02:51 - 23/03/2019
بۆ راسپاردنی كاره‌كانی پارێزگای نه‌ینه‌وا پێشنیاری پێكهێنانی لیژنه‌یه‌ك كرا
دوای ئەوەی سەرۆك وەزیرانی عێراف نوسراوێكی ئاڕاستەی ئەنجومەنی نوێنەران بۆ لابردنی پارێزگاری نەینەوا و جێگرەكەی، لە ئێستادا پێشنیاری پێكهێنانی لیژنه‌یه‌ك بۆ راسپاردنی كارەكانی ئەو پارێزگایە كراوه.
شه‌وی رابردوو لە نوسراوێكدا عادل عەبدولمەهدی سەرۆك وەزیرانی عێراق كە ئاڕاستەی سەرۆكی ئەنجومەنی نوێنەرانی عێراقی كردووە، داوای دوورخستنەوەی پارێزگاری نه‌ینه‌وا و جێگرەكەی دەكات.
لە نوسراوەكەدا ئاماژە بەوەكراوە، بەهۆی خەمساردی و كەمتەرخەمی لە جێبەجێكردنی بەرپرسیارێتییەكەیان و بەپێی لێكۆڵینەوەكانیش دەركەوتووە كە پارە و داهاتی گشتیان بەفیڕۆ داوە و ئیستغلالی كورسی دەسەڵاتیان كردووە، پێشنیاری دوورخستنەوەی پارێزگاری نه‌ینه‌وا و جێگرەكەی دەكەم.
له‌وباره‌وه سەرچاوەیەكی ئاگادار بەپەیسەرپرێسی راگەیاند پێشنیاركراوە لیژنەیەكی سێ كەسی بۆ به‌ڕێوه‌بردنی كاروباره‌كانی پارێزگاكه پێكبهێنرێت.
به‌پێی زانیارییه‌كان پێشنیاركراوه كە سەرۆكی زانكۆی موسڵ و فەرماندەی لێكۆڵینەوە لەتاوانەكان و فەرماندەیی ئاسایشی شارەكە كارەكانی پارێزگار و جێگرەكانی جێبەجێ بكەن.