10:49 - 13/03/2019

خەساندن مێژوویەكی درێژو دیاردەیەكی سەردەم‌

پەیسەر

خەساندن كە لەزمانی عەرەبیدا پێی دەگوترێت (الخصیان) و بە فارسی (خواجە) و بە ئینگلیزیش (Eunuch) دیاردەیەكی مێژوویی دیاری نامرۆڤانەیە، زۆربەی ئەوانەی باس لەو حاڵەتە دەكەن پێیان وایە یەكەمجار بۆ ئاژەڵی باری (تاك سم) ئەنجام دراوە.

خەساندن پرۆسەیەكە  بۆ پساندنی دەماری گەیەنەری (گونی نێرینە)بە مێشك و كۆئەندامەكانی دەمار، هەندێكجاریش (بڕینی دەزگای سێكسی نێرینەیە)و تەنها كەمێكی پێوە دەهێڵنەوە تا نێرینە میزی لێوە بكات. لەو رێگەیەشەوە هەستی جیاوازی رەگەز و سێكس و خستنەوەی وەچە نامێنێت و ئەوەی پێی بگوترێت هەستی سێكس لای نێرینە لەناو دەچێت، شارەزایان پێیان وایە خەساندن لە نێرینەدا دەبێتە هۆی كەمبوونەوەو تەنانەت نەمانی هۆرمۆنی تایبەت ئەوەش دەبێـتە هۆی هەڵوەرینی ئەو مووانەی كەبەهۆیەوە نێر لەڕەگەزی مێینە جیادەكاتەوە. بەڵام دوای ئەوەی شارەزایانی ئەو بوارە تاقیكردنەوەكەیان لەسەر ئاژەڵ سەركەوتنی باشی بەدەست هێنا پرۆسەكەیان گواستەوە بۆ مرۆڤ، لە ئاژەڵەكاندا وەڵامدانەوەیەكی باشی هەبوو، بەوەی هێز قوەتێكی باشی دەبەخشییە گیاندارەكە بۆ جێبەجێكردنی ئەركە قورسەكانی وەك باربردن و جووت و گێرە، لەگەڵ ئەوەشدا گیاندارەكە گۆشتی دەگرت و تواناجەستەییەكانی زۆر باش دەبوو، تاڕادەیەكی زۆریش هێمن دەبوویەوە، كاتێك دەسەڵاتداران بەمەیان زانی دەستیان كردە گواستنەوەی ئەو كارە بۆ نێو مرۆڤەكان.

لە زۆربەی كۆشكی دەسەڵاتداران و پاشا و سوڵتانەكاندا ئەو كارەیان لە دژی هەندێك كەس ئەنجام داوە كەلەناو كۆشكەكانیاندا ماونەتەوەو هەڵس و كەوتیان لەناو بنەماڵەو كەسە نزیكەكانی ئەواندا بووە، خەساندن كاتێك دەبێـتە دیاردە ئیتر دەبنە چینێكی تایبەت و دیاریكراو و نازناوی (خەسێنراو) وەردەگرن، ئەوان بوونەتە نەوەیەك كە هیچ نەوەیەك ناخەنەوە، وەجاخ كوێرو دوابڕاون، تەنها هۆكاریش ئەوەیە كۆئەندامی زاوزێی لەدەست داوە یان پوكاوەتەوەو توانای ئەنجامدانی كاری سێكسی نەماوە، یاخود لەئێستەدا لەرێگەی ئەنجامدانی نەشتەرگەریی یەوە ئەنجام دەدرێت ئیتر بۆ ئەوە بێت بچێـتە نێو یەكێك لەكۆشكەكان یان بەهۆی پێدان و فرۆشتنی بەوانەی پێویستیانە.

لەنێو میللەتان و شارستانیەتەكاندا خەسێنراوەكان بونیان هەبووە، هەندێكیان لەنێو (حەرەمسەراكان) و هەندێكی دیكەیان لە نێو گەڕەكی (ئاغاوات)ی مەككەو مەدینەدا ژیاون..

مێژووی خەسێنراوەكان پەیوەندی راستەوخۆی بەرەنگی پێستەوە هەیە، ئەو ململانێیەش دەگەڕێتەوە بۆ سەردەمانێكی دێرینی هەردوو شارستانیەتی (بێزەنتی) و (گریك)ەكان، هەندێكی دیكەش باوەڕیان وایە دەگەڕێتەوە بۆ سەردەمی فارسی و بابلیەكان، بەشێكی دیكەش باوەڕیان وایە (فیرعەونەكان)بۆ یەكەمجار كاری خەساندنیان ئەنجام داوە بۆ ئەوەی بیانبەنە نێو كۆشكەكانیان، هەروەها لە مێژووی ئیسلامیش دا باس لەوە دەكرێت (یەزیدی كوڕی مەعاویەی كوڕی ئەبو سوفیان) یەكەمجار خەسێنراوەكانی بردوەتە نێو كۆشكی خەلافەتەوەو لەنێو كۆشكەكەی خۆیدا بەڕێوەبردنی كارەكانیان دیوانێكی كردبوویەوە بۆیان بەناوی (فەتح)... لەسەردەمی (هارونە رەشید)یش دا ژمارەیەك لە غوڵامەكانی خەساندوەو لەنێو كۆشكەكانیدا كاریان پێكردوون، یەكێك لە جیاوازیەكانیش ئەوەبووە كە ژنەكان بە شێوەی پیاوان خۆیان بگۆڕن و پیاوەكانیش بەشێوەی ژنان.

(ئاغاواتەكانی حەرەمەین) كە بریتی بوون لە دوو گەڕەكی گەورەی هەردوو شاری مەككەو مەدینە لەوانەبوون كەخزمەتی هەردوو شوێنی پیرۆزی (مەككە) و (مەدینە)یان دەكرد، بەتایبەتی (كەعبە)و (مزگەوتی پێغەمبەر –د.خ). ئەوانە هیچیان هاوسەریان پێك نەهێنابوو جگە لە ژمارەیەكی كەمیان نەبێت كە مارەكردنەكەیان بەجۆرێك رێكخستبوو زۆر سەیر، لەكاتی مارەبڕینەكەیاندا ئەم دەستەواژەیان بەكاردەهێنا (أملكت علیك مكحلە بدون مرود) واتە تۆم كردە موڵكی خۆم وەك كلدانێك بە بێ قەڵەمی چاو..

بە پێی هەندێك سەرچاوە مێژوویی بەشێكی زۆری ئەوانەی دانیشتووی گەڕەكی ئاغاواتەكانی مەككەو مەدینەبوون خەڵكی وڵاتی حەبەشە بوون و بەهۆی داگیركاری ئیتاڵیا بۆ وڵاتەكەیان (1936-1948) هەر كەسێكی حەبەشی دژایەتی ئیتالیەكانی كردبێت و دەستگیركرابێت خەسێنراوە، جگە لەوانە زۆربەی منداڵانی ئەو وڵاتەیان خەساندووە، ئەوەش بۆ ئەوەی كە هیچ نەوەیەك نەخەنەوە.

ئەو خەسێنراوانەی كە لە مەككەو مەدینە دەژیان خەڵكانی بەتوانا و بازرگانی گەورەیان لێ پەیدا بووە، هەیانبووە بووەتە خاوەنی هوتێلی گەورەو تەنانەت ناوی هەندێكیان چووەتەریزی دەوڵەمەندەكانی سعودیەوە، ئەوەش لەبەر ئەوەی شارەزایی باشیان هەبوەو زمانی باش شارەزابوون و نهێنی زۆرشتیان لابووەو لای بەرپرسەكانیش خۆشەویست بوون.

لەنێو دەوڵەتی عوسمانیش دا خەسێنراوەكان رۆڵی گەورەیان هەبووە، بەڵام دیاردەی ناكۆكی لەنێوان سپی پێست و رەش پێستەكاندا هەبووە، سوڵتانەكانی عوسمانی رێككاری یاسایی خۆیان هەبوو بۆ هەر خەسێنراوێك هاتبێتە نێو كۆشكەوە، هیچ خەسێنراوێك وەرنەگیراوە تا خولی تایبەتی نەبینیبێت، ئەوان لە كۆمەڵێك رێگەی تایبەتەوە خەسێنراوەكانیان دەست دەكەوت، حاكمی ویلایەتەكانی عوسمانی منداڵی جوان و پێكەوتەیان پەیدا دەكرد و دەیان خەساندن و رەوانەی كۆشكی سوڵتانەكانیان دەكردن، ئەوانیش پەیوەندییان لەگەڵ باندەكانی منداڵفڕاندن دەكرد لە ئەوروپا، ئەوان بە پارەیەكی باش دەیانفرۆشتنەوە بە دەڵاڵەكان و لەوێشەوە بەرەو كۆشكەكان بەڕێ دەخران. خەسێنراوی سپی پێست كاری ناوكۆشكەكان و كاروباری ژنانیان دەكرد و خەسێنراوی رەشیش دەرگاوانی و پاسەوانی و كاری باخەوانی و كاری قورستریان پێ دەكردن.

ئەو خەسێنروانەی كە بەتەواوی دام و دەزگای سێكسیان لە بنەوە بڕابوو، كاروباری ژن و كچەكانی بەرپرسانیان پێدەسپاردن و جگە لەوەش مەحرەم بوون لەناو ژوورەكانیان و خزمەتكردنیان تەنانەت لەناو گەرماوەكانیشدا بچنە ژورەوە لەگەڵیان. ساڵی 1716 سوڵتان ئەحمەدی سێیەم ویستی یاسای خەساندن هەڵبوەشێنێتەوە بەڵام سەركەوتوو نەبوو، بەڵام لەسەردەمی سوڵتان عەبدولحەمیدی دووەمدا بە شێوەیەكی فەرمی كۆتایی پێهاتووە.

خەسێنراوەكان بە پێی یاسای عوسمانی دەسەڵاتی گەروەیان هەبووە لەناو كۆشكەكان دا، لەدوای سوڵتان و گەورە راوێژكاری سوڵتان سەرۆكی خەسێنراوەكان دەسەڵاتی سێیەم بووە. 

لەلای فارسەكانیش دەسەڵاتداران بیانویستایە كەسێك بخەسێنن هەر لە منداڵییەوە دەیانخەساندو دەیانبردنە نێو كۆشكەكان تا فێری كاری خۆیان بكەن و بنەماڵەی دەسەڵاتداران لە شەڕی سێكس و گێچەڵەكانی ئەو خزمەتكارانە بپارێزرێن و وەچەیان لەگەڵ وەچەی ئەوان تێكەڵ نەبێت. بارودۆخی خەساندن لای فارسەكان تا كۆتایی دەسەڵاتی قاجاریەكان هاتووە، هەر لای فارسەكان روویەكی ئاینی پێدراوەو لەلایەن بزووتنەوەكەی (حەسەن سەباح)ەوە كە ماوەیەكەیش بە (باتنیەكان) بەناوبانگ بوون لەناو كۆشك و قەڵاكانیاندا خەسێنراوی زۆری تێدابووە، نەك هەر ئەوەندە لەلای بزوتنەوەی باتنیەكان پلەی (خەسێنراو)پلەیەكی گەورەی بانگەوازكاری گەورە بووەو نەدراوە بە هیچ كەسێك ئەگەر نەخەسێنرابێت، ئەوەش لەبەر ئەوەی ئەو كارانەی كە پێیان دەسپێرێت بەباشی و بێ بیرلێكردنەوەو گەڕانەوە بۆ هیچ كەس و لایەك ئەنجامی بدەن.

لەمێژووی ئێرانیەكاندا بە پێچەوانەی سەرجەم مێژووی مرۆڤایەتیەوە یەكێك لەوانەی كە دەخەسێنرێن دەبێتە پادشای وڵاتی ئێران، (ئاغا محمد خانی قاجار) كە یەكێك بووە لەوانەی لەلایەن (لوتف عەلی خان)ی برازای (كەریم خانی زەند)لە كرمان خەسێنراوە، هەر ئەو كارە دەبێتە هۆی ئەوەی رقێكی گەورەی بەرامبەر كرمانیەكان لەدڵدا بچەسپێت و دواتر هێرش بكاتە سەر كرمان و دوای ئەوەی لوتف عەلی خانی كەوتە دەست و ئەشكەنجەیەكی زۆری داو بە شێوەیەكی زۆر ترسناك كوشتی، پێش ئەوەی بیكوژێت لە تۆڵەی خەساندنی خۆیدا لوتف عەلی خەساندەوە ئەوجا كوشتی. ئاغا محمد خان لە هێرشەكەی سەر كرمان دا زیندانی كرمانی شكاند كە 900 كەسی تێدابوو، فەرمانی كرد بە سێ سەد كەسیان شەش سەدی تریان بكوژن، دوایی ئەو سێ سەدە یەكی سەری دووكەس لە هاوڕێكانیان بگرن بەدەستەوە تا دەچنە شاری (بەم) بۆ ئەوەی لەوێ بە كەللە سەری مرۆڤ پەیكەرێكی گەورە دروست بكات.

هەندێك لە پادشاكان بۆ ئەوەی نەیارەكانیان جێگەیان نەگرنەوە، دەهاتن نەیارەكانی خۆیان دەخەساند، یان ئەوانەی كە دەیتنویست لەنێو جەنگەكان بەكاریان بهێنن یاخود ئەوانەی لەناو قەڵاكان دەیانهێشتنەوە.

هەرچی ئەوروپاشە، ئەڵمانیەكان لە دەوروبەری زنجیرە چیاكانی ئەڵب و روباری راین و هەندێك شوێنی دیكە خەڵكیان دەست بەسەر دەكرد، هەموویان سپی پێستیش بوون، هەموشیان لەوانە بوون كە (نێر و مێ)یان زۆرجوان و پێكەوتوو بوون، دواتر بە كاروانی گەورە دەیانگواستنەوە بۆ ئیسپانیا كە جاران پێی دەگوترا ئەندەلوس، موسڵمانەكان نێرینەكانیان دەكڕی بۆ خزمەتكردن و كارە قورسەكان و مێینەكانیش بۆ كارەكەری و كاری ئامادەكردنی سفرە و خزمەت و خاوێنی، شارەزایان باس لەوە دەكەن زۆرینەی بازرگانەكان یەهودی بوون و پێش لەوەی بیانفرۆشن (خەساندویانن) و بە پارەی خەیاڵی قرۆشتویانن، دوای ئەوەی خەڵك بەم جۆرە بازرگانیەی زانی رەواجی پەیدا كردو فێری كەسابەتەكە بوون، دوای ئەوی بازاڕی (خەسێنراوەكان) لە زۆربەی وڵاتانی ئەووپا بەئاشكرا كرانەوە بەتایبەتی بازاڕی (فردون) كە دەكەوتە ناوچەی لۆرینی فەرەنسا.

خەساندنی گۆرانیبێژ و هونەرمەندەكان ناوبانگێكی گەورەی هەبووە لەو سەردەمانەدا هۆكارەكەشی بۆ ئەوە گەڕاوەتەوە كە ئامێری دەنگ گەیاندن نەبووە، ئەوانەشی كە خەسێنراون زیاتر دەنگیان بەرز بووە، هەروەها پیاوەكانیان گۆڕانكاری لە تۆنەكانی دەنگیان دا دروست بووەو ناسك بوەتەوە وەك دەنگی ژنان و ئەوەش بوەتە هۆی ئەوەی دەنگی نێرینەیی و گڕی ئەوان سەرنجی ژنەكان رانەكێشێت و لە بری هونەرەكەیان سەرقاڵی پەیوەندیەكانیان نەبن لەگەڵ ژنان.

یەكێك لەو روداوە سەیرانەی لە مێژووی خەسێنراوەكاندا دەگێڕرێتەوە ئەوەیە، گوایە یەكێك لە خەلیفەكانی بەنی ئومەیە لە سەدەی حەوتەمی زاینی دا –وەك راغبی ئەسفەهانی باسی دەكات- فەرمانی كردوو بە والی مەدینە بە (احصا ْ- واتە سەرژمێری)ی (نێرەموكەكان) بكات، كەچی گوەمێشێك چوەتە سەر پیتی (ح)ەكەو بوەتە(خ) واتە بوەتە(اخصا ْ- كە بەمانای خەساندن دێت، هەر بۆیە فەرمانەكە (دەلال)ناوێك دەگرێتەوە كە نێرەموكێكی جوان و پێكەوتوو بوەو بەناوبانگترین گۆرانیبێژەكانی مەدینە بووە بەر ئەو پرۆسەیە دەكەوێت و دەخەسێنرێت. هەر لەو گومێشەوە كاری خەساندنی هونەرمەندە گۆرانیبێژەكان دەستپێدەكات و زۆرینەیان خەسێنراون بۆئەوەی دەنگیان ناسك ببێتەوەو ژنانە دەربكەوێت.

چۆنیەتی خەساندن:
لەسەردەمی دەوڵەتی ئیسلامیدا بەپێی فەتوایەك خەساندن حەرام و قەدەغە دەكرێت، بەڵام ئەگەر خەسێنەرو خەسێنراوەكە هەردوكیان ناموسڵمان بوون ئەوا دەكرێت مامەڵەیان لەگەڵ بكرێت، لەدوای ئەو فەتوایەوە ئەگەر دیاردەیەكی لەو شێوەیە هەبوایە دەنێرانە ناوچەی (قیبتی)ەكانی میسر و زۆرینەی خەساندنیش لە ناوچەكانی (جرجا و ئەسیوت)ئەنجام دەدرا لەلایەن مەسیحیەكانی ئەو ناوچانەوە، زۆرینەی ئەوانەی دیاری دەكران بۆ ئەوەی بخەسێنرێن تەمەنیان لە نێوان (4 بۆ 9) ساڵیدا بوو، لەوەزری پایزدا خەساندنەكەیان كردووە لەبەر ئەوەی باوەڕیان وابووە وەرزی پایز بۆ چاكبوونەوەی برینەكان لەبارترەو كێشەی تەندروستی گەورەی لێناكەوێتەوە، ئەوانەی ئەم كارەیان دەكرد تەنا پساندنی دەماریان بۆ (گون)ی نێرینەكان نەدەكرد بەڵكو وەك هەڵكێشان هەلە ڕەگەوە هەموو كۆئەندامی زاووزێی نێرینەیان دەبڕین و شوێنەكەیان بە شێوازی ئەو سەردەمە دەدورییەوەو بە رۆنی زەیت چەوریان دەكرد و خەنەیان لێدەدا، دواتر تا سەرووی ناوكی دەخرانە ناو خۆڵ و بۆ ماوەی دوو رۆژ بەو شێوەیە دەیانهێشتنەوەو دواتر دەریان دەهێنان و بە گیراوەیەكی زەیت و خۆڵی تایبەت وشكیان دەكردەوە.

بەو پێیەی كە خەسێنراوەكان لەنێو كۆشكەكاندا لەهات و چۆون دا بوون و پەیمانی خانەدان و بەرپرسیەكانیان دەگەیاندە ژنەكان و لەوانیشەوە بۆ ئەو بەرپرسانە، ئیدی زۆرینەی زانیارییە ئاشكراو نهێنیەكانی كۆشكیان لابوو، ئەو خەسێنراوانە دەیانزانی لەنێو ژوورە تاریكەكان و لە پشتی دیوارەكانی كۆشكەوە چی روو دەدات، هەر لەنێو ئەوانەشدا خەڵك بەتواناو شارەزای باشیان تێدا هەڵكەوتووە لەنموونەی ئەوانەش گەشتیارێكە چینی موسڵمانە بەناوی (تشنگ)ئەو توانی رێبەرایەتی كەشتییگەلی چینی بكات تا گەیاندویەتیە كەنارەكانی ئەفەریقالە ساڵی 1405 دا، تا ئێستەش وڵاتی چین بە شانازییەوە باسی ئەو روداوە دەكاتەوە، هەر لەنێو ئەوانەشدا چەندین شاعیرو هونەرمەند و خاوەن بەهرەی گەورەیان تێدا پەیدا بووە.

یەكێكی دیكە لەوانەی كە توانایەكی بەهێزی هەبووە لە بەڕێوەبردنی وڵاتدا كۆیلەیەكی حەبەشی رەش پێست بووە، بەناوی (كافور الاخشیدی)، كافوور بە دامەزرێنەری دەوڵەت و بنەماڵەی ئەخشیدی لە میسر دێتە ئەژمار، خاوەنی قول و قاچێكی ناشیرین بوو، بەحاڵ دەیتوانی بەڕێدا بڕوات، لچێكی شۆڕی هەبوو كە كونێك لە لچی خوارەوەیدا هەبوو، كاتی كۆیلایەتی خاوەنەكەی زۆر ئازاری دەدات و جۆرەها سوكایەتی پێدەكات، پاش ئەوەی كە دەیفرۆشێت و دەكەوێتە دەستكەسێكی خوێندەوار بەناوی محمود بن وهب العباس الكاتب) خۆیی لێنزیك دەكاتەوەو فێری خوێندەواری دەكات و لەقەرەبووی ئەو هەموو سكایەتیەدا هەوڵ دەدات بگاتە ترۆپكی دەسەڵات، دوای ئەوەی بەباسی فێری خوێندەواری دەبێت (ئیبن تەنج)دەیكاتە مامۆستاو سەرپەرشتیاری منداڵەكانی، پاش ئەوەی سەركەوتوو دەبێت لە فێركردنیاندا، بەرپرسیارێتی دیكەی دەداتێ لەناو سوپادا، پاش ئەوەی گەورەكەی ئەو هەموو تواناو كارزانینەی دەبینێت، ئازادی دەكات ، دواتر سەرپەرشتی هێرشی میسریەكان دەكات بۆ سەر سوریا لە ساڵی 945 دا و دوای ئەویش هێرش دەكاتە سەر حیجاز، لەپاش سەركەوتنی لەو بوارەشدا، دەبێتە نوێنەری دبلۆماسی لەنێوان خەلیفەكانی بەغداد و شام لەگەڵ بنەماڵەی ئەخشیدیەكان. ساڵی 946 لە دوای مردنی (محمدی كوری تەنج) دەبێتە فەرمانڕەوای میسر، لە پاشان لە قاهیرە كۆچی دوایی دەكات و بە هۆكارێكی نەزانراو تەرمەكەی دەگوازرێتەوە بۆ قودس و لەوێ دەنێژرێت. دەگوترێت فەرمانڕەوایەكی دادگەر و خۆش مەشرەب بووە، موتەنەبی لە شیعرێكی هەجوودا هێرشی زۆر دەكاتە سەری و ئەو شیعرەی موتەنەبیش بە یەكێك لە شیعرە نایابەكانی دێتە ئەژمار.

خەسێنروای سەردەم :
شارەزایان پێیان وایە دیاردەی خەساندنی كردەیی كە دەرهێنان یان بڕینی بەشێكی جەستەی مرۆڤێكە دەمێكە كۆتایی پێهاتوە، ئەوەی كە هەیە لە ئێستەدا جۆرێكی دیكەیە لە مرۆڤی خەسێنراو، ئەوان پێیان وایە مرۆڤی سەردەمە كۆنەكان بەدەست خۆیان نەبووەو بە زۆر خەسێنروان و بێبەش كراون لە خۆشیەكانی ژیان و بە جۆرێك لە جۆرەكان كراونەتە كۆیلە، بەڵام لە ئێستەدا خەسێنراوەكان بەوانە دەگوترێت كە بەدیارچاوی خۆیانەوە مافەكانی خەڵك زەوت دەكرێت و ئەوان دێن پاساوی بۆ دێننەوە، لەسەر شاشەی تیڤیەكانەوە بەرگری لە دەسەڵاتی سوڵتان و مەلیكەكانی وڵات و بەرگری لە ژن و ماڵی بەناحەق پەیدا كراوی ئەوان دەكەن، ئەوان دێن و بەرگری لە سیستەمێك دەكەن كە گوایە هی خەڵكەو بۆ خەڵك، كەچی خەڵك ئەخیر كەسن لە شتەكان بەئاگادێنەوە، بڕیار هی كۆمەڵێك كەسی ژمێرراوەو بەزۆر فەرمانڕەوایی دەكەن و دواتر خەسێنراوەكان بەرگرییان لێدەكەن و پاساویان بۆ دەهێننەوە.

خەسێنراوەكان هەموو ئەو بەرپرسانەش دەگرێتەوە كە لە پۆستێكی باڵادان و توانای گۆڕانكارییان هەیەو نایكەن، ئەوانەن كە ئەفسەر و پلەی باڵان و لەبەردەم كوڕوكاڵی بەرپرسەكاندا بۆ پاروە نانێك هەموو جۆرە سوكایەتییەك قبوڵ دەكەن..

كۆیلەی سەردەمە كۆنەكان و كۆیلەی سەردەم، خاڵی هاوبەشیان رازیكردنی دڵی خاوەن و پیاهەڵدانە، لابردنی وشەی نەخێرە لە فەرهەنگی خزمەتگوزاریدا، هەردوكیان گیرفان و گەدەیان خستبووە پێش ژیری و ویژدانیانەوە، تاكە جیاوزییەك كە هەبێت كۆیلەی سەردەم ستەمەكەی بەسەردا سەپێنراوەو كۆیلەی سەردەمیش بە پێی خۆی دەچێتە بەردەم نوسینگەو شوێنكاری ئەربارەكانی سیاسەت و بازرگانی...