02:20 - 04/04/2021

ڕێككەوتنەكانی هەولێر و بەغداد وەك مەرەكەبی سەر كاغەز دەمێنێتەوە؟‌

پەیسەر

گەرچی بە پێی دەستوور هەرێمی كوردستان پارچەیەكی دانەبڕاوی عێراقە و سەرجەم ئەرك و مافەكانی نوسراونەتەوە، بەڵام بەستەڵەكی سیاسی نێوان هەولێرو بەغداد بەردەوام بووەتە ڕێگر لەبەردەم پەیوەندییەكانی هەردوولا و هەندێك جار هەرێم وەك كیانێكی سەربەخۆ كارەكانی كردووەو هەندێكجاریش ناوەند هەرێمی خستووەتە دەرەوەی سنوورەكانی خۆی، بەڵام ئەوەی زیانی بەركەوتووە خەڵكی هەژاری كوردستان بووەو لەو ڕێگەیەشەوە دەمی كۆمەڵێك لایەن و كەسایەتی شۆڤێنی هەردوولا كراوەتەوەو تا ڕادەی پێشێلكردنی ماف و شایستەكانی هەردوولا ڕۆشتووە، هەر ئەوەش بووەتە هۆی ئەوەی هەندێكجار دەستێوەردانی دەرەكیش ڕێگەی پێبدرێت.

 
هەرچەندە بەرپرسانی باڵای هەردوولا بەردەوام جەختیان لەسەر ئەوە كردووەتەوە كە كێشەكانی نێوانیان تەنها دارایی و ئابووری نییە ، بەڵام وەك شارەزایان باسی دەكەن یەكێك لە تەوەرە سەرەكییەكانی كێشەی نێوان هەولێر و بەغداد كێشە داراییەكان بووە، هەر ئەو كێشەیە هەموو ساڵێك لەسەرو بەندی پەسەند كردنی بودجەی عێراقدا سەری هەڵداوەتەوە، هەرچەندە پەسەندكردنی بودجەكە بەردەوام كێشەی تایبەت بەخۆی هەبووە، تەنانەت حیزب و فراكسیۆن و لایەنە عێراقیەكانیش نیگەران و ناڕەزایەتییان هەبووە، بۆیە ئەمساڵییش   2021  دواكەوتنی بەخۆیەوە بینی و دوای تێپیڕبوونی سێ مانگ بەسەر وادەی یاسایی و ئاسایی خۆیدا پەسەند كرا، یەكێك لەو كێشانەی كە ببووە مایەی دواكەوتن و پەسەند نەكردنی ئەو مادانە بوون كە پەیوەندییان بە پشكی هەرێمی كوردستانەوە هەبوو، بەڵام دواجار دوای ڕێككەوتن و تەوافوقی سیاسی ئەو بڕگانەش تێپەڕین و  بودجەی عێراق پەسەند كراو بەشەكەی هەرێمی كوردستانیش جێگیر كرا.

ئاوات شێخ جەناب، وەزیری دارایی و ئابووری حكومەتی هەرێمی كوردستان، لە چاوپێكەوتنێكیدا لەگەڵ میدیاكانی بزووتنەوەی گۆڕان لەبارەی ڕێككەوتنەكەو چۆنیەتی تێپەڕاندنی بودجەو چەند گرفتێكی تری تایبەت بە بواری دارایی وەڵامی پرسیارەكانی داوەتەوە، پەیسەر هەندێك لە بڕگەو بابەتەكانی نێو ئەو چاوپێكەوتنەتان بۆ دەگوازێتەوە.

پرۆژەكی هاوبەشی نێوان ناوەند و هەرێم:
ئاوات شێخ جەناب لەسەرەتای چاوپێكەوتنەكەدا باس لە چۆنیتەتی پێشگەشتنی پرۆژە یاساكەو سەرنج و تێبینیەكانی شاندی هەرێم دەكات و دەڵێت: ئێمە هەموو ڕێككەوتنێكمان لەگەڵ بەغداد كردبوو بۆ ساڵی پار 2020 ، بەڵام بەهۆی دەست لەكار كێشانەوەی عادل عەبدولمەهدی لە سەرۆكایەتی ئەنجوومەنی وەزیرانی عێراق، پرۆژەكە نەچووە پەرلەمان و دەنگی لەسەر نەدرا، لە كۆتایی 2020 دا جارێكی تر چووینەوە بەغدادو بە كەمێك دەستكارییەوە هەمان پرۆژەمان ڕادەستی عێراق كردووەتەوە، كە بووەتە پرۆژەی هاوبەشی نێوان هەردوو حكومەتی ناوەند و هەرێم. ئەەنجوومەنی وەزیرانی هەردوولا ڕەزامەندییان لەسەركرد و ڕەوانەی لیژنەی دارایی پەرلەمان كرا، بۆ چارەسەركردنی كێشەكانی نێوانمان 24 جار چوینەتە بەغداد، جاری وا هەبوو دوو هەفتە ماوینەتەوە.

ماڵی شیعی و ڕێككەوتنی پێشوەختە:
وەزیری دارایی حكومەتی هەرێم باس لە ڕۆڵی ڕێككەوتنی پێش وەختە لەگەڵ شیعەكان دەكات و دەڵێت: دوو تا سێ رۆژ پێش لەوەی یاساكە خوێندنەوەی تەواوی بۆ بكرێت لە پەرلەمان و دەنگی لەسەر بدرێت ئێمە چووینە ماڵی (عامری) و لەگەڵ (بیت الشیعی) و هەموو كوتلە شیعیەكان دانیشتین، ئێمە ڕێككەوتنی پێشوەختەمان لەگەڵ كردن و دواتر چووە لیژنەی دارایی و هەر 23 ئەندامەكەی لیژنەی دارایی دەنگیان لەسەردا. وەزیری دارایی باس لەوە دەكات سەرەڕای ئەو ڕێككەوتنەش هەندێك لایەنی شیعی دەیانوسیت گۆڕانكاری بەسەردا بێت بۆیە دەنگدان لەسەری لە كاتژمێر 10 شەو گۆڕا بۆ رۆژی دواتر، ئەو نایشارێتەوە كە ئەوەی كە دەنگی لەسەر درا، كەمێك گۆڕانكاریی تێدا كرابوو لەوەی كە لەگەڵ لایەنە شیعیەكان ڕێككەوتنی لەسەر كرابوو لە ماڵەكەی عامری دا. هەرچۆنێك بێت ئەو ڕێككەوتنە بووە هۆی ئەوەی بەشێوەیەكی گشتی ڕەزامەندیی شیعەو كوردو و سونەش بەدەست بهێنێت.

كرۆكی كێشەكە دارایی نییە:
ئاوات شێخ جەناب لەو دیمانەیەدا باس لەوە دەكات كێشەی نێوان هەولێر و بەغداد لە ڕواڵەتدا كێشەی داراییە، ئەگینا لە ڕاستیدا كێشەی سیاسی، یاسایی، ئیداریی، و نەوتییە، لەگەڵ ئەوەشدا نایشارێتەوە كە ڕێككەوتنەكە سەرجەم داخوازییەكانی ئێمەو ئەوانیشی تێدا نییە، كورد و شیعە لەناوەڕاستی ڕێگەكەدا بەیەك گەشتوون، پاش ئەو دابڕانەی كە لە 2013 ەوە لە نێوان هەرێم و ناوەند دا دروست بووە، ئێستا گەشتوینەتەوە بەیەك، هەروەها ڕاشیدەگەیەنێت: ئەو بودجەیەی ئێستا دەنگی لەسەر دراوە داخوازییەكانی خەڵكی عێراق و هەرێمیش بە تەواوی دابین ناكات، بەو پێیەی خودی عێراقیش بە دۆخێكی ئابووری و دارایی خراپدا تێپەڕدەكات.
وەزیری دارایی باس لەوەش دەكات كە داوی 7 ساڵ لە دابڕانی نێوان هەرێم و ناوەند ئێستا بەستەڵەكی پەیوەندییەكان شكێنراون، بەڵام هەموو خواستەكان جێبەجێ ناكات، بۆیە دەبێت هەردوولا تەنازولات بۆ یەكتری بكەن و هەر ئەوەش جێبەجێ بوو.

هۆكارێك بۆ ئاشتبوونەوە:
وەزیری دارایی باس لە لایەنێكی ئەرێنی شكاندنی ئەو بەستەڵەكەی نێوان هەولێرو بەغداد دەكات و پێیی وایە كاریگەری بۆسەرناوخۆی هەرێمی كوردستانیش دەبێت و دەڵێت: دۆستایەتی نێوان ئێمە –كورد- و سوننە، ئێمەو شیعە، حكومەتی هەرێم و ئۆپۆزسیۆن، ئاشتبوونەوەی تێكەوتووە، چوون ئۆپۆزسیۆنەكانی كوردیش ڕۆڵیان هەبووە، ئەو لەبارەی ڕۆڵی -فراكسیۆنی هیوا- ەو گوتی: بە مەسئولیەتەوە كاریان كردووە، پشتیوانی پرۆژەكەی حكومەتیان كردووە، هەروەها گوتیشی : سەرەڕای ئەوەی ڕێككەوتنی هەموو لایەنەكانی لەسەرە بەڵام هەموو خواستەكانی تێدا نییە.
وەزیری دارایی باسی لەوەش كرد، پەیوەندییەكانی نێوان هەرێم و ناوەند ئاسایی بووەتەوە، ئەو تێڕوانیەنەی لەناوەڕاست و باشووری عێراق هەبوو كە گوایە كورد سەرچاوەی كێشەكانی عێراقە، ڕاست دەبێتەوە، پەیوەندییەكانمان لەگەڵ سوننە و شیعە ئاسایی بووەتەوە، هەرەوەها باسی لەوەش كرد ئەو بارودۆخە تازەیە كاریگەریی دەبێت لەسەر ناوچە دابڕێنراوەكان، لەڕووی ئەمنییەوە كاریگەریی دەبێت، لە ڕووی متمانەی نێوانمانەوە زۆر كاریگەریی دەبێت.

لەمپەرەكانی داهاتووی بەردەم كورد:
وەزیری دارایی حكومەتی هەرێم لەو چاوپێكەوتنەكەدا باسی لەوەش كردووە كە كێشەكانی نێوان هەرێم  و ناوەند دەبێت چارەسەری تری بۆ بدۆزرێتەوە، ئەو باسی لەوەش كردووە كە ئومێدی ئەوەیان هەیە لە داهاتوودا بەشی باشتر بۆ هەرێمی كوردستان ببڕێت، گەرچی مافەكانی هەرێم لەنێو دەستووردا بە دەق هاتووە، بەڵام هەندێك لایەن هەن كە باوەڕیان بەو مافەدەستوورییانەی هەرێم نییە.

حكومەتی هەرێم بەخۆیدا دەچێتەوە:
ئاوات شێخ جەناب، باس لەوەش دەكات كە حكومەتی هەرێم بڕیاری ئەوەی داوە پێداچوونەوە بە گرێبەستەنەوتیەكان ، گرێبەستە شەركاتەكاندا ، بە گواستنەوەو تێچوونەكانی نەوتدا بكات، هەروەها باس لەوەش دەكات ئەو بڕیارەی حكومەت لە ڕووی شەفافیەتی نەوتەوە زۆر گرنگە، و كۆمپانیای دیلۆتیش لەو بوارەدا گرنگە، وەزیری دارایی ئەوەشی ئاشكرا كردووە لەڕێگەی چاودێریی دارایی هەردوولاوە پێداچوونەوە دەكرێت و ئەوەش دەرفەتێكی باشترە بۆ شەفافیەتی زیاتری دۆسیەی نەوت بەو شێوەیەی كە حكومەتی هەرێم باوەڕێ پێیەتی. لەگەڵ ئەوەشدا جەخت لەسەر ئەوە دەكاتەوە كە حكومەتی ناوەندی بەتەواوەتی  پشكی هەرێمی نەناردووە.

مەرجەكانی سەر ناوەند:
وەزیری دارایی باس لەوە دەكات لەو ڕێككەوتنەدا مەرج تەنها لەسەر هەرێمی كوردستان نییە، بەڵكو مەرج لەسەر حكومەتی ناوەندیش دانراوە، باس لەوە دەكات ئەگەر حكومەتی ناوەند ئەركی خۆی جێبەجێ بكات ئەوا هەرێمی كوردستان لە سەروو 900 ملیارەوە وەردەگرێت، ئەگەر جێبەشی نەكات ژمارەكە گۆڕانكاریی بەسەردا دێت، لە بودجەدا سێ ترلیۆن دینار بۆ وەبەرهێنان دیاری كراوە، ئەگەر بەشی هەرێم نەنێرێت كە ئێمە كردوومانە بەمەرج ئەوا دۆخەكە بەشێوەیەكی دیكەی لێدێت. هەروەها باس لەوەش دەكات، ئەگەر حكومەتی هەرێم بەتەواوی پابەند بێت بە ڕێككەوتنەكەوە ئەوا دەبێت حكومەتی ناوەندیش پابەندبێت.

هەرێم بڕیاری پابەندی داوە:
وەزیری دارایی لەو چاوپێكەوتنەدا دەڵێت: دڵنیاتان دەكەمەوە كە حكومەتی هەرێم بڕیاریداوە پابەند دەبێت و دەیشیكات، هەروەها باس لەوەش دەكات كە عێراقیشیان ئاگادار كردووە كە هەرێمی كوردستان لە بابەتی نەوتدا هەموو ئیلتیزامەكانی سەر خۆی جێبەجێ دەكات، لە لایەن هەرێمەوە پێمان گوتوون ئەگەر ئێوە نەوتتان دەوێت هەموو مەلەفی نەوت وەربگرن، بە قەرزەكانیشەوە، ئەگەینا هەرێم چۆن بتوانێت قەرزەكانی بداتەوە؟
سەبارەت بە بوون و نەبوونی متمانە بە جێبەجێكردنی ڕێككەوتنەكە –وەك دەگوترێت عیبرەت لە جێبەجێكردنەكەیدایە- وەزیری دارایی لەوەڵامدا دەڵێت: یەكێك لەكێشەكان ئەوەیە كە حكومەتی كوردی نەیتوانیوە لەناوخۆی خۆیدا خەڵك قەناعەت پێبكات كە كێشەكە لە كوێدایە؟ ئەوەشی نەشاردوەتەوە كە لەلای خەڵكی ناوەڕاست و باشوور و رۆژئاوای عێراقیش ئەو بڕوایە هەیە كە خەتای هەرێمە و پابەند نابێت و بەو هۆیەوە ئەوانیش ماڵیان كاول بووە! ئەو لەو بڕوایەدایە هیچ یەكێك لەوانە ڕاست نین و دەگەڕێتەوە بۆ ئەوەی هەندێك ڕاستی هەیە بە باشی دەرنەكەوتوون.

نەوتم بەرێ ، لەیاساكاندا نییە:
وەزیری دارایی لەبارەی پێدانی نەوتەوە بە كۆمپانیای سۆمۆ دەڵێت: لە هەموو ئەو یاسایانەی من بینیونمن ئەوەی تێدا نیە بڵێت: نەوتم بەرێ، لە 2019 و 2020 و 2021 یش شتی وای تێدا نییە، تەنانەت لە پرۆژە یاسای پارەداركردن و كورتهێنانی بودجەكەشدا نەبوو، ئەوەی كە هەبوو لە 2019 ئەوەبوو ئەگەر پارێزگایەك یان هەرێم پابەند نەبوو بە ڕادەستكردنی داهاتی نەوتەكەی ئەوا لە بودجە بە ئەندازەی بەهای نەوتەكە لێی داشكێنە. كەواتە ئەگەر نەوتەكەشت تەسلیم نەكەیت هێشتا سەرپێچی و موخالەفەت نەكردووە.
وەزیری دارایی باس لەوە كە حكومەتی هەرێم و ناوەند و تەنانەت ئۆپۆزسیۆنیش ئەوەیە نەیتوانیوە ئەو ڕاستییە ڕوون بكەوەنەوەو ئەو ڕاستییە خەڵك نایزانێت.

هەڵواسینی ئومێد:
لەبارەی ئەوەی چەندە ئەم ڕێككەوتنە بۆ خەڵك باشەو ئومێدیان پێدا هەڵواسن ، وەزیری دارایی حكومەتی هەرێم دەڵێت: ئەگەر حكومەتی ناوەند پابەندی ڕێككەوتن بێت شتێكەو  ئەگەر پابەندیش نەبێت شتێكی ترە، لە بارەی سیاسەتی حكومەتی هەرێمیش بۆ موچە دەڵێت ئێمە سێ مانگە لەكاتی خۆیدا بە لێبڕینەوە مووچە دەدەین و بەردەوامیش دەبین، پێداچوونەوەكانیشمان بە سەرچاوەی داهاتی نەوتی و نانەوتی و گومرگ  و وەزارەتەكان داهاتمان زیاتر دەكات، ئەگەر ئەوەی عێراقیشمان بەتەواوی پێبگات، بەدڵنیاییەوە دۆخی موچە باش دەبێت. وەزیری دارایی گوتوشیەتی : ئەگەر عێراق بینێرێت لەو بڕوایەدام لێبرین نامێنێت.

چاكسازیی :
وەزیری دارایی بە ڕوونی ڕایدەگەیەنێت كە كاتێك دەستكراوە بە چاكسازیی كە هەرێم كێشەی سیاسی قووڵی هەیە، ئەو بەئاشكرا دەڵێت: كێشەكانی نێوان یەكێتی و پارتی لە ڕووی دارایی، سەربازیی و پێشمەرگەو ئەمنییەوە بوونی هەیە، باسی لەوەش كردووە لە ئەنجامی نەبوونی متمانە بە یەكتریی لە نێوانیاندا نزیكەی 25 هەزار كەس شەهید بوون، نەیشی شاردووەتەوە كە هێشتا دۆخەكە لەبار نیە كە 100% كیشەكان چارەسەر ببن، لەگەل ئەوەشدا باسی لەوەش كردووە كە هەوڵ هەیە بۆ چارەسەركردنی كێشەكانی نێوانیان.
وەزیری دارایی باسی لەوەش كردووە كە چاكسازی لە بواری –باج-دا دەستی پێكراوە، ئەو دەڵێت سەرەڕای كەرەنتینەی ساڵی 2020 بەڵام داهات لە ساڵی 2019 باشتر بوو، پلانمان وابوو كە ژمارەیەكی زۆر باش تۆماربكەین بەڵام كۆرۆنا هەموو دونیای تێكدا.
سەبارەت بە خاڵە سنورییەكان وەزیری دارایی باسی لەوە كردووە جگە لەوەی كە پەیوەندی بە دوو حیزبی دەسەڵاتداری هەرێمەوە هەیە، ئەوەی كە فەرمییەو پەیوەندی بە حكومەتەوە هەیە، ئەگەر كۆنترۆڵمان زیادی نەكردبێت ئەوا داهاتمان زیادی كردووە، ئەو نەیشاردووەتەوە كە 100% یان پێنەكراوە لە سنوورەكاندا و هۆكارەكەشی گەڕاندووەتەوە بۆ گرفتە سیاسییەكانی ئەو دوو حیزبە.

گرێبەستەكان:
لەبارەی فەرمانبەرانی گرێبەست وەزیری دارایی گوتی: لەهەنگاوی یەكەمدا ژمارەیكی زۆر مامۆستای گرێبەستمان كرووەتە هەمیشەیی، ئەگەر فرسەتێكی تریش بێتە پێشەوە بێگومان ئەوانی تریش دەكەینە هەمیشەیی، بەڵام پەیوەستی كردەوە بە باش بوونی دۆخی دارایی حكومەتی هەرێمەوە، ئەو دەڵێت خۆم چەند جارێك نوێنەرەكانیانم بینیوە هاوسۆزم لەگەڵیان، بەڵام لەبەرامبەر نەبوونی دەرامەتی تەواو پێویست دا دەسەڵاتمان هەر ئەوەندەیە جارێ، ئەو بە هەمیشەیی كردنی كرێبەستەكانی بەستەوە بە هاتنی بەشە بوودجەی هەرێم لە بەغدادەوەو گوتی: هیوادارم بتوانین ئەو گرفتەش چارەسەر كەین.

پێداچوونەوەی ڕابوردوو:
بەپێی ڕێككەوتنەكەی نێوان هەرێم و بەغداد كە لەنێوان هەردوو لادا هاتووە كە دەبێت بگەڕێنەوە بۆ ڕابوردوو لە نێوان 2004 تا 2020 پێداچوونەوە بكرێت، وەزیری دارایی لەو بارەیەوە دەڵێت: لە نێوان دیوانی چاودێریی هەردوولا لە مانگی 2 ئەمساڵەوە كراوە، لە 2004 تا 2014 هەموو ساڵێك بەیانی خیتامی دارایی ساڵ ڕەوانەی عێراق كراوە، لەگەڵ ئەوەشدا خودی عێراق نییەتی، كەچی داوا لە ئێمە دەكەن. وەزیری دارایی باسی لەوەش كردووە ئەوان هیچ گرفتێكیان لەو بارەیەوە نییەو ئامادەیی ئەوەیان تێدایە كە بەیانی خیتامی لە 2004 ەوە ڕادەست بكەن.

داهاتە نانەوتییەكان:
سەبارەت بە داهاتە نانەوتییەكانی هەرێمی كوردستانیش وەزیری دارایی باسی لەوەش كردووە پێش لەم ڕێككەوتنەش ئەوە هەربووە كە 50%ی داهاتی نانەوتی ڕادەستی دارایی فیدراڵ بكرێت، بە پێی یاسای دارایی ژمارە 6/2019 هاتووە و بەڕوونی دیارە و دواتریش لە بەندی 11 رێكەوتنەكەدا جەختی لەسەر كراوەتەوە كە چۆن مامەڵەیان لەگەڵ دەكرێت، وەزیری دارایی باس لەوەش دەكات ئەو بابەتە كێشەی بۆ دروستكردوون و دەڵێت جارێك لەگەڵ وەزارەتی دارایی عێراق تووشی بەریەك كەوتن بووین، ئەوان داوایان كردووە كە نیوەی داهاتە سنووری و نانەوتییەكانیان ڕادەست بكەین، ئێمەش گوتمان باشە، ئەیانگوت دەبێت هەموویمان ڕادەست بكەن، ئێمەش گوتمان ئەگەر بتاندەینێ 50% مان دەدەنەوە ئەوان گوتیان نەخێر، لەبەر ئەوەی نیمانە بیدەینەوە بەسرە بۆ ئێوەش هەروایە ... ئیتر جەوێكی سەیرە... 

بۆچی بۆكورد نا؟
وەزیری دارایی بە سەرسورمانەوە باس لەوە دەكات زۆر شوێن و پارێزگا هەیە كە هیچ داهاتێكی نیەو لەگەل ئەوەشدا مووچەی فەرمانبەرەكانی دەنێرێت، داعش 1/3ی عێراقی داگیركرد بە موسڵیشەوەو نەوتەكەشی دەفرۆشت، كەچی حكومەتی ناوەند مووچەی فەرمانبەرەكانی هەر دەنارد، ئەی بۆچی بۆ هەرێمی كوردستان وانیە؟ ئەگەر بە هاوڵاتی عێراقیمان دەزانن دەبێت هەمان مامەڵەمان لەگەڵ بكەن، هەموو ئەو مافانەی كە بۆ كورد لە نێو دەستووردا تۆماركراوە كورد دەستی لێ هەڵناگرێت و داوای دەكات، یەكێك لەوانە لەبارەی ئەو نەوتەوەیە كە تازە دەدۆزرێتەوە . هەركەس بە حاڵ لە مێژووی قوربانیەكانی كورد شارەزا بێت پشتگیریی كورد دەكات كە دەست لە مافەكانی هەڵنەگرێت، ئەو مافانەی بە خوێن و ماندوو بون و ئەنفال و كیمیاباران بەدەستی هێناوە.

جیاوازی ژمارەی مووچەخۆران:
یەكێك لە جیاوازییەكانی نێوان حكومەتی ناوەند و هەرێم جیاوازیی ژمارەیە، ئاواتی شێخ جەناب باس لەوە دەكات ئەو ژمارەیەی فەرمانبەرانی هەرێم كە لە عێراق هەیە هی 2013 و 2014 یەو گۆڕانكاریی بەسەردا نەهاتووە و 682 هەزار مووچە خۆرە، نە كەسی لێ مردووە و نەكەس خانە نشین بووەو نە كەسی دیكەش دامەزراوە. بەڵام هەرێم 1 ملیۆن و 2سەدو 70 هەزار مووچە خۆرمان هەیە، وەزیری دارایی باس لەوەش دەكات ئەو ژمارەیەی كە بە بایۆمەتری چەسپاوە ڕادەستی عێراق كراوە، پێشتریش هی پێشمەرگە نەبێت هی مووچە خۆرانمان ناردووە.

بواری جێبەجێكردن:
گەرچی تا ئێستاش لە نێو شەقامی عێراقی و كوردستانیش قسە لەسەر ئەوەیە كە ئەم ڕێككەوتنەش هەر مەرەكەبی سەر كاغەز دەبێت و دواجار هەرلایەنەو ئەوی تر بە كەمتەرخەمی جێبەجێكردن ناو دەهێنێت و تاوانەكان دەخاتە ئەستۆی ئەوی تر، بەڵام ئەمجارەیان وەزیری دارایی بە ئومێدەوە دەڕوانێت بۆ داهاتووی و بەپێی وتەكانی ئەو دەچێتە بواری جێبەجێكردنەوەو دەڵێت: هەموو یاسایەك پێویستی بە ڕێنمایی هەیە، ئەمیش پێویستی بە دەركردنی ڕێنمایی خۆی هەیەو دەبێت چاوەڕێ بكەین.