەڵوێستی هاوسەری ئاخوندو تەلەبەكانە، بە پێی بەدواداچوونە رۆژنامەوانیەكەی دۆچەویلە هاوسەری ئەو ئاخوندو تەلەبانەی كە خەریكی ئەنجامدانی سیغەن زۆر بەتوندی نیگەرانن و ڕەتی دەكەنەوەو بە خیانەتی هاوسەری ناوی دێنن، ئەوان بە جۆرێك لە پرۆسەی سیغە دەروانن كە پێچەوانەی بنەماكانی خێزانە و كار بۆ هەڵوەشاندنەوەی خێزانەكانیان دەكات، وەك باسدەكرێت و باوە لە نێو كۆمەڵگەی ئاینی ئێرانیەكاندا ئەوانەی بۆ دەرسخوێندن ڕوو لە حەوزەكانی قوم و مەشهەد دەكەن لەلایەن خێزانەكانیانەوە نیگەرانی زۆری لێكەوتوەتەوەو بە چاوێكی دیكەوە لە هەموویان دەروانن.

ڕاستی و درۆ:
ئەوەی لە بارەی هاوسەرگیریی كاتییەوە لە ئێران باسدەكرێت، چەندەی ڕاستەو چەندەی دەنگۆی ناراستە؟ یەكێك لەو تەلەبە گەنجانەی كە حەوزەی عیلمیەی زنجان و قومی تەواو كردووە بە دۆچەویلەی گوتووە: هەمیشە دەنگۆكان لە ڕاستیەكان گەورەتر و بڵاوتر بوون، سیغە بۆ من جێگەی پرسیاری جدی بوو، بەدوای بابەتەكەدا ڕۆشتم، بەڵام گەشتمە ئەو ڕاستییەی كە هەرچی دەگوترێت ڕاست نیە، ئەوەی كە پەرە بەم جۆرە قسانە دەدات خەڵكی بازاڕ پەرە بەو قسانە دەكات، بۆ ناشیرین كردنی ناوبانگی رۆحانیەكانەو پێیان بگوترێت ئەهلی سیغە. ئەو ناتوانێت بەتەواوەتی بابەتەكە رەت بكاتەوە .

تەلەبەیەكی تر گوتوویەتی: ڕاستیت پێ بڵێم كەس حازر نیە لەبارەی كاری سیغەكردنەوە ڕاستیت پێ بڵێت، لەلایەك لەبەر حاڵەتی ئەمنی و لە لایەكی تریشەوە كارەكە تایبەتمەندی كەسەكانەو پێویستی بەوە نیە كەسانی دیكە ئاگاداربن، لە لایەكی تریشەوە حكومەت لە ئیدارەدانی كۆمەڵگەدا لەجاران جیاوازترە، ئێستا خەڵك گوێ بە سیغەو شت نادات، خۆ ئەگەر بیشكرێت باس ناكرێت. ئەو تەلەبەیە بە پێچەوانەی ئەوانی ترەوە دەڵێت من لە قوم خوێندوومە شوێنی سیغەم نەدیوە.

لە كۆتاییدا دەبێت بگوترێت كە لە كۆمەڵگەیەكی پڕ لەدەنگۆ ووتی وتی ئێراندا كە پێدانی زانیاری فەرمی زۆر كەمە و دەسەڵاتیش ڕێگە بەو جۆرە ئامارانە نادات بڵاو بكرێتەوە ، بۆیە هەرچی بگوترێت زانستی دەرناچێت و بەتەواوی جێگەی متمانەو باوەڕی توێژەران نابێت، ئەزموونی كەسەكان نابنە پێوەری زانستی بۆسەلماندن یان ڕەتكردنەوەی ئەو دیاردە كۆمەڵایەتییە، گەرچی دەكرێت وەك نموونەیەك وەربگیرێن .

كوردەواریش دەمێكە گوتوویانە دووكەڵ نیشانەی بوونی ئاگرە..

* ئەم ڕاپۆرتە لە لایەن رۆژنامەنووسی دۆچەویلە ئومێد رەزایی ەوە ئەنجام دراوەو پەیسەر ناوەڕۆكەكەی وەرگێڕاوەتە سەر زمانی كوردی بەكەمێك دەستكارییەوە.